ލަންޑަން (ފެބްރުއަރީ 5) - އިނގިރޭސި ޕްރިމިއާ ލީގުގައި ރޭ އާސެނަލުން 3-1 އިން ލިވަޕޫލް ބަލިކުރިއިރު، ވެސްޓް ހޭމް ޔުނައިޓެޑް އަތުން 3-0 އިން މެެންޗެސްޓާ ޔުނައިޓެޑް މޮޅުވެ، ޗެލްސީ އަމިއްލަ ދަނޑުގައި 4-2 އިން ވުލްވްސް އަތްދަށުވެ، ހާސްކަމާ ކުރިމަތިލާން ޖެހިއްޖެ އެވެ.
ރޭގެ މޮޅާ އެކު އާސެނަލް ވަނީ ލީގުގެ އެއް ވަނައިގައި އޮތް ލިވަޕޫލާ ދެ ޕޮއިންޓަށް ގާތަށް ޖެހިލައިފަ އެވެ. ލިވަޕޫލަށް 23 މެޗުން 51 ޕޮއިންޓް ލިބިފައިވާއިރު، އާސެނަލް ދެ ވަނައިގައި އޮތީ 23 މެޗުން 49 ޕޮއިންޓާ އެކު އެވެ. ތިން ވަނައިގައި އޮތް މެންޗެސްޓާ ސިޓީ އަށް 21 މެޗުން 46 ޕޮއިންޓް ލިބިފައިވާއިރު، މެޗު ހަމަކޮށް އެއް ވަނަ އަށް އެރުމުގެ ފުރުސަތު އެ ޓީމަށް އެބައޮތެވެ.
އާސެނަލުން ރޭ އަމިއްލަ ދަނޑުގައި ލީޑުނެގީ، 14 ވަނަ މިނިޓްގައި ރީބައުންސަކުން ބުކާޔޯ ސަކާ ޖެހި ގޯލުންނެވެ. ފުރަތަމަ ހާފުގެ އިތުރު ވަގުތުގައި ލިވަޕޫލުން އެއްވަރުކުރީ ލުއިޒް ޑިއާޒް ކުރި އެޓޭކެއްގައި އާސެނަލްގެ ގަބްރިއެލް މަގާޅައެސް އަތުން ބައިކޮޅަށް ވަން ގޯލުންނެވެ.
ދެ ވަނަ ހާފުގެ ކުރީކޮޅުގައި ލިވަޕޫލްގެ ކާޓިން ޖޯންސް އެ ޓީމަށް ލީޑުނަގައިދޭން ރަނގަޅު ހަމާލާއެއް ފޮނުވާލި އެވެ. އާސެނަލުން އަލުން ލީޑުނެގީ މެޗުގެ 67 ވަނަ މިނިޓްގައި ގަބްރިއެލް މާޓިނެލީ ޖެހި ލަނޑުންނެވެ. މިއީ ލިވަޕޫލްގެ ކެޕްޓަން، ވާޖިލް ވެން ޑައިކް އާއި ގޯލްކީޕަރު އެލިސަން ބެކާ ހެދި ގޯހެއްގެ ފައިދާނަގައި، މާޓިނެލީ ޖެހި ލަނޑެކެވެ.
މެޗުގެ 88 ވަނަ މިނިޓްގައި ލިވަޕޫލްގެ އިބްރާހިމް ކޮނާޓޭ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކިއިރު، އިތުރު ވަގުުތުގެ ތިން ވަނަ މިނިޓްގައި އާސެނަލުން ވަނީ ތިން ވަނަ ލަނޑެއް ޖަހައިފަ އެވެ. މި ލަނޑު ޖެހީ ބަދަލަކަށް ކުޅެން އެރި ލެއަންޑްރޯ ޓްރޮސާޑް އެވެ.
ވެސްޓް ހޭމް ކޮޅަށް ރޭ ޔުނައިޓެޑުން މޮޅުވިއިރު، ލަނޑުތައް ޖެހީ އަލެހަންދްރޯ ގާނާޗޯ ދެ ގޯލާއި ރަސްމުސް ހޮއިލުންޑް އެވެ. ޔުނައިޓެޑް ވަނީ މި މޮޅާ އެކު، 23 މެޗުން 38 ޕޮއިންޓް ހަމަކޮށް ލީގުގެ ހަ ވަނަ އަށް ޖެހިލައިފަ އެވެ.
އަމިއްލަ ދަނޑުގައި ރޭ ކުޅުނު ޗެލްސީން ވަނީ ކޯލް ޕާމާގެ ގޯލުން ލީޑުނަގައިފަ އެވެ. ވުލްވްސްގެ ފޯވާޑް، . މަތެއުސް ކޫންޏާ ހެޓްރިކެއް ހެދި މި މެޗުގައި އެ ޓީމުން ޖެހި އަނެއް ލަނޑަކީ، ޗެލްސީގެ އަލެކްސް ޑިސާސީ އަތުން ބައިކޮޅަށް ވަން ގޯލެކެވެ. ޗެލްސީގެ ފަހު ލަނޑު ޖެހީ ތިއާގޯ ސިލްވާ އެެވެ.
މި މޮޅާ އެކު، ވުލްވްސް އިން ވަނީ ލީގު ތާވަލުގައި ވެސް ޗެލްސީ ފަހަތަށް ޖައްސާލައިފަ އެވެ. ވުލްވްސް 10 ވަނައިގައި އޮތީ 23 މެޗުން 32 ޕޮއިންޓާ އެކު އެވެ. ޗެލްސީ 11 ގައި އޮތީ 23 މެޗުން 31 ޕޮއިންޓް ހޯދައިގެންނެވެ.
