އިދިކޮޅު މަޖިލިސް މެމްބަރުން ބޭރުކޮށް، ސެނަގާލްގެ ރިޔާސީ އިންތިހާބު ޑިސެމްބަރު 15 ވަނަ ދުވަހަށް ފަސްކުރަން އެ ގައުމުގެ ގާނޫނު ހަދާ މަޖިލީހުން ފާސްކޮށްފި އެވެ.
މިދިޔަ ހޮނިހިރު ދުވަހު ސެނެގާލްގެ ރައީސް މެކީ ސަލް ވަނީ ފެބްރުއަރީ 10، ގައި ބޭއްވުމަށް ހަމަޖެހިފައިވާ ރިޔާސީ އިންތިހާބު ފެބްރުއަރީ 25، އަށް ފަސްކޮށްފަ އެވެ. މިއާއެކު، އިންތިހާބުގައި ވާދަކުރާ އިދިކޮޅު 19 ކެންޑިޑޭޓުން ވަނީ މަގުތަކަށް ނިކުމެ އިހުތިޖާޖު ކޮށްފަ އެވެ.
ނަމަވެސް އިއްޔެ ކުރިޔަށް ގެންދިޔަ ސެނަގާލްގެ ގާނޫނު ހަދާ މަޖިލީހުގައި ތިއްބަވާ ސަރުކާރަށް ތާއިދު ކުރައްވާ މެމްބަރުން ވަނީ ރިޔާސީ އިންތިހާބު ޑިސެމްބަރު 15 އަށް ފަސްކުރަން ފާސްކޮށްފަ އެވެ. އެއީ މަޖިލީހުގައި ތިއްބަވާ 165 މެމްބަރުންގެ ތެރެއިން 105 މެމްބަރުންގެ ވޯޓާ އެކީގަ އެވެ.
ސެނެގާލްގެ ރައީސް ސަލްގެ ދެވަނަ ދައުރު އަންނަ އެޕްރީލް 2، ވަނަ ދުވަހު ހަމަވާއިރު، އެމަނިކުފާނު ކުރިން ވިދާޅުވީ ދައުރު ދިގު ކުރުމަށް މަސައްކަތް ނުކުރައްވާނެ ކަމަށެވެ. އެ ގައުމުގެ ގާނޫނު ބުނާ ގޮތުން ރައީސަކަށް އެންމެ ގިނަވެގެން ވެރިކަން ކުރެއްވޭނީ ޖެހިޖެހިގެން ދެ ދައުރެވެ.
ގާނޫނު ހަދާ މަޖިލީހުގެ އިދިކޮޅު މެމްބަރުން ބުނާ ގޮތުގައި ރައީސް ސަލް އުޅުއްވަނީ ގަދަބާރުން ވެރިކަމުގައި ހުންނަވާށެވެ. އަދި އިންތިހާބު ފަސްކުރުމަކީ ޑިމޮކްރަސީއަށް ދެވޭ ހަމަލާއެއް ކަމަށްވެސް މެމްބަރުން ވަނީ ބުނެފަ އެވެ.
ރިޔާސީ އިންތިހާބުގައި ވާދަކުރައްވާ 20 ކެންޑިޑޭޓަކު ވަނީ އިންތިހާބު ފަސްކުރުމުން ކޯޓަށް މައްސަލަ ހުށަހަޅާފައިވާއިރު، ބައިނަލްއަގުވާމީ ޖަމިއްޔާތަކުން ވަނީ ސެނަގާލްގައި ހިނގަމުން އަންނަ ކަންތައްތަކާ ގުޅިގެން ކަންބޮޑުވުން ފާޅު ކޮށްފަ އެވެ.
