އެމްޕީއެލް އެފްއޭއެމް ދެ ވަނަ ޑިވިޝަން ފުޓުބޯޅަ މުބާރާތުގައި އިއްޔެ ހަވީރު ކުޑަހެންވޭރު ޔުނައިޓެޑް އާއި ވިކްޓަރީ ސްޕޯޓްސް ކުލަބް ބައްދަލުކުރި މެޗުގައި ހިނގާދިޔަ ހަމަނުޖެހުމާ ހެދި މެޗު ހުއްޓައިލަން ޖެހުމުން, އެ މެޗުގެ ބާކީ ބައި ކުޅުމަށް އެމެޖެންސީ ކޮމެޓީން ނިންމާފައި ވަނިކޮށް ކުޑަހެންވޭރުން އެ ނަތީޖާގައި އޮވެ މެޗު ނިންމާލުމަށް އެދުމުން އެގޮތަށް މެޗު ނިންމާލުމަށް އެފްއޭއެމުގެ އެމެޖެންސީ ކޮމެޓީން ނިންމާފި އެވެ.
ހަމަނުޖެހުން ހިނގާ މެޗުގެ ކުޅުން ހުއްޓާލީ މެޗުގެ 81 ވަނަ މިނެޓުގަ އެވެ. އޭރު ވިކްޓަރީ އޮތީ 3-1 އިން ލީޑުގަ އެވެ.
މެޗު ހުއްޓައިލަން ޖެހުނީ، ވިކްޓަރީގެ ބެންޗާ ދިމާލުން ވިކްޓަރީގެ އަނަޓޯލީ ވްލަޝީޗޭފް އާއި ކުޑަހެންވޭރުގެ ކުޅުންތެރިއަކާ ދެމެދު ހިނގި ކަަމަކާ ގުޅިގެން، ދެ ޓީމުގެ ކުޅުންތެރިންނާއި އޮފިޝަލުން އަދި ސަޕޯޓަރުން ދަނޑަށް އަރައި ހިންގި ހަމަނުޖެހުމަކާ ހެދި އެވެ.
މިކަން ބެލުމަށްފަހު މުބާރާތާ ބެހޭ ކޮމެޓީން ނިންމީ އަންނަ ހުކުރު ދުވަހު ހަވީރު 16:00 ގައި މި މެޗުގެ ބާކީބައި ކުރިއަށް ގެންދާށެވެ. އަދި އެ މެޗަށް ސަޕޯޓަރުންނަށް ދަނޑަށް ވަނުން މަނާވާނެ ކަމަށްވެސް ކޮމެޓީގެ ނިންމުމުގައި ފާހަގަކޮށްފައި ވެއެވެ. މީގެ އިތުރުން ކޮމެޓީން ވަނީ މި މެޗުގައި ހިނގައި ދިޔަ ހަމަނުޖެހުން ވަކި މައްސަލަ އެއްގެ ގޮތުގައި ޑިސިޕްލިނަރީ ކޮމެޓީއަށް ހުށަހަޅަން ނިންމާފަ އެވެ.
ކޮމެޓީން މިގޮތައް ނިންމާފައި ވަނިކޮށް ކުޑަހެންވޭރުން ވަނީ އެ މެޗުގެ ނަތީޖާ އޮތް ގޮތައް މެޗު ނިންމާލުމަށް އެދި ސިޓީ އެއް އެމެޖެންސީ ކޮމެޓީއަށް ހުށަހަޅާފަ އެވެ. އަދި އެ ސިޓީގައި ހުރި ކަންކަން ބެލުމަށްފަހު އެމެޖެންސީ ކޮމެޓީގެ އިއްތިފާގުން ވަނީ 3-1 ގެ ނަތީޖާ އަކުން އެ މެޗު ކާމިޔާބުކުރީ ވިކްޓަރީ ކަމަށް ނިންމާފަ އެވެ.
މި މެޗުގެ ކުޅުމަށް ބަލާއިރު، ވިކްޓަރީން ވަނީ ފުރަތަަމަ ހާފުގެ ކުރީކޮޅުގައި ދެ ގޯލު ޖަހައިފަ އެވެ. އެ ގޮތުން، ވިކްޓަރީން މެޗުގެ 12 ވަނަ މިނިޓްގައި ލީޑުނެގީ، މުހައްމަދު އުމެއިރު ޖެހި ގޯލުންނެވެ. މިއީ ވިކްޓަރީގެ މޫސާ ޔާމިން ނަގައިިދިން ހުރަހަކުން، އެ ޓީމުގެ ބެލަރޫސް ފޯވާޑް އިވާން ވެރާސް ޖެހި ޝޮޓް، ކުޑައޭރިއާތެރެއިން ލިބުމުން، އުމެއިރު ޖެހި ގޯލެކެވެ.
އޭގެ އިރުކޮޅެއް ފަހުން، ވިކްޓަރީން ވަނީ ދެ ވަނަ ލަނޑެއް ޖަހައިފަ އެވެ. މި ލަނޑު ޖެހީ، އޭރިއާބޭރުން ޖެހި ޝޮޓަކުން، އުޒްބެކިސްތާން މިޑްފީލްޑަރު، ފާރޫކް ހައިދަރޯފް ޖެހި ގޯލެކެވެ. އޭނާ ތިރިތިރިން ފޮނުވާލި ބޯޅަ އަމާޒުވީ ގޯލުގެ ކަނަށެވެ.
ކުޑަހެންވޭރުން މެޗުގެ ތެރެއަށް އެނބުރި އައީ 37 ވަނަ މިނިޓްގައި އަލީ ޝަމާލް އަބްދުﷲ (ޝަންމު) ޖެހި ގޯލުންނެވެ. ޝަންމު އަރިމަތިން ނެގި ބޯޅަ ގޯލުގެ މަތީ ކަނަށް ވަނީ ވިކްޓަރީ ކީޕަރު ހަނީފް ސާގިބް އަތްމަތިން ގޮހެވެ.
ދެ ވަނަ ހާފް ފެށިގެން ފަސް ވަނަ މިިނިޓްގައި ކުޑަހެންވޭރު އޭރިއާތެރެއިން އެ ޓީމުގެ ކުޅުންތެރިން، ވިކްޓަރީގެ އުމެއިރަށް ކުރި ފައުލަކަށް ރެފްރީ ވަނީ ޕެނަލްޓީއެއް ދީފަ އެވެ. އެ ޕެނަލްޓީ ކާމިޔާބުކުރީ ވިކްޓަރީގެ ކިރްގިސްތާން މިޑްފީލްޑަރު، އަނަޓޯލީ ވަލްޝީޗޭފް އެވެ.
ވިކްޓަރީ ދެ ގޯލުގެ ލީޑެއްގައި އޮއްވައި، މެޗުގެ ފުރިހަމަ ވަގުތު ހަމަވާން ނުވަ މިނިޓަށް ވެފައިވަނިކޮށް، ހިނގި ހަަމަނުޖެހުމާ ހެދި މެދުކަނޑާލަން ޖެހުނީ އެވެ. މެޗު އަލުން ފެށޭތޯ މުބާރާތް އިންތިޒާމްކުރާ އެފްއޭއެމްގެ އޮފިޝަލުންނާއި ދެ ޓީމުގެ އޮފިޝަލުން އަދި ފުލުހުން ގިނަ މަޝްވަރާތަކެއް ކުރި އެވެ. އެކަމަކު، އޭގެއިން ކަމެއްގައި އަލި މަގެއް ފެންނަން ނެތުމުން މެޗުގެ ކަންކަން ކޮމިޓީން ގޮތެއް ނިންމާ ގޮތަށް ކަނޑައެޅީ އެވެ.
