ބިރުވެރި ކަމެއްގެ ތެރޭގައި ޕާކިސްތާނުގެ އާންމު އިންތިހާބުގައި ވޯޓުލާން މިއަދު ފަށައިފި އެވެ.
ވޯޓުލާން ފަށާފައި މިވަނީ އިންތިހާބާ ދިމާކޮށް ޕާކިސްތާނުގައި ހަމަނުޖެހުން ވަރަށް ބޮޑުވެ، އެކި ސަރަހައްދުތަކަށް ހަމަލާދީ އެތައް ބަޔަކު މަރާލާފައި ވަނިކޮށެވެ. މިއާއެކު، ރައްޔިތުންގެ ސަލާމަތާ ރައްކާތެރިކަން ކަށަވަރު ކުރުމަށް ކަމަށް ބުނެ މުޅި ޕާކިސްތާނުން މިއަދު ވަނީ ފޯނުގެ ހިދުމަތް މެދުކަނޑާލައިފަ އެވެ.
މި އިންތިހާބުގައި ޕާކިސްތާނުގެ އާބާދީގެ 241 މީހުންގެ ތެރެއިން 18 އަހަރުން މަތީގެ 128 މިލިއަން މީހުންނަށް ވޯޓުލުމުގެ ހައްގު ލިބެ އެވެ.
ޕާކިސްތާނުގެ އިންތިހާބުގައި ގާނޫނު ހަދާ މަޖިލިސް، ނެޝަނަލް އެސެމްބްލީގެ 336 ގޮނޑީގެ ތެރެއިން 266 ގޮނޑިއަށް ސިޔާސީ ޕާޓީތަކުން 5،121 ކެންޑިޑޭޓުން ވާދަކުރެ އެވެ. ބާކީ 70 ގޮނޑީގެ ތެރެއިން 60 ގޮނޑި ހާއްސަ ކޮށްފައި ވަނީ އަންހެނުންނަށެވެ. އަދި އަނެއް 10 ގޮނޑި ހާއްސަކޮށްފައި ވަނީ މުސްލިމް ނޫން މީހުންނަށެވެ.
އިންތިހާބުގެ ވޯޓުލުން ކުރިޔަށްދާނީ މިއަދު ހަވީރު ފަހެއް ޖަހަން ދެނެވެ. ނަމަވެސް ދިމަވާ ކަމަކުން ވޯޓުލުމުގެ ވަގުތު އިތުރު ކުރުމުގެ އިހުތިޔާރު ލިބިގެންވެ އެވެ.
އިންތިހާބުގެ ނަތީޖާތައް ވޯޓު ފޮށިތައް ބަންދުކުރާތާ ގަޑިއިރުތަކެއް ފަހުން ލިބެން ފަށާއިރު، އިންތިހާބު ކާމިޔާބުކުރި ޕާޓީ އެންމެ ލަސްވެގެން ހުކުރު ދުވަހު ހެނދުނު އެނގޭނެ އެވެ.
މި އިންތިހާބުގައި ވާދަ ކުރުމުގެ ފުރުސަތު ކުރީގެ ބޮޑުވަޒީރު އާމިރު ޚާނަށް ގެއްލުވައިލުމަށްޓަކައި އޭނާގެ މައްޗަށް ގިނަ ދައުވާތަކެއްކޮށް، ހުކުމް ސާބިތުވާ ކަމަށް ކަނޑައަޅައި ޖަލަށް ލައިފަ އެވެ.
