ކުރެންދޫ ދާއިރާގެ މެމްބަރު ޢަބްދުލްޣަނީ ޢަބްދުލްޙަކީމާއި މުލަކު ދާއިރާގެ މެމްބަރު އިބްރާހިމް ނަސީރު އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ދޫކޮށް ވެރިކަން ކުރާ ޕްރޮގްރެސިވް ނޭޝަނަލް ކޮންގްރެސް (ޕީއެންސީ) އަށް ބަދަލުވެއްޖެ އެވެ.
މި ދެ ބޭފުޅުން ވެސް ޕީއެންސީއާ ގުޅިވަޑައިގަންނަވާ ކަމާއި މާދަމާ ރޭ ދަރުބާރުގޭގައި ބާއްވާ ޕީއެންސީގެ ޖަލްސާއިން ފެންނާނެ ކަމަށް "އަދަދު" ނޫހާ ވާހަކަ ދެއްކި ފަރާތްތަކުން ކަށަވަރުކޮށް ދިނެވެ.
"އަދަދު" ނޫހަށް އެނގިފައިވާ ގޮތުގައި މަޖިލީހުގެ 10 ވަރަކަށް މެމްބަރުން ޕީއެންސީއާ ގުޅުމަށް ވަނީ ނިންމަވާފަ އެވެެ.
މާދަމާ ރޭ ޕީއެންސީއާ ގުޅޭ މެމްބަރަކު އަދަދު ނޫހަށް ވިދާޅުވީ ޕީއެންސީއާ ގުޅިވަޑައިގަންނަވާ މެމްބަރުންގެ ތެރެއިން ބައެއް މެމްބަރުން ޖަލްސާއިން ފެނިވަޑައިނުގެންފާނެ ކަމަށެވެ. ނަމަވެސް އެ މެމްބަރުންގެ ނަންތައް އިއުލާނު ކުރުން އެކަށީގެންވާ ކަމަށް އޭނާ ވިދާޅުވި އެވެ.
ދަރުބާރުގޭގައި މާދަމާ ރޭ ބާއްވާ ޖަލްސާގެ ދައުވަތު އެ ކޯލިޝަނުން މިހާރު ފޮނުވާފައިވާއިރު މި ޖަލްސާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވާނެ އެވެ.
އިދިކޮޅު މެމްބަރުންތަކެއް ޕީއެންސީއާ މި ގުޅެނީ ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަޒުލުކުރުމާ ގުޅޭ މާއްދާތަކަށް ވަނީ ބަދަލު ގެނެސްފަ އެވެ.
މި ދެ މެމްބަރުންގެ އިތުރުން މަރަދޫ ދާއިރާގެ މެމްބަރު އިބްރާހިމް ޝަރީފް ވެސް ވަނީ ވަކިވެވަޑައިގަނެފަ އެވެ. އެހެންކަމުން މަޖިލީހުގައި ތިބި އެމްޑީޕީގެ މެމްބަރުންގެ އަދަދު މިވަނީ 53 އަށް ވެއްޓިފަ އެވެ. އަދި, މާދަމާ ރޭ ސޮއިކުރާ މެމްބަރުންނާ އެކު އެ އަދަދު ދަށްވެ އެ ޕާޓީއަށް ސުޕަމެޖޯރިޓީ ގެއްލޭނެ އެވެ.
