އެޕަލް ކުންފުނިން ސްމާޓް ހޯމް މާކެޓަށް ވަނުމަށް ފާއިތުވި ދިހަވަރަކަށް އަހަރުގެ ތެރޭގައި ކުރާ އެންމެ ބޮޑު މަސައްކަތުގެ ދަށުން، "ހޯމްވިއު" ނަމަކަށް ކިޔާ އާ އުފެއްދުމެއް އަންގާރަ ދުވަހު ތައާރަފުކޮށްފި އެވެ.
މި އާ އާލާތާއެކު، އެޕަލް އިން އަޕްގްރޭޑްކޮށްފައިވާ "ސިރީ" އާޓިފިޝަލް އިންޓެލިޖެންސް (އޭއައި) އެހީތެރިޔާ ކަސްޓަމަރުންގެ ގޭތެރެއަށް ތައާރަފުވެގެންދާނެ އެވެ. މިއީ އެޕަލްގެ އޭއައި ސިޔާސަތުގެ ދަށުން ނެރުނު ވަރަށް މުހިންމު އުފެއްދުމެކެވެ.
ހަތް އިންޗީގެ ސްކްރީނެއް ހިމެނޭ ހޯމްވިއު ފަރުމާކޮށްފައިވަނީ ސްޕީކަރެއް ހަރުކޮށްފަ އެވެ. މީގެ އިތުރުން، ފާރުގައި ހަރުކުރެވޭނެ ފަދަ މޮޑެލްއެއް ވެސް އެޕަލް އިން ވިއްކާނެ އެވެ.
މިީގެ އަގަކީ 299 ޑޮލަރެވެ. އަންނަ ނޮވެމްބަރު މަހުގެ 13 ވަނަ ދުވަހު ބާޒާރަށް ނެރުމުގެ ކުރިން، މިއަދުން ފެށިގެން ޕްރީ-އޯޑަރު ދިނުމުގެ ފުރުސަތު ވަނީ ހުޅުވާލާފަ އެވެ.
އެޕަލް އިން 2017 ވަނަ އަހަރުން ފެށިގެން "ހޯމްޕޮޑް" ސްމާޓް ސްޕީކަރުތައް ވިއްކަމުން ދިޔަ ނަމަވެސް، އެ އުފެއްދުންތަކަށް އާންމުންގެ މާ ބޮޑު ތަރުހީބެއް ލިބިފައެއް ނުވެ އެވެ. 2010 ގެ އަހަރުތަކުގެ ފަހުކޮޅު އެމެޒޯން އާއި ގޫގުލް އިން ސްމާޓް ސްޕީކަރުގެ މާކެޓް ކޮންޓްރޯލް ކުރުމާ ގުޅިގެން، އައިފޯން އުފައްދާ އެޕަލް ކުންފުންޏަށް ލިބުނީ އެ މާކެޓުގެ ވަރަށް ކުޑަ މިންވަރެކެވެ.
މާކެޓް ދިރާސާކުރާ ކުންފުންޏެއް ކަމަށްވާ އިންޓަނޭޝަނަލް ޑޭޓާ ކޯޕަރޭޝަނުން ބުނާ ގޮތުގައި، 2025 ވަނަ އަހަރު ސްމާޓް ސްޕީކަރު މާކެޓުގެ އެޕަލްގެ ހިއްސާއަކީ އެންމެ 5.2 އިންސައްތަ އެވެ. އޭގެ ބަދަލުގައި އެމެޒޯން އިން 40.9 އިންސައްތަ ހިއްސާކުރާއިރު، ގޫގުލްގެ ހިއްސާއަކީ 29 އިންސައްތަ އެވެ.
ނަމަވެސް، އޭއައި އެސިސްޓެންޓްތަކުގެ މަގުބޫލުކަން އިތުރުވުމާއެކު، ޓެކްނޮލޮޖީގެ ދާއިރާގައި ލިޔުމުގެ ނުވަތަ ސްކްރީނަށް ފިތުމުގެ ބަދަލުގައި އަޑުން އަމުރުކޮށްގެން ބޭނުންކުރެވޭ އާލާތްތައް އުފެއްދުމުގެ ވާދަވެރިކަން ވަނީ ބޮޑުވެފަ އެވެ. ހޯމްވިއު އަކީ ޓަޗްސްކްރީން ހިމެނޭ އާލާތެއް ނަމަވެސް، ފޯނާ ނުކުޅެ ގޭތެރޭގައި ތިބެގެން ސިރީއާ ވާހަކަދައްކާލުމަށް އޮތް ފަސޭހަ މަގެއްގެ ގޮތުގައި އެޕަލް އިން މި އުފެއްދުން އިޝްތިހާރު ކުރެ އެވެ.
ހޯމްވިއު އިން ސިރީ އޭއައި ބޭނުންކުރާއިރު، މީހާގެ މެސެޖުތަކާއި ކަލަންޑަރުގައި ހުންނަ މައުލޫމާތަށް ބަލައި، އެ ވަގުތަކާ ގުޅޭ މައުލޫމާތު ފޯރުކޮށްދޭނެ އެވެ. އަދި ގޭގައި އުޅޭ ހަ މީހެއްގެ މޫނު ވަކިކޮށް ދެނެގަތުމުގެ ގާބިލުކަން މިއަށް ލިބިގެންވާ ކަމަށް އެޕަލް އިން ބުނެ އެވެ. މީގެ އިތުރުން، ހޯމްވިއު މެދުވެރިކޮށް ސިރީއާ ދައްކާ ވާހަކަތައް އެހެން އެޕަލް އާލާތްތަކާ ވެސް ސިންކް ކުރެވޭނެ އެވެ.
އެޕަލް އިން ބުނާ ގޮތުގައި، މީގެ ކެމެރާ އާއި މައިކްރޯފޯނުން ނަގާ މައުލޫމާތުތައް ޕްރޮސެސް ކުރަނީ ސިސްޓަމްގެ އެހެން ބައިތަކާ ވަކިންނެވެ. އެހެންކަމުން، އެ މައުލޫމާތުތަކަށް އެއްވެސް ސޮފްޓްވެއާއަކަށް، އެޕަކަށް، އެޕަލް ކުންފުންޏަށް ނުވަތަ ބޭނުންކުރާ މީހާއަށް ވެސް ވަދެއެއް ނޫޅެވޭނެ އެވެ. މެސެޖުތަކާއި ކަލަންޑަރުގެ މައުލޫމާތު ސްކްރީނުން ފެންނާނީ ވެސް އެ މީހަކީ ކާކުކަން ކަށަވަރުވުމުންނެވެ.
އެޕަލްގެ އާ އޭއައި ސިސްޓަމް މަސައްކަތް ކުރަނީ ހަމައެކަނި އައިފޯން 15 ޕްރޯ އާއި އޭގެ ފަހުގެ ފޯނުތަކުގައި ކަމަށްވާތީ، ސިރީ އޭއައި އާންމުންގެ މެދުގައި މަގުބޫލުކުރުމަށް މިއީ ވަރަށް މުހިންމު އެއްޗަކަށް ވާނެ އެވެ. މީގެ މާނައަކީ އޭއައި ސަޕޯޓް ނުކުރާ ބާ މޮޑެލްގެ އައިފޯން ގެންގުޅޭ އާއިލާގެ މެންބަރުންނަށް ވެސް، މި އާ ސްމާޓް ހޯމް ޑިވައިސް މެދުވެރިކޮށް ސިރީ އޭއައި ތަޖުރިބާކޮށްލެވޭނެ އެވެ.
ސްމާޓް ހޯމް ޑިވައިސް ކޮންޓްރޯލް ކުރުމަށާއި، ފޭސްޓައިމް ކޯލްތައް ކުރުމަށާއި، މިއުޒިކް އަޑުއެހުމުގެ އިތުރުން ޑިޖިޓަލް ފޮޓޯ ފްރޭމެއްގެ ގޮތުގައި ވެސް މީތި ބޭނުންކުރެވޭނެ ކަމަށް އެޕަލް އިން ބުނެ އެވެ. ބޭނުންކުރާ މީހާ ވަކިކޮށް ދެނެގަތުމުގެ ގާބިލުކަން ހުރުމުން، ކުރިމަތީގައި ހުންނަ މީހާއަށް ބަލައި ހޯމް ސްކްރީނުގައި ހުންނަ އެޕްތަކާއި ވިޖެޓްތައް ބަދަލުވާނެ އެވެ. އެޕަލް ވޮޗް ފަދައިން، ހޯމްވިއު ގައި ވެސް ކަލަންޑަރާއި، ފޮޓޯ އަދި މޫސުމާ ބެހޭ މައުލޫމާތު ފެންނާނެ ގޮތްތައް ބޭނުންކުރާ މީހާގެ އިހުތިޔާރަށް ބަދަލުކުރެވޭނެ އެވެ.
ހޯމްވިއު އަކީ އެޕަލްގެ އާ ސީއީއޯ ޖޯން ޓާނަސްގެ ދަށުން ނެރުނު އާ އުފެއްދުންތަކުގެ ތެރެއިން އެކައްޗެވެ. މީގެ ކުރިން މިދިޔަ މަހު އެޕަލް އިން ވަނީ އެ ކުންފުނީގެ ފުރަތަމަ ފޯލްޑަބަލް އައިފޯން ވެސް ދައްކާލާފަ އެވެ.
މީގެ އިތުރުން، އެޕަލް އިން ވަނީ ހޯމްޕޮޑް މިނީގެ އާ މޮޑެލްއަކާއި، ސިރީ އޭއައި ހިމެނޭ އެޕަލް ޓީވީ 4ކޭ އެއްގެ އިތުރުން، އެލްޖީ އަދި ޝްނައިޑާ އިލެކްޓްރިކްއާ ގުޅިގެން އުފައްދާފައިވާ ސްމާޓް ހޯމް އާލާތްތަކެއް ވެސް އަންގާރަ ދުވަހު އިއުލާންކޮށްފަ އެވެ.
