ޕާކިސްތާނުގެ އާންމު އިންތިހާބުގައި ވޯޓު ފޮށިތައް ބަންދުކޮށް، ވޯޓު ގުނުމުގެ މަސައްކަތް ފަށައިފި އެވެ.
ފާއިތުވެދިޔަ ދުވަސްތަކުގައި ދިން ހަމަލާތަކާއެކު ބިރުވެރިކަމެއްގެ ތެރޭގައި ޕާކިސްތާނުގެ އާންމު އިންތިހާބުގައި ވޯޓުލުން ކުރިޔަށް ގެންގޮސްފައިވާއިރު، މިއަދު އެ ގައުމުގައި މޮބައިލް ފޯނުތަކުގެ ހިދުމަތް އެއްކޮށް ކަނޑާލި އެވެ.
ނަމަވެސް އިންތިހާބުގައި ވޯޓުލައި ނިމި ވޯޓު ފޮށިތައް ބަންދުކުރި ފަހުން ބައެއް ސަރަހައްދުތަކަށް މިހާރު ވަނީ ފޯނުގެ ހިދުމަތް އަލުން ދޭން ފަށާފަ އެވެ. ނަމަވެސް މުޅި ޕާކިސްތާނަށް އެއްކޮށް އަދި މި ހިދުމަތް ދޭން ނުފަށަ އެވެ.
ޕާކިސްތާނު ސަރުކާރުން ބުނި ގޮތުގައި ފޯނުތަކުން ހިދުމަތް ކަނޑާލީ އި ވަނީ އެ ގައުމުގައި ހިނގަމުން އަންނަ ހަމަޖެހުންތަކާއި ދެމުން އަންނަ ހަމަލާތަކާ ސަލާމަތީ ސަބަބުތަކަށްޓަކަ އެވެ.
ޕާކިސްތާނުގައި ހިނގަމުންދިޔަ ހަމަނުޖެހުންތަކާ ގުޅިގެން އެ ގައުމުގެ އިންތިހާބުގެ ވޯޓުލުން ކުރިޔަށް ގެންދެވޭނެ ކަމާމެދު ވެސް ބައެއް ފަރާތްތަކުން ސުވާލު އުފެއްދި އެވެ. ނަމަވެސް މިހާރު ޕާކިސްތާނުގެ ރައްޔިތުން ކަންބޮޑުވަނީ ފޯނުގެ ހިދުމަތް މެދުކަނޑާލައި، އިންތިހާބަށް ނުފޫޒު ފޯރުވާފައިވާނެތީ އެވެ.
ޕާކިސްތާނުގެ އިންތިހާބުގައި ގާނޫނު ހަދާ މަޖިލިސް، ނެޝަނަލް އެސެމްބްލީގެ 336 ގޮނޑީގެ ތެރެއިން 266 ގޮނޑިއަށް ސިޔާސީ ޕާޓީތަކުން 5،121 ކެންޑިޑޭޓުން ވާދަކުރެ އެވެ. ބާކީ 70 ގޮނޑީގެ ތެރެއިން 60 ގޮނޑި ހާއްސަ ކޮށްފައި ވަނީ އަންހެނުންނަށެވެ. އަދި އަނެއް 10 ގޮނޑި ހާއްސަކޮށްފައި ވަނީ އެހެން ދީނުތަކުގެ މީހުންނަށެވެ.
މި އިންތިހާބުގައި ޕާކިސްތާނުގެ އާބާދީގެ ގާތްގަނޑަކަށް 241 މީހުންގެ ތެރެއިން 18 އަހަރުން މަތީގެ 128 މިލިއަން މީހުންނަށް ވޯޓުލުމުގެ ހައްގު ލިބެ އެވެ.
