ސައޮ ޕައޮލޯ، ބްރެޒިލް (ޖެނުއަރީ 6) - ފީފާ ވޯލްޑް ކަޕް ކުޅުންތެރިއެއްގެ ގޮތުގައި އަދި ކޯޗެއްގެ ގޮތުގައި އެންމެ ފުރަތަމަ ކާމިޔާބުކުރި މީހާގެ ޝަރަފު ހޯދާފައިވާ ބްރެޒިލްގެ ލެޖެންޑް މާރިއޯ ޒަގާލޯ އުމުރުން 92 އަހަރުގައި މަރުވެއްޖެ އެވެ.
ބްރެޒިލް އިން 1958 ވަނަ އަހަރާއި 1962 އަހަރުގެ ފީފާ ވޯލްޑް ކަޕް ކާމިޔާބުކުރިއިރު، އެ އަހަރުގައިވެސް ޒަގާލޯ އަކީ ބްރެޒިލް ޓީމުގެ ކުޅުންތެރިއެކެވެ. މި ދެ މުބާރާތުގައި ވެސް ބްރެޒިލް އަށް ކާމިޔާބީ ހޯދައިދިނުމުގައި ޒަގާލޯ މުހިންމު ދައުރެއް އަދާކުރިއެވެ.
ބްރެޒިލްގެ ގައުމީ ޓީމުގެ ކޯޗުގެ ގޮތުގައި 1970 ވަނަ އަހަރުގެ ފީފާ ވޯލްޑް ކަޕް އޭނާ ކާމިޔާބުކުރިއެވެ. އެ އަހަރު ޒަގާލޯގެ އިރުޝާދުގެ ދަށުން ނިކުތް ބްރެޒިލްގެ ޓީމަކީ ފުޓްބޯޅައިގެ ތާރީހުގައި މިހާތަނަށް ފެނުނު އެންމެ ވަރުގަދަ އެއް ޓީމެވެ. ބްރެޒިލްގެ ލެޖެންޑުން ކަމަށްވާ ޕެލޭ އާއި ކާލޮސް އަލްބާޓޯ އަދި ޖައިޒީނިއޯ އަކީ އެ ޓީމުގެ މެމްބަރުންނެވެ.
އޭގެ ފަހުން، 1994 ވަނަ އަހަރު އެމެރިކާގައި އޮތް ފީފާ ވޯލްޑް ކަޕް ބްރެޒިލް ކާމިޔާބުކުރިއިރު، ޒަގާލޯ ހުރީ ޓީމުގެ ކޯޗު ކާލޮސް އަލްބާޓޯ ޕެރެއިރާގެ އެހީތެރިއެއްގެ ގޮތުގަ އެވެ.
ފްރާންސްގައި 1998 ވަނަ އަހަރު އޮތް ވޯލްޑް ކަޕަށް ބްރެޒިލް ނުކުތީ ޒަގާލޯގެ އިރުޝާދުގެ ދަށުންނެވެ. އެ މުބާރާތުގެ ފައިނަލްގައި ބްރެޒިލް ބަލިވީ ފްރާންސް އަތުންނެވެ.
ޒަގާލޯ އަކީ ފުޓްބޯޅައިގެ ތާރީހުގައި ފީފާ ވޯލްޑް ކަޕް ކުޅުންތެރިއެއްގެ ގޮތުގައި އަދި ކޯޗެއްގެ ގޮތުގައި ކާމިޔާބުކުރި ފުރަތަމަ މީހާ އެވެ. އޭގެ ފަހުން، ޖަރުމަންގެ ފްރާންޒް ބެކެންބާއު އާއި ފްރާންސްގެ ޑިޑިއޭ ޑެޝޯމްޕްސް ވަނީ އެ ޝަރަފު ހޯދައިފަ އެވެ.
ފަސް ފަހަރު ފީފާ ވޯލްޑް ކަޕް ކާމިޔާބުކޮށް، ބްރެޒިލް އަކީ އަދިވެސް ފީފާ ވޯލްޑް ކަޕްގެ ތާރީހުގައި އެންމެ ކާމިޔާބު ޓީމެކެވެ. ބްރެޒިލްގެ ވޯލްޑް ކަޕްގެ ތާރީހުގައި ޒަގާލޯ އަކީ ފާހަގަކޮށްލެވޭ ނަމެކެވެ.
ކްލަބު ކެރިއަރުގައި ޒަގާލޯ ވަނީ ބްރެޒިލްގެ ފްލަމެންގޯ އާއި ބޮޓަފޯގޯ އަދި އެމެރިކާ އަށް ކުޅެފަ އެވެ. ޒަގާލޯ 1965 ވަނަ އަހަރު ކުޅުން ހުއްޓާލިއިރު، އޭނާ ވަނީ ބްރެޒިލްގެ ގައުމީ ޓީމަށް 33 މެޗު ކުޅެފަ އެވެ.
ޒަގާލޯ އެންމެ ފަހުން 2002 ވަނަ އަހަރު ބްރެޒިލްގެ ވަގުތީ ކޯޗެއްގެ ގޮތުގައި މަސައްކަތްކުރިއެވެ. އަދި 2003 އިން 2006 އަށް ބްރެޒިލް ޓީމުގެ ކޯޑިނޭޓަރުގެ މަގާމުގައި މަސައްކަތްކުރި އެވެ.
