ރާއްޖޭގެ ކުޅިވަރު އެސޯސިއޭޝަންތަކާއި ކްލަބްތައް އަދި ވަކިވަކި އެތުލީޓުންނަށް ވެސް ޗައިނާގެ އެހީތެރިކަން ލިބިގެންދާނެ އެއްބަސްވުމެއް ގާއިމްކުރެވިފައިވާ ކަމަށް ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ވިދާޅުވެއްޖެ އެވެ.
ޗައިނާ އަށް ކުރެއްވި ދަތުރުފުޅަށް ފަހު، އިއްޔެ، ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ވާހަކަފުޅު ދައްކަވަމުން، ރައީސް ވިދާޅުވީ، ކުޅިވަރުގެ ދާއިރާއިން ޗައިނާ އިން ރާއްޖެ އަށް އެހީވާން ނިންމާފައިވާ ކަމަށެވެ.
"ރާއްޖޭގެ އެކިއެކި ކުޅިވަރު އެސޯސިއޭޝަންސްތަކަށް އެހީތެރިކަން ސީދާ ދިނުމަށް، އަދި ވަކިވަކި އެތުލީޓުން ޓްރެއިން ކުރުމަށްޓަކައި، އެކި ކަހަލަ ފުރުސަތުތައް ދިނުމަށް، ކްލަބްތައް ތަރައްގީ ކުރުމަށް، ކްލަބްތަކުން ފަރިތަކޮށް އިންޓަނޭޝަނަލް ފެންވަރުގެ މެޑަލްތައް ހޯދޭ ފެންވަރަށް ޗައިނާ އަށް ގޮސް ތަމްރީން ދިނުމާ ބެހޭ ހުރިހާ މަސައްކަތްތަކެއް ކުރުމަށް ޗައިނާ އިން ހުށަހަޅައި އެކަމަށް އަޅުގަނޑުމެން އެއްބަސްވިން،" ރައީސް ވިދާޅުވި އެވެ.
ވޭތުވެދިޔަ ސަރުކާރުގައި، އިންޑިއާއާ އެކު، ސިޔާސީ ގުޅުން ވަރުގަދަކުރިއިރު، ރާއްޖޭގެ ކުޅިވަރު އެތުލީޓުންނާއި ޓީމުތަކަށް ވަނީ އިންޑިއާ އިން އެކި ފުރުސަތުތައް ފަހިކޮށްދީފަ އެވެ. އޭގެ ތެރެއިން ތަނަވަސްވި ފުރުސަތުތަކުގައި، މުބާރާތްތަކާ ދިމާކޮށް އެކިއެކި ކުޅިވަރުތަކުގެ ގައުމީ ޓީމުތަކުގެ ޓްރެއިނިން އާއި އިންޑިވިޖުއަލް އެތުލީޓުންގެ ދިގު ޓްރެއިނިން ކޭމްޕްގެ ފުރުސަތުތައް ހިމެނެ އެވެ.
ރައީސް މުއިއްޒުގެ ސަރުކާރުން، ޗައިނާއާ އެކު، އެކި ރޮނގުރޮނގުން، ގުޅުން ބަދަހިކޮށް، އެއްބަސްވުންތައް ވަނީ ގާއިމްކޮށްފަ އެވެ. އެ ގޮތުން، ކުޅިވަރުން ވެސް ރާއްޖެ އަށް މަންފާ ކުރާނެ ކަމަށް އެއްބަސްވުމެއް ހެދިފައިވާ ކަމަށް ވިދާޅުވެފައިވާއިރު، މީގެ ސަބަބުން ރާއްޖޭގެ ކުޅިވަރު ކުރިއެރުވުމަށް ގިނަ ފުރުސަތުތަކެއް ފަހިވެގެންދާނެ ކަމަށް ކުޅިވަރުގެ އެކި ފަރާތްތަކުން ފާހަގަކުރެ އެެވެ. އެއީ، ވަސީލަތްތަކަށް ބަލާއިރު، ޗައިނާ އަކީ އޭޝިއާ ސަރަހައްދުގައި އެންމެ ކުރިއަރާފައިވާ އެއް ގައުމެވެ އަދި މިދިޔަ އަހަރު އޭޝިއަން ގޭމްސް ވެސް ހޯސްޓްކޮށްފައިވަނީ އެ ގައުމުންނެވެ.
