ރައްޔިތުންގެ މަޖިލީހުގެ ރައީސް، މުހައްމަދު އަސްލަމް މަޖިލީހުގެ ފަސްވަނަ ދައުރަށް ވާދަކުރެއްވުމަށް އެމްޑީޕީގެ ޓިކެޓު ކަށަވަރު ކުރައްވައިފި އެވެ.
މިއަހަރު އޮންނަ މަޖިލިސް އިންތިހާބުގައި ވެސް އަސްލަމް ވާދަކުރައްވަނީ މިހާރުވެސް ތަމްސީލު ކުރައްވަމުން ގެންދަވާ ހިތަދޫ އުތުރު ދާއިރާގެ ގޮނޑިއަށެވެ.
ޕްރައިމަރީއަކާ ނުލައި އަސްލަމްއަށް އެ ދާއިރާގެ އެމްޑީޕީ ޓިކެޓު ކަށަވަރުވެފައި ވަނީ އިތުރު ބޭފުޅަކު އެ ދާއިރާއަށް ވާދަ ކުރުމަށް ޝައުގުވެރިކަން ފާޅު ކުރައްވާފައި ނުވާތީ އެވެ.
މަޖިލީހުގެ ރައީސްކަމުގެ މަގާމާ ހަވާލުވެވަޑައިގަތުމުގެ ކުރިން އަސްލަމްވަނީ މަޖިލީހުގެ މެޖޯރިޓީ ޕީޖީ ލީޑަރުގެ މަގާމު ފުރުއްވައިފަ އެވެ. ނިމިދިޔަ ރިޔާސީ އިންތިހާބުގައި އެމްޑީޕީގެ ރަނިން މޭޓެއްގެ ގޮތުގައި ވެސް ވާދަކުރެއްވި އަސްލަމް އެންމެ ފުރަތަމަ މަޖިލީހަށް ނުކުމެވަޑައިގެންނެވީ 2004 ވަނަ އަހަރު އެވެ.
އިސްލާހީ މަސައްކަތުގައި ވެސް އިސްކޮށް ހަރަކާތްތެރިވި އަސްލަމްއަކީ މެދުކެނޑުމެއް ނެތި މަޖިލީހުގައި ހިދުމަތް ކުރައްވާ އެންމެ ދުވަސްވީ އެއް ބޭފުޅާ އެވެ.
އަންނަ ދައުރަށް އަސްލަމް އިންތިހާބުވެއްޖެ ނަމަ މަޖިލީހުގައި އެންމެ ގިނަ ދުވަހު ހިދުމަތް ކުރެއްވި ބޭފުޅުންގެ ތެރޭގައި އޭނާ ހިމެނިވަޑައިގަންނަވާނެ އެވެ. އެ ރިކޯޑު މިހާރު އޮތް ބޭފުޅަކީ މެދުކެނޑުމެއް ނެތި 25 އަހަރު މަޖިލިސް މެންބަރެއްގެ ގޮތުގައި ހިދުމަތް ކުރެއްވި ކުރީގެ ރައީސް އިބްރާހިމް މުހައްމަދު ސޯލިހު އެވެ.
ޕްރައިމަރީއަކާ ނުލައި 36 ބޭފުޅަކު ވަނީ އެމްޑީޕީގެ ޓިކެޓު ކަށަވަރު ކުރައްވައިފަ އެވެ. އޭގެ ތެރޭގައި އަސްލަމްގެ އިތުރުން ރައްޔިތުންގެ މަޖިލީހުގައި މި ދައުރު މެމްބަރުކަން ކުރައްވާ 15 ބޭފުޅުން ހިމެނެ އެވެ.
