އެމްޑީޕީއަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ދިވެހިރައްޔިތުންގެ އުންމީދުތައް ހާސިލުކޮށް ދިނުމަށް އުފެދި ކުރިއަށްދާ އެންމެ ދުވަސްވީ އެންމެ ފަހުރުވެރި ޕާޓީ ކަމަށާއި މިއީ އެމްޑީޕީ އާ ހިތްވަރަކާއެކު ނުކުންނަންވީ ދަނޑިވަޅު ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
އެމްޑީޕީ އަށް ނިސްބަތްވާ މަޖިލީހުގެ މެމްބަރުންތަކެއް ވެރިކަންކުރާ ޕާޓީ، ޕީއެންސީއަށް ރޭ ބަދަލުވެފައި ވަނިކޮށް، އަބްދުﷲ ޝާހީދު ފޭސްބުކް، އަދި އެކްސްގައި ކުރެއްވި ޕޯސްޓެއްގައި ވިދާޅުވީ އެމްޑީޕީއަކީ އުފަލާއި ހިތާމަޔާ، ކާމިޔާބީއާއި ނާކާމިޔާބީ ވެސް ތަޖރިބާ ކޮށްފައިވާ ޕާޓީއެއް ކަމަށެވެ.
"މިދަނޑިވަޅަކީ އަނެއްކާ ވެސް އައު ހިތްވަރަކާ އައު ޖޯޝަކާއެކު ރައްޔިތުންނާއި ގައުމުގެ ހައްގުގައި ސާބިތުވެ ތިބެންވީ ވަގުތު. އައު އުންމީދުތަކާއި އައު ލަނޑުދަނޑިި ތަކަކާއެކު ނިކުންނަންވީ ދަނޑިވަޅު،" ޝާހިދު ވިދާޅުވި އެވެ.
"އެމްޑީޕީގެ ރަންރީދޫ ލަޝްކަރު ތިބޭނީ އަބަދުވެސް ވަރުގަދަ އަޒުމުގައި ހިތްވަރުގެ ކަމަރު ބަނދެގެން ކުރިޔަށް މިސްރާބު ޖަހައިގެން."
ރޭ ޕީއެންސީއާ ގުޅިވަޑައިގަތީ މަޖިލީހުގެ 13 މެމްބަރެކެވެ، އޭގެ ތެރޭގައި ރިޔާސީ އިންތިހާބުގެ ދުވަސްވަރު އެމްޑީޕީން ވަކިވެވަޑައިގެންނެވި މައްޗަންގޮޅި އުތުރު ދާއިރާގެ އަހުމަދު ހައިތަމް ވެސް ހިމެނެ އެވެ.
އެ މެމްބަރުން ޕީއެންސީއަށް ބަދަލުވީ، ރައްޔިތުންގެ މަޖިލީހުގެ މެމްބަރުންތަކެއް ވެރިކަން ކުރާ ޕީއެންސީ/ޕީޕީއެމް ކޯލިޝަނަށް ސޮއިކުރަން ރިޝްވަތު ދެމުންދާ ކަމަށް ހެންވޭރު ދެކުނު ދާއިރާގެ ގޮނޑީގައި އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ މަޖިލީހުގައި ތަމްސީލު ކުރައްވާ ހުސައިން ޝަހީމް (އަނދުން ހުސައިން) ތުހުމަތު ތުހުމަތު ކުރައްވާފައި ވަނިކޮށެވެ.
ބައެއް މެމްބަރުން ގަތުމަށް ސަރުކާރުގެ ފަރާތުން ފައިސާ އާއި މަގާމު ހުށަހަޅާ ކަމަށް މަޖިލީހުގެ އެހެން ބައެއް މެމްބަރުން ވެސް ވިދާޅުވެފައިވެ އެވެ.
