ޗިލީގެ ކުރީގެ ރައީސް އަދި ބިލިއަނަރު ސެބަސްޓިއަން ޕެނޭރާ ދަތުރުކުރެއްވި ހެލިކޮޕްޓަރު ވެއްޓި އަވަހާރަވެއްޖެ އެވެ.
އެ ހެލިކޮޕްޓަރު ވެއްޓިފައި ވަނީ ޗިލީގެ ލަގޯ ރަންކޯގެ ފެންގަނޑެއް ތެރެއަށް ކަމަށްވާއިރު، ހެލިކޮޕްޓަރުގައި ޕިނޭރާއާއެކު ދަތުރުކުރި ތިން މީހަކު ވަނީ ސަލާމަތްވެފަ އެވެ.
ރިޕޯޓްތައް ބުނާގޮތުން ވެއްޓިފައި ވަނީ ޕިނޭރާގެ އަމިއްލަ ހެލިކޮޕްޓަރެވެ. ނަމަވެސް ހެލިކޮޕްޓަރު ދުއްވާފައި ވަނީ ކާކު ކަމެއް މިހާތަނަށް ސާފެއް ނުވެ އެވެ.
ހެލިކޮޕްޓަރު ވެއްޓުމާ ގުޅޭ ގޮތުން މާ ބޮޑު ތަފްސީލެއް ޗިލީ ސަރުކާރުން ހާމަކޮށްފައިނުވާއިރު، މައްސަލަ ތަހުގީގު ކުރަން މިހާރު ވަނީ ފަށާފައެވެ.
އުމުރުން 74 އަހަރުގެ ޕިނޭރާ އަވާހަރަވުމާ ގުޅިގެން ޗިލީގައި ތިން ދުވަހަށް ހިތާމަ ފާޅުކުރުމަށް ނިންމައި، އޭނާ ރަސްމީ އިއްޒަތުގައި ވަޅުލުމަށް ޗިލީގެ ރައީސް ގެބްރިއަލް ބޮރިކް ވަނީ ނިންމަވާފަ އެވެ.
ޗިލީގެ ރައީސްކަން ދެ ދައުރު ކުރައްވާފައިވާ ޕިނޭރާ ފުރަތަމަ ވެރިކަން ކުރައްވާފައި ވަނީ 2010 ވަނަ އަހަރުން ފެށިގެން 2014 ވަނަ އަހަރުގެ ނިޔަލަށެވެ. އަދި އޭނާ ވަނީ 2018 އިން ފެށިގެން 2022 ވަނަ އަހަރުގެ ނިޔަލަށް ވެސް އެ ގައުމުގެ ވެރިކަން ކުރައްވާފަ އެވެ.
ކުރިން ސްކޫލް ޓީޗަރަކަށް އުޅުއްވި ޕިނޭރާއަކީ ޗިލީގެ މަޝްހޫރު ވިޔަފާރިވެރިއެކެވެ. މިގޮތުން 1970 އިން ފެށިގެން 1990 ވަނަ އަހަރުގެ ނިޔަލަށް އެކި ވިޔަފާރީގައި ޕިނޭރާ ވަނީ ހަރަކާތްތެރިވެފައިވާރު، ވިޔަފާރިކުރުން ހުއްޓާލީ ވެރިކަމާ ހަވާލުވާން 2009 ވަނަ އަހަރެވެ.
