ބާމިންހަމް (ފެބްރުއަރީ 2) - އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑުން ފަހު ވަގުތު ގޯލު ޖަހައި، 4-3 އިން ވުލްވްސް އަތުން މޮޅުވެއްޖެ އެވެ.
މި މޮޅާ އެކު ޔުނައިޓެޑް ވަނީ ލީގުގެ ހަތް ވަނަ އަށް ޖެހިލައިފަ އެވެ. އެއީ، 22 މެޗުން 35 ޕޮއިންޓް ހޯދައިގެންނެވެ. ހަތަރު ވަނައިގައި އޮތް ޓޮޓެންހަމާއި ޔުނައިޓެޑާ ދެމެދު އަށް ޕޮއިންޓުގެ ފަރަގެއް އެބައޮތެވެ. ޓޮޓެންހަމް އަށް ވަނީ 22 މެޗުން 43 ޕޮއިންޓް ލިބިފަ އެވެ.
ވުލްވްސްގެ މޮލިނެއުކްސް ސްޓޭޑިއަމްގައި ޔުނައިޓެޑުން ވަނީ 22 މިނިޓް ތެރޭ ދެ ގޯލު ޖަހައިފަ އެވެ. އެ ޓީމަށް ލީޑުނަގައިދިނީ ރަސްމުސް ހޮއިލުންޑް ދިން ބޯޅައަކުން މެޗުގެ ފަސް ވަނަ މިނިޓްގައި މާކަސް ރެޝްފޯޑް އެވެ. މިއީ އަހުލާގީ މައްސަލައެއްގައި ޓީމުން ބާކީކުރުމަށް ފަހު، ރެޝްފޯޑަށް އަލުން ޓީމުން ފުރުސަތު ދިން މެޗެވެ. މެޗުގެ 22 ވަނަ މިނިޓްގައި ޔުނައިޓެޑްގެ ދެ ވަނަ ގޯލު ޖެހީ ހޮއިލުންޑް އެވެ.
މެޗުގެ 75 ވަަނަ މިނިޓްގައި ޔުނައިޓެޑްގެ ސްކޮޓް މެކްޓޮމިނޭ، އެ ޓީމުގެ ތިން ވަނަ ގޯލު ޖެހީ، އޭގެ ހަތަރު މިނިޓް ކުރިން ވުލްވްސްގެ ޕަބްލޯ ސަރަބިއާ އެ ޓީމަށް ފުރަތަމަ ގޯލު ޖަހައިދީ އުންމީދެއް ހޯދައިދީފައިވަނިކޮށެވެ.
ވުލްވްސް އިން ވަނީ މެޗުގެ 85 ވަނަ މިނިޓްގައި މެކްސް ކިލްމަން ޖެހި ގޯލާއި އިތުރު ވަގުތުގެ ފަސް ވަނަ މިނިޓްގައި ޕެޑްރޯ ނެޓޯ ޖެހި ލަނޑުން އެއްވަރުކޮށްފަ އެވެ. ނެޓޯ އެ ޓީމަށް އެއްވަރުކޮށްދިންތާ ދެ މިނިޓް ފަހުން، ޔުނައިޓެޑް މޮޅުކޮށްދިން ލަނޑު ޖެހީ، 18 އަހަރުގެ މިޑްފީލްޑަރު ކޯބީ މައިނޫ އެވެ.
މި މެޗުގައި ޔުނައިޓެޑްގެ ގޯލު ބެލެހެއްޓީ، އެފްރިކަން ކަޕް އޮފް ނޭޝަންސް އަށް ދިއުމަށް ފަހު ކްލަބަށް އެނބުރި އައި ކެމަރޫންގެ ކީޕަރު އަންދްރޭ އޮނާނާ އެވެ.
ލީގުގައި ރޭ ވެސްޓް ހޭމް އާއި ބޯންމައުތު ކުޅުނު މެޗު ވަނީ 1-1 އިން އެއްވަރުވެފަ އެވެ. ބޯންމައުތުގެ ޑޮމިނިކް ސޮލާންކޭ އެ ޓީމަށް ލީޑުނަގައިދިން މި މެޗުގައި، ވެސްޓް ހޭމް އަށް އެއްވަރުކޮށްދިނީ ޕެނަލްްޓީ އަކުން ޖޭމްސް ވޯޑް-ޕްރައުސް އެވެ.
ހަ ވަނައިގައި އޮތް ވެސްޓް ހޭމް އަށް 22 މެޗުން ވަނީ 36 ޕޮއިންޓް ލިބިފަ އެވެ.
