ގައުމީ ބާސްކެޓްބޯޅަ ލީގުގެ ފިރިހެން ޑިވިޝަނުގައި ރޭ ކުޅުނު މެޗުން، ކިންގްސް ބާސްކެޓްބޯލް ކްލަބްގެ މައްޗަށް ކުރިހޯދައި، ޓީރެކްސް ބާސްކެޓްބޯލް ކްލަބުން ލީގުގެ ރޭހުގައި ކުރިހޯދައިފި އެވެ.
ޓީރެކްސް އިން މި ވަނީ ލީގުގައި ކުޅުނު ތިން މެޗުން ވެސް މޮޅުވެ، އެ ޓީމުގެ ސައްތަ އިން ސައްތަ ރެކޯޑް ދަމަހައްޓައިފަ އެވެ. ލީގު ޗެމްޕިއަންކަން ކަނޑައެޅޭ ކުރިމަތިލުމެއްގެ ގޮތުގައި ބެލެވޭ މެޗުން ރޭ ކިންގްސްގެ މައްޗަށް ޓީރެކްސް އިން ކުރިހޯދީ 79-61 އިންްނެވެ.
ރޭ ކުޅުނު ދެ ވަނަ މެޗުން، ރެޕްޓާސް ބާސްކެޓްބޯލް ކްލަބުން ވަނީ 97-27 އިން ސްޓިންގާސް ބާސްކެޓްބޯލް ކްލަބް ބަލިކޮށްފަ އެވެ.
ޒުވާނުންގެ މަރުކަޒު އެތެެރެ ކޯޓުގައި ރޭ ކުޅުނު މެޗުގެ ފުރަތަމަ ކުއާޓަރު ވާންކޮށް ދިޔައިރު، ދެ ވަނަ ކުއާޓަރުގައި ޓީރެކްސް އިން ވަނީ ޓީމުގައި ހިމެނޭ ތަޖުރިބާކާރު ކުޅުންތެރިންގެ ބޭނުން ވަރަށް ރަނގަޅަށް ހިފައި ފަރަގުބޮޑުކޮށްފަ އެވެ. އެ ގޮތުން، ދެ ވަނަ ކުއާޓަރުގެ އެކަނި ސްކޯ އަށް ބަލާއިރު، ޓީރެކްސް އިން ވަނީ ނުވަ ޕޮއިންޓުގެ ފަރަގެއް ބާއްވައިފަ އެވެ. ތިން ވަނަ ކުއާޓަރުގައި ވެސް އެ ފޯމުގައި ޓީރެކްސް ދެމެހެއްޓި އެެވެ.
ފަހު ކުއާޓަރުގައި ޓީރެކްސް އަތުގައި ރަނގަޅު ލީޑެއް އޮތުމުން، މެޗު ނިމެން ދިޔައިރު، އެ ޓީމުން ގޭމް މެނޭޖްކުރުމުގެ ވިސްނުމުގައި ކުޅުނުއިރު، ކިންގްސް އިން ވަނީ ޕޮއިންޓްތަކެއް ސްކޯކޮށްފަ އެވެ.
ރޭގެ މެޗުގެ ތެރެއިން ޓީރެކްސްގެ ޒަބީ އާއި ކެޕްޓަން ވިލްދާން.--- ފޮޓޯ: މުހައްމަދު ޝާބިން/ ސިޑިބަރި/ ބާސްކެޓު
މެޗުގެ ޕޮއިންޓް ސްކޯރިން އަށް ބަލާއިރު، އެންމެ ރަނގަޅީ، ޓީރެކްސްގެ އަހުމަދު ފިރާޝް އެވެ. އޭނާ ވަނީ 22 ޕޮއިންޓް އެއްކޮށްފަ އެވެ. އެ ޓީމުގެ ކެޕްޓަން، އިސްމާއިލް ވިލްދާން ވަނީ 11 ޕޮއިންޓް ސްކޯކޮށްފަ އެވެ. މެޗުގެ މުހިންމު ވަގުތުތަކުގައި ޓީރެކްސްގެ މުހައްމަދު ހުވައިލިދު އަލީ (ހުވޭ)، އަހުމަދު ޒަބީރު (ޒަބީ) އާއި ޒަކަރިއްޔާ އަބްދުލް ލަތީފް (ޒަކިއްޓެ) އާއި މުހައްމަދު ސަމޫހު ވެސް ރަނގަޅު ޕޮއިންޓުތަކެއް ހޯދި އެވެ. މީގެ ތެރެއިން ހުވޭ 12 ޕޮއިންޓް ހޯދިއިރު، ސަމޫހު ވަނީ 11 ޕޮއިންޓް ސްކޯކޮށްފަ އެވެ.
ކިންގްސް އަށް ބަލާއިރު، ޓީމުގެ ކެޕްޓަން، އަބްދުﷲ އަމްޒަރު މުހައްމަދު ވަނީ 12 ޕޮއިންޓް ސްކޯކޮށްފަ އެވެ. އަދި ހަމަ އެ އަދަދަށް އެ ޓީމުގެ، އިބްރާހިމް ނަސީމް ވެސް ޕޮއިންޓް ސްކޯކުރި އެވެ.
ލީގުގައި މިރޭ ފުރަތަމަ އޮތީ ފިރިހެން ޑިވިޝަނުގައި ރޯޔަލް ބާސްކެޓްބޯލް ކްލަބް އާއި ރެޑްވިންގްސް ބާސްކެޓްބޯލް ކްލަބް ކުޅޭ މެޗެވެ.
މިރޭ، ދެން ކުޅޭނީ، އަންހެން ޑިވިޝަނުގެ ކުރީގައި އޮތް ކުއީންސް ބާސްކެޓްބޯލް ކްލަބް އާއި ލަޔަނެސް ސްޕޯޓްސް ކްލަބް އެވެ. ފުރަތަމަ މެޗު ހަތެއް ޖަހާއިރު ފަށާއިރު، ދެ ވަނަ މެޗު ފަށާނީ 21:30 ގަ އެވެ.
