މިހާރު ކުރިއަށްދާ ގައުމީ ވޮލީބޯޅަ ލީގުގައި ދިވެހި ސިފައިންގެ ކުލަބް, ކުލަބް އާބަންކޯ އަދި ސިޓީ ސްޕޯޓްސް ކުލަބް އިއްޔެ ކުޅުނު މެޗުތައް ކާމިޔާބު ކޮށްފި އެވެ.
އިއްޔެ މެންދުރު ޒުވާނުންގެ މަރުކަޒު އެތެރޭ ކޯޓުގައި ސިފައިން ވަނީ ވެމްކޯގެ މައްޗަށް ފަސޭހަ މޮޅެއް ހޯދާފަ އެވެ. ކުލަބް ވެމްކޯގެ މައްޗަށް ސިފައިން ކުރިހޯދީ ސީދާ ތިން ސެޓުންނެވެ.
ވެމްކޯ ޓީމުން އާދައިގެކޮށް ފެނުނު މި މެޗުގެ ސެޓުތައް ސިފައިން ގެންދިޔައީ 25-14, 25-15 އަދި 25-13 އިންނެވެ.
އިއްޔެ ހަވީރު ކުޅުނީ އާބަންކޯ އާއި ޕޮލިސް ކުލަބް އެވެ. އެ މެޗު އާބަންކޯ އިން ކާމިޔާބުކުރީ ފަސޭހަކަމާއެކު ސީދާ ތިން ސެޓުންނެވެ. އާބަންކޯގެ ތަޖުރިބާކާރު ކުޅުންތެރިންގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ސެޓުތައް އެ ޓީމުން ގެންދިޔައީ 25-14, 25-17 އަދި 25-20 އިންނެވެ.
އިއްޔެ ކުޅުނު މެޗުތަކުގެ ތެރެއިން އެންމެ ފޯރިގަދަކޮށް ދިޔައީ, ސިޓީ ސްޕޯޓްސް ކުލަބާއި ސްޕޯޓްސް ކުލަބް ސިޓީ ބައްދަލުކުރި މެޗެވެ. އެންމެ ފަހުގެ ޗެމްޕިއަން ސްޕޯޓްސް ކުލަބް ސިޓީގެ މައްޗަށް ސިޓީ ސްޕޯޓްސްއިން ކުރިހޯދީ 3-2 ސެޓުންނެވެ.
މި މެޗުގެ ފުރަތަމަ ސެޓުން ކުރިހޯދީ ސްޕޯޓްސް ކުލަބް ސިޓީ އެވެ. ވާދަވެރި ކުޅުމަކަށްފަހު އެ ސެޓު ސްޕޯޓްސް ކުލަބް ސިޓީން ކާމިޔާބުކުރީ 25-21 އިންނެވެ. އެކަމަކު ޖެހިގެން އައި ދެ ސެޓުގައި ސްޕޯޓްސް ކުލަބް ސިޓީގެ ފަރާތުން ފެނިގެންދިޔައީ އާދައިގެ ކުޅުމެކެވެ. އެއާއެކު ސިޓީ ސްޕޯޓްސް އިން ވަނީ ޖެހިގެން އައި ދެ ސެޓު ފަސޭހަކަމާއެކު ކާމިޔާބު ކޮށްފަ އެވެ. މި ދެ ސެޓު ސިޓީ ސްޕޯޓްސްއިން ކާމިޔާބުކުރީ 25-11 އަދި 25-18 އިންނެވެ.
ޖެހިގެން އައި ހަތަރު ވަނަ ސެޓުގައި އެއްވެސް ޓީމަކަށް ބޮޑު ލީޑެއްގައި އޮވެ ނުކުޅެވުނުއިރު, މި ސެޓުގެ ފަހުކޮޅު ސްޕޯޓްސް ކުލަބް ސިޓީން ވަނީ އެ ޓީމުކޮޅަށް ނަތީޖާ ބުރަކޮށް 25-23 އިން ސެޓު ކާމިޔާބުކޮށްފަ އެވެ. އެކަމަކު، ސިޓީ ސްޕޯޓްސް އިން ވަނީ ފަހު ސެޓުގައި މޮޅަށް ކުޅެ 15-4 އިން ސެޓު ގެންގޮސްފަ އެވެ.
ކޮންމެ ޓީމަކުން، ތިން މެޗު ކުޅެފައިވާއިރު، ގައުމީ ވޮލީބޯޅަ ލީގުގެ އެއް ވަނައިގައި ތިން މެޗުން ވެސް މޮޅުވެގެން އޮތީ ސިފައިންނެވެ. ދެ ވަނައިގައި އޮތް އާބަންކޯ އާއި ތިން ވަނައިގައި އޮތް ވެމްކޯ އަށް ހަ ޕޮއިންޓް ލިބިފައިވާއިރު، އެ ދެ ޓީމުން ވެސް ވަނީ ދެ މެޗުން މޮޅުވެ، އެއް މެޗުން ބަލިވެފަ އެވެ. ހަތަރެއްގައި އޮތް ސިޓީ ސްޕޯޓްސް ކްލަބަށް ތިން މެޗުން ފަސް ޕޮއިންޓް ލިބިފައިވާއިރު، ފަހެއްގައި އޮތް ސްޕޯޓްސް ކްލަބް ސިޓީ އަށް ވަނީ ތިން މެޗުން އެއް ޕޮއިންޓް ލިބިފަ އެވެ. އެންމެ ފުލުގައި އޮތް ޕޮލިސް ވަނީ ކުޅުނު ތިން މެޗުން ވެސް ބަލިވެފަ އެވެ.
މި މުބާރާތުގައި މިއަދު ވެސް ދެ މެޗު ކުޅޭނެ އެވެ. މިއަދު ހަވީރު ކުޅޭ މެޗުގައި ބައްދަލުކުރާނީ ވެމްކޯ އާއި އާބަންކޯ އެވެ. އަދި މިރޭގެ މެޗުގައި ބައްދަލުކުރާނީ ސްޕޯޓްސް ކުލަބް ސިޓީއާ ޕޮލިސް ކުލަބެވެ.
