ރާއްޖޭގެ ކުޅިވަރަށް ދިމާވެފައިވާ މައްސަލަތަކުން ހައްލެއް ހޯދައިދޭން އެހީތެރިވުން މުހިންމު ކަމަށާއި ފުޓްބޯޅަ އަށް ބަލާއިރު މިހާރު މި އޮތީ ދުވަހަކު ނުދާހާ ދަށަށް ރާއްޖެ ގޮސްފައި ކަމަށް ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ވިދާޅުވެއްޖެ އެވެ
ރައީސް މި ގޮތަށް ވިދާޅުވީ، ރިޔާސީ ބަޔާނުގައި، ރާއްޖޭގެ ކުޅިވަރު ހާލަތަށް އަލި އަޅުވާލައި، ކުޅިވަރުގެ ކަންކަމުގައި ސަރުކާރުން ކުރަން ނިންމާފައިވާ ކަންކަމާ ގުޅޭ ގޮތުން ވާހަކަ ދެއްކެވިއިރު އެވެ.
"ތަފާތު އެކި ކުޅިވަރުތައް ކުޅޭ ދިވެހި ހުނަރުވެރި ގިނަ އެތުލީޓުން މިއަދު ތިބީ މާޔޫސްކަމުގައި. ހަމައެކަނި ދިވެހީން އެންމެ ލޯބިވާ ފުޓްބޯޅައަށް ނަޒަރު ހިންގައިލާއިރު ވެސް، ސަރަޙައްދީ މުބާރާތެއްގައި ދުވަހަކު ރާއްޖެ ނުދާހާ ދަށަށް އަޅުގަނޑުމެން ހިނގައްޖެ. ކުޅުންތެރީންނަށް އިތުރު ތަމްރީނާ، އާމްދަނީގެ މަގުތައް ވެސް ހުރީ ބަންދުވެފައި. މިއީ ހިތާމަހުރިކަމެއް،" މުއިއްޒު ވިދާޅުވި އެވެ.
ރާއްޖޭގެ ފުޓްބޯޅަ އެސޯސިއޭޝަން، އެފްއޭއެމްގެ ގިނަ މައްސަލަތަކެއް މިހާރު ކުރިއަށްދާއިރު، އެފްއޭއެމްގެ ރައީސް ބައްސާމް އަދީލް ޖަލީލްގެ މައްޗަށް މަނީ ލޯންޑަރިންނާއި ހިޔާނާތުގެ ދައުވާ ވަނީ އުފުލައިފަ އެވެ. އަދި ފީފާ އާއި އޭއެފްސީން އޮތީ އެފްއޭއެމް އިން އެންމެ ފަހުން، ބާއްވަން އުޅުނު އިންތިހާބު ކަންކަން ހުއްޓުވައިފަ އެވެ.
މި އަހަރު ކުޅިވަރު އެސޯސިއޭޝަންތަކަށް ކުރިއެރުން ލިބޭނެ މަގުތައް ސަރުކާރުން ފަހިކޮށްދޭނެ ކަމަށް ރައީސް ވިދާޅުވި އެވެ.
ކުޅިވަރުގެ ކުރިއެރުމަށް ބަލައި، ރާއްޖޭގެ ބިމުގެ ޖާގައަށް ބަލާއިރު، ފަންގިފިލާތަކަށް މަތިމައްޗަށް ހެދިފައިވާ ކުޅިވަރުކުޅޭ ތަންތަން ގާއިމްކުރަންޖެހޭ ކަމަށް ރައީސް ވިދާޅުވެފައިވެ އެެވެ. އެ ގޮތުން ފުރަތަމަ ފަހަރަށް މަލްޓިސްޓޯރީ "ފުޓްސަލް ކޮމްޕްލެކްސް" އާއި "ނެޓްބޯޅަ ކޮމްޕްލެކްސް" އެއް އެޅުމަށް ހުޅުމާލެއިން 2 ބިން މިހާރުވަނީ ކަނޑައެޅިފައިވާ ކަމަށް ރައީސް ވިދާޅުވި އެވެ.
"ކުޅިވަރުގެ ބޮޑެތި ކްލަބްތައް މާލީ އަނދަވަޅުތަކުން ސަލާމަތްކޮށް، ކުރިއަރާނެ ގޮތްތައް ފަހިކުރަން އެބަޖެހޭ. އަދި ކުޅުންތެރިންނަށް ތަމްރީނާ އާމުދަނީގެ ފުރުސަތު އިތުރުކުރަން ޖެހޭ. މި ހުރިހާ ކަމެއްގައި ވެސް ދިވެހި ހުރިހާ އެތުލީޓުންނާއި ކުޅުންތެރިންގެ އަޑުއަހައިގެން، ކުޅިވަރު ކުރިއެރުވުމަށް ސަރުކާރުން ފުރިހަމަ އެއްބާރުލުން ދޭނެކަމުގެ ޔަގީންކަން އަޅުގަނޑު އަރުވަން،" ރައީސް ވިދާޅުވި އެވެ.
މި ސަރުކާރުން ވަނީ ކުޅިވަރަށް ހާއްސަ މިނިސްޓްރީއެއް އުފައްދައިފަ އެވެ. އެއީ ކުޅިވަރަށް ހުރި ފުރުސަތުތަކަށް ވަކިން އަހައްމިއްޔަތުކަން ދީގެން ކަންކަން ކުރުމަށް ކަމަށް ރައީސް ވިދާޅުވި އެވެ.
އެ ގޮތުން، ގައުމީ ކުޅުންތެރިންގެ ފެންވަރު ރަނގަޅުކޮށް ކުރިއެރުވުމަށް ބޭނުންވާ "ހައި ޕާފޯމަންސް ސެންޓަރު"ގެ މަސައްކަތް ފަށަން ނިންމާފައިވާ ކަމަށް ރައީސް އިއުލާނުކުރެއްވި އެވެ.
މީގެ އިތުރުން، ކުޅިވަރާއި ކަސްރަތުގެ މުހިންމު ކަމާއި ގުޅޭގޮތުން ސްކޫލު ކުދިންނާއި އާންމު ރައްޔިތުން ހޭލުންތެރި ކުރުމަށް ރާއްޖޭގެ ހުރިހާ ރަށެއްގައި ޕްރޮގްރާމު ހިންގުމަށް ހަަމަޖެހިފައިވެ އެވެ. އަދި ސްޕޯޓްސް ސައިކޮލޮޖީ، ސްޕޯޓްސް ނިއުޓްރިޝަން އަދި ކުޅިވަރުގެ ރިވެތި އަހުލާގާ ގުޅޭގޮތުން ކުޅުންތެރިންނަށް މަޢުލޫމާތު ދީ ހޭލުންތެރިކުރުމުގެ ޕްރޮގްރާމު ފެށުމަށް ވަނީ ހަމަޖެހިފަ އެވެ.
އަދި ދާދި ފަހުން އަމަލުކުރަން ފެށި، ރާއްޖޭގައި ރާވައި ހިންގާ ކުޅިވަރު މުބާރާތްތަކުގައި ފުރިހަމަކުރަންޖެހޭ "މިނިމަމް މެޑިކަލް ރިކުއަމަންޓް" އާބެހޭ އުސޫލު ތައްޔާރުކޮށް، އެ ހިދުމަތް އަތޮޅު ތެރޭގަޔާއި މާލޭގައި ބާއްވާ މުބާރާތްތަކުގައި ލިބޭ ގޮތް ހަމަޖައްސައިދޭނެ ކަމަށް ރައީސް ފާހަގަކުރެއްވި އެވެ.
"ދުނިޔެ އަށް އަންނަ ބަދަލުތަކާ އެކު، ދިވެހި ޒުވާނުންގެ ޝައުގު އިތުރުވަމުންދާ، ރޭސިން، ސާފިން މޫދުކުޅިވަރު، އީ-ގޭމިން ފަދަ ކަންކަން ރާއްޖޭގައި ކުރިއަރުވާން ސަރުކާރުން އިރާދަކުރެއްވިއްޔާ މަސައްކަތް ފަށާނަން،" ރައީސް ވިދާޅުވި އެވެ.
ރާއްޖޭގެ ހުރިހާ ދާއިރާއެއްގައި ވެސް ދެ ޖިންސުގެ ހަމަހަމަ ފުރުސަތުތައް ބޭއްވުމަށް ހާއްސަ އަހައްމިއްޔަތު ކަމެއް ދޭނެ ކަމަށް ރައީސް ވަނީ ވިދާޅުވެފަ އެވެ.
