ބާމިންހަމް (ޑިސެމްބަރު 25) - އިނގިރޭސި ޕްރިމިއާ ލީގުގައި ރޭ ވުލްވްސް އަތުން 2-1 އިން ނާކާމިޔާބުވި މެޗާ އެކު، ލީގުގައި ރަށުންބޭރުގައި ޗެލްސީ ޖެހިޖެހިގެން ހަތަރު މެޗުން ބަލިވެއްޖެ އެެވެ.
މިއީ، 2000 ވަނަ އަހަރުގެ ޑިސެމްބަރު މަހުގެ ފަހުން، ލީގުގައި ޗެލްސީ، ރަށުންބޭރުގައި ޖެހިޖެހިގެން ހަތަރު މެޗުން ބަލިވި ފުރަތަމަ ފަަހަރެވެ.
މި ސީޒަނުގައި ލީގުގައި އަށް ވަނަ މެޗުން ޗެލްސީ ބަލިވިއިރު، މި އަހަރުގެ މިހާތަނަށް ލީގުގައި އެންމެ ގިނަ މެޗުން ބަލިވީ ވެސް ޗެލްސީ އެވެ. އެއީ 2023 ވަނަ އަހަރު ޗެލްސީ ލީގުގެ 19 މެޗަކުން ބަލިވެފައިވާތީ އެވެ. އެހެން ނަމަވެސް މި ސީޒަނުގައި ޗެލްސީގެ ކޯޗުކަމާ ހަވާލުވި މައުރީސިއޯ ޕޮޗެޓީނޯ ވަނީ ހާލަތު ބަދަލުކުރެވޭނެ ކަމުގެ އުންމީދު އެބައޮތް ކަމަށް ބުނެފަ އެވެ.
"ކޮލިޓީ އެބަހުރި މި ކުޅުންތެރިންގެ، ނެތްނަމަ އަހަންނެއް މި މަގާމުގައި ނުހުންނާނެ. މީގެ ބޭނުންވަނީ މި ހުރިހާ ކުޅުންތެރިން އެއް ޓީމެއްގައި މޮޅަށް ކުޅެން ރޭވުންތެރިކަމާ އެކު، ކުރިއަށްދާނެ ވަގުތު، އެކަމަކު، މިހާރު މި ދަނީ ބޭނުންވާ ގޮތަކަށް ނޫން ނަތީޖާތައް،" ޕޮޗެޓީނޯ ބުންޏެވެ.
ރޭގެ މެޗުން ބަލިވިއިރު، ޗެލްސީ މި ވަގުތު އޮތީ ލީގު ތާވަލުގެ 10 ވަނައިގަ އެވެ. އެއީ 18 މެޗުން 22 ޕޮއިންޓާ އެކު އެވެ.
ވުލްވްސް ދަނޑުގައި ރޭ ކުޅުނު މެޗުގައި ޗެލްސީ އަށް ލީޑުނަގައިދޭން ފުރަތަމަ ހާފުގައި ރަހީމް ސްޓާލިން އަށް ލިބުނު ރަނުގެ ފުރުސަތު އޭނާ އަތުން ގެއްލުނީ އަމިއްލަ އަށް ޖަހަން އުޅުމުންނެވެ. އެ ޓީމުގެ ތިން ކުޅުންތެރިއަކު ހުސްކޮށް އެރި އެޓޭކެއްގައި އެހެން ކުޅުންތެރިއަކަށް ނުދީ ސްޓާލިން އަމިއްލަ އަށް ޖެހި ޝޮޓް، ވުލްވްސްގެ ކީޕަރު ހޯސޭ ސާ މަތަކުރީ އެވެ.
ވުލްވްސް އިން ދެ ވަނަ ހާފް ފެށުނުތަނުން މާރިއޯ ލެމީނާ ޖެހި ގޯލުން ލީޑުނެގި އެވެ. އަދި އެ ލީޑުގައި ދެ ވަނަ ހާފުގެ ބޮޑުބައި ހިފަހައްޓައިލުމަށް ފަހު، އިތުރު ވަގުތުގެ ތިން ވަނަ މިނިޓްގައި މެޓް ޑޮހަޓީ ޖެހި ގޯލުން ލީޑުފުޅާކުރި އެވެ. ޗެލްސީން މެޗު ނިމުމުގެ ކުރިން ގޯލެއް ޖެހި އެވެ. އެއީ އިތުރު ވަގުތުގެ ހަ ވަނަ މިނިޓްގައި ކްރިސްޓޮފާ އެންކުންކޫ ޖެހި ގޯލެކެވެ.
