ނިއު ދިއްލީ، އިންޑިއާ (ޖެނުއަރީ 7) - މި އަހަރު ބާއްވާ އައިސީސީ ޓީ20 ކްރިކެޓް ވޯލްޑް ކަޕްގެ ކުރިން، ވިރާތު ކޯލީ އާއި ރޯހިތު ޝަރްމާ އަލުން، އިންޑިއާގެ ޓީ20 ގައުމީ ސްކޮޑާ ގުޅޭނެ ކަމަށް ބެލެވިއްޖެ އެވެ.
ވެސްޓް އިންޑީސް އާއި އެމެރިކާގައި، އައިސީސީ ޓީ20 ކްރިކެޓް ވޯލްޑް ކަޕް އޮތީ މި އަހަރު ޖޫން 1-29 އަށެވެ. އިންޑިއާ ހިމެނެނީ، ޕާކިސްތާން، އަޔަލެންޑް، އެމެރިކާ އަދި ކެނަޑާއާ އެއް ގްރޫޕެއްގަ އެވެ.
އިންޑިއާ އިން ޓީ20 ކްރިކެޓް ވޯލްޑް ކަޕްގެ ތައްޔާރީތައް ފަށައިގެން ކުރިއަށްދާއިރު، އަފްގާނިސްތާނާ އެކު ވަރަށް އަވަހަށް ޓީ20 ސީރީސެއްގައި ވާދަކުރާނެ އެވެ. އެ ސީރީސްގައި ވާދަކުރަން ނަގާ ސްކޮޑު އަދި ރަސްމީކޮށް އިއުލާނުކޮށްފައެއް ނުވެ އެވެ.
އިންޑިއާ އިން ސްކޮޑު އިއުލާނުކުރަން ލަސްކޮށްފައިވަނީ، އެ ޓީމުގެ ދެ ތަރިން، ކަމަށްވާ ވިރާތު އާއި ރޯހިތަށް އަލުން ފުރުސަތު ދިނުމާ މެދު އިންޑިއާގެ ކްރިކެޓް ބޯޑުން އަދި ގޮތެއް ނުނިންމާތީ އެވެ. ކުރިއަށް އޮތް ދެ ދުވަހެއްގެ ތެރޭގައި އިންޑިއާ ކްރިކެޓް ބޯޑުން އަފްގާނިސްތާން ސީރީސް އަށް ސްކޮޑު އިއުލާނުކުރާނެ އެވެ.
އިންޑިއާގެ ކުރީގެ ކްރިކެޓް ކުޅުންތެރިން، ހާއްސަކޮށް ކެޕްޓަނުން އަންނަނީ، ޓީ20 ޓީމަށް އަލުން ވިރާތާއި ރޯހިތު ގުޅެން ޖެހޭ ކަމަށް ބުނަމުންނެވެ.
ވިރާތު އާއި ރޯހިތު، އެންމެ ފަހުން، ޓީ20 ފޯމެޓްގައި އިންޑިއާ ގައުމީ ޓީމަށް ކުޅެފައިވަނީ، 2022 ވަނަ އަހަރުގެ އައިސީސީ ޓީ20 ކްރިކެޓް ވޯލްޑް ކަޕްގަ އެވެ. އެ ގޮތުން، އެ މުބާރާތުގެ ސެމީ ފައިނަލުގައި އިންޑިއާ އިން އިންގްލެންޑް އަތުން ބަލިވި މެޗަކީ، ޓީ20 ފޯމެޓްގައި އިންޑިއާ ޓީމަށް ވިރާތު އާއި ރޯހިތު ކުޅުނު ފަހު މެޗެވެ.
އެހެން ނަމަވެސް ދާދި ފަހުން، މިދިޔަ ނޮވެމްބަރު މަހު، އިންޑިއާގައި ބޭއްވި އައިސީސީ ވަންޑޭ އިންޓަނޭޝަނަލް (އޯޑީއައި/ޓެސްޓް ކްރިކެޓް) ވޯލްޑް ކަޕްގައި ވިރާތު އާއި ރޯހިތުގެ ފޯމަށް ބަލައި، އެ ދެ ކުޅުންތެރިން ޓީ20 އަށް ވެސް މުހިންމުވާނެ ކަަމަށް ތަޖުރިބާކާރުން ބުނެ އެވެ. ހާއްސަކޮށް، މުބާރާތުގެ މޮޅު ކުޅުންތެރިޔާގެ މަގާމު ހޯދި ވިރާތު، އަލުން ޓީ20 ސްކޮޑަށް އަންނަން ގޮވާލާ ފަރާތްތައް ގިނަ އެވެ.
އިންޑިއާ އިން ޓީ20 ކްރިކެޓް ވޯލްޑް ކަޕް ކާމިޔާބުކުރީ 2007 ވަނަ އަހަރު އެވެ. ދެކުނު އެފްރިކާގައި އެ ފަހަރު ބޭއްވި މުބާރާތުގެ ފައިނަލުގައި އިންޑިއާ އިން ވަނީ ޕާކިސްތާން އަތުން މޮޅުވެފަ އެވެ. މި ފަހަރުގެ މުބާރާތުގައި އިންޑިއާ އިން ޕާކިސްތާނާ ކުޅޭނީ ގްރޫޕްގެ ދެ ވަނަ މެޗުގަ އެވެ.
