ޕާކިސްތާނުގެ ޑޭރާ އިސްމާއިލް ހާން ޑިސްޓްރިކްޓުގެ ޕޮލިސް ސްޓޭޝަނަކަށް ހަމަލާދީ 10 ފުލުހުން މަރާލައިފި އެވެ.
ބަރު ހަތިޔާރު ބޭނުންކޮށްގެން ގްރޫޕަކުން ދިން މި ހަމަލާގައި ހަ މީހަކު ޒަހަމްވެފައިވާ ކަމަށް ޕާކިސްތާން ފުލުހުން ބުނެފައިވާއިރު، މުޅި ސަރަހައްދު ބަންދުކޮށް ހަމަލާ ދިން މީހުން ހޯދުމުގެ މަސައްކަތް ވަނީ ފަށާފަ އެވެ.
މި ހަމަލާ ދިން ކަމުގެ ޒިންމާ ޕާކިސްތާނުގެ ތާލިބާން ގްރޫޕް (ޓީޓީޕީ) ގެ ގޮތްޕެއް ކަމަށްވާ ޓީޕީޖޭއިން ވަނީ ނަގާފަ އެވެ. ޓީޓީޕީއަކީ 2007 ވަނަ އަހަރު ޕާކިސްތާނުގައި އުފެދުނު ދީނީ ގޮތުން ހައްދު ފަހަނަ އަޅާފައިވާ ހަރުކަށި ތަކްފީރީ ވިސްނުމުގެ ހަނގުރާމަވެރި ޖަމާއަތެކެވެ.
ޕާކިސްތާނުގެ އާންމު އިންތިހާބާ ދިމާކޮށް އެ ގައުމުގައި ބޮޑެތި ހަމަނުޖެހުން ހިނގަމުން އެބަދެ އެވެ. މި ހަމަނުޖެހުންތަކުގެ ތެރެއިން އިންތިހާބުގައި ވާދަކުރައްވާ އިދިކޮޅު ކެންޑިޑޭޓެއް ކަމަށްވާ ރީހާން ޒައިބް ހާން ކެމްޕޭނުގައި އުޅުއްވަނިކޮށް ބަޑިން ހަމަލާދީ މަރާލާފައިވެ އެވެ.
މިދިޔަ މަހު ޕިޝާވަރުގައި ދިން ޖާނުންފިދާވުމުގެ ހަމަލާއެއްގައި 101 މީހަކު މަރާލާފައިވެ އެވެ. އަދި މިދިޔަ އަހަރުގެ ޑިސެމްބަރު މަހު ތަހުސިލް ޑިސްޓްރިކްޓަށް ދިން ޖާނުންފިދާވުމުގެ ހަމަލާއެއްގައި 23 ސިފައިންގެ މީހަކު މަރުވެފައިވާއިރު، އެ ހަމަލާގެ ޒިންމާ ނެގީ ޓީޕީޖޭއިންނެވެ.
ޕާކިސްތާނުގެ އާންމު އިންތިހާބު އަންނަ ބުރާސްފަތި ދުވަހު ބޭއްވުމަށް ހަމަޖެހިފައިވާއިރު، އިންތިހާބުގައި 128 މިލިއަން މީހުންނަށް ވޯޓު ލުމުގެ ހައްގު ލިބިފައިވެ އެވެ.
