ޕާކިސްތާނުގެ ބަލޮޗިސްޓާން ޕްރޮވިންސްގައި ސިޔާސީ ޕާޓީއެއްގެ އޮފީހަކަށް އެއްޗެއް ގޮއްވާލައިގެން މިއަދު ދިން ހަމަލާގައި އަށް މީހަކު މަރުވެއްޖެ އެވެ.
ޕިޝިން ޑިސްޓްރިކްޓްގެ ޑެޕިއުޓީ ކޮމިޝަނަރު ޖުންމަ ޑޭޑް ހާން ވިދާޅުވީ، ހަމަލާ ދިނީ ޕާކިސްތާނުގެ އިންތިހާބުގައި ވާދަކުރައްވާ ކެންޑިޑޭޓެއްގެ އޮފީހަކަށް ކަމަށާއި، މި ހަމަލާގައި ގިނަ އަދަދެއްގެ މީހުން ޒަހަމްވި ކަމަށެވެ.
ޕާކިސްތާނުގެ އާންމު އިންތިހާބު މާދަމާ އޮންނައިރު، އިންތިހާބާ ދިމާކޮށް އެ ގައުމުގައި އަންނަނީ ހަމަލާތައް އިތުރުވެ، ހަމަނުޖެހުންތައް އިތުރުވަމުންނެވެ. އިއްޔެ ވެސް ހަނގުރާމަވެރި ޖަމާއަތަކުން ޕާކިސްތާނުގެ ޕޮލިސް ސްޓޭޝަނަކަށް ހަމަލާދީ 10 ފުލުހުން މަރާލާފައިވެ އެވެ. އެ ހަމަލާގައި ގިނަ ބަޔަކު ޒަހަމް ވެސްވި އެވެ.
އޭގެ އިތުރުން މިދިޔަ މަހު ޕިޝާވަރުގައި ދިން ޖާނުންފިދާވުމުގެ ހަމަލާއެއްގައި 101 މީހަކު މަރާލާފައިވާއިރު، އިންތިހާބުގައި ވާދަކުރައްވާ އިދިކޮޅު ކެންޑިޑޭޓެއް ކަމަށްވާ ރީހާން ޒައިނަބުއަށް ބަޑިން ހަމަލާ ދީ އޭނާ ވެސް ވަނީ މަރާލައިފަ އެވެ.
ޕާކިސްތާން އާންމު އިންތިހާބުގައި 128 މިލިއަން މީހުންނަށް ވޯޓު ލުމުގެ ހައްގު ލިބިފައިވާއިރު، އިންތިހާބުގައި މާދަމާ ވޯޓުލުން ކުރިޔަށްދާއިރު ބޮޑެތި ހަމަނުޖެހުންތައް ހިނގާނެ ކަމަށް ބެލެވެ އެވެ.
