ފުށިދިއްގަރު ފަޅު ހިއްކުމުގެ މަޝްރޫއު ސަރުކާރުން ކުރިއަށްގެންދާ ގޮތުގައި ހާމަކަމެއް ނެތުމުން ކަންބޮޑުވުން ފާޅުކޮށް އެ މަޝްރޫއުގެ ތަފުސީލު ހާމަކުރުމަށް ގޮވާލާ ކުއްލި މައްސަލައެއް މަޖިލީހުގެ ނައިބު ރައީސް، އަހުމަދު ސަލީމް މަޖިލީހަށް މިއަދު ހުށަހަޅައިފި އެވެ.
އެ މައްސަލައިގައި ބުނެފައި ވަނީ ފުށިދިއްގަރު ފަޅުގެ މަސައްކަތް ފަށާފައި ވަނީ އެ ބިން ތަރައްގީ ކުރާނެ ގޮތާއި ބިން ހިއްކުމުގެ މަޝްރުއަށް ހިނގާނެ ޖުމުލަ ހަރަދު ހާމަ ކުރުމެއް ނެތި ކަމަށާއި ކުއްލި ގޮތަކަށް ބަޔަކާ އެ މަޝްރޫއު ހަވާލު ކުރުމަކީ ސުވާލު އުފެދޭ ކަމެއް ކަމަށެވެ.
މާލޭގެ ދެކުނުގައި އޮންނަ 1280 ހެކްޓަރުގެ ފުށިދިއްގަރު ފަޅުން 1153 ހެކްޓަރުގެ ބިން އަށް މަސްދުވަހުގެ ތެރޭގައި ނިންމުމަށް އަމާޒު ހިފައި މަސައްކަތް ފެށީ މުޅި އެ ފަޅުގެ އެންވަޔަރަމަންޓު އިމެޕެކްޓު އެސެސްމެންޓު (އީއައިއޭ) ނުހަދައި ކަމަށާއި އީއައިއޭ ހަދާފައި ވަނީ ހަމައެކަނި 29 ހެކްޓަރުގެ ސަރަހައްދެއްގެ ކަމަށް އެ މައްސަލައިގައި ބުނެފައިވެ އެވެ.
އެއީ އެފަޅުން ހިއްކަން ކަނޑައަޅާފައިވާ ސަރަހައްދުގެ އެންމެ 2.26 އިންސައްތަކަން ފާހަގަކޮށް އެ މައްސަލައިގައި ސަލީމް ވަނީ އެއީ އީއައިއޭ ހެދުމުގައި އަމަލުކުރާ އުސޫލުގެ ބޭރުން ހާއްސަ އިމްތިޔާޒެއްގެ ދަށުން ކޮށްފައިވާ ކަމެއް ކަމަށް ބެލުމުގެ ޖާގަ އޮތް ކަމަށް ވިދާޅުވެފަ އެވެ.
ފުށިދިއްގަރު ފަޅު ހިއްކުމަށް ހަވާލު ކޮށްފައި ވަނީ ސްރީލަންކާގެ ސީއެމްސީސީއާ އެވެ. އެ ކުންފުނިން ފުށިދިއްގަރު ފަޅު ހިއްކަނީ ހުޅުމާލެއިން 10 ހެކްޓަރު އަދި ފުށިދިއްގަރު ފަޅުން ހިއްކާ ސަރަހައްދުން 60 ހެކްޓަރުގެ ބިން ލިބޭ ގޮތަށެވެ.
މަޖިލީހަށް ސަލީމް ހުށަހެޅުއްވި މައްސަލައިގައި ވަނީ އެކަމާ ކަންބޮޑުވުން ފާޅު ކުރައްވައި ދިވެހި ފަސްގަނޑުން 99 އަހަރަށް ބޭރު ބަޔަކަށް ބިން ދިނީ ކޮން ގޮތަކަށް އަގު ކޮށްފައިތޯ ސުވާލު އުފައްދައިފަ އެވެ. އަދި ރާއްޖޭގެ ބިމުން ބޭރު ބަޔަކަށް ބިން ލިބޭ ގޮތަށް ނިންމި ނިންމުމަކީ އެންމެ ފައިދާ ހުރި ގޮތަށް ކޮށްފައިވާ ކަމެއްކަން އެނގޭނެ ގޮތެއް ނެތް ކަމަށް ސަލީމް ހުށަހެޅުއްވި މައްސަލައިގައި ބުނެފައިވެ އެވެ.
ފުށިދިއްގަރު ފަޅު ހިއްކުމަށް އަންނަ އަހަރަށް ލަފާ ކުރާ ބެޖެޓުގައި ހިމަނާފައި އޮތް 400 މިލިއަން ރުފިޔާ އުނި ކުރުމުން ވެސް މަޖިލީހުގެ ނިންމުމަށް ގޮންޖަހައި އެ މަޝްރޫއު ކުރިއަށް ގެންދިޔުމަށް ނިންމުމަކީ ދައުލަތުގެ ބާރުތައް ބެހިފައި ވާގޮތަށް ގޮން ޖެހުން ކަމަށާއި އެއީ ޑިމޮކްރެސީގެ ހަމަތަކާއި ގުޑް ގަވަނަންސްގެ އުސޫލުތަކާ ހިލާފު ކަމެއް ކަމަށް އެ މައްސަލައިގައި ބުނެފައިވެ އެވެ.
