ގދ. ތިނަދޫއަށް ސިޓީއެއްގެ ދަރަޖަ ދިނުމަށް އިދާރީ ދާއިރާތައް ލާމަޒުކަޒީ އުސޫލުން ހިންގުމުގެ ގާނޫނަށް ބައެއް ބަދަލުތައް ގެންނަން ލާމަރުކަޒީ ކޮމެޓީއިން ނިންމައިފި އެވެ.
ލާމަރުކަޒީ ކޮމެޓީން މި މަހުގެ 11 ވަނަ ދުވަހު ބޭއްވި ބައްދަލުވުމުގައި މިހާރުގެ ތިނަދޫ ރަށު ކައުންސިލް، ސިޓީ ކައުންސިލަށް ބަދަލކޮށް، ސިޓީ ކައުންސިލަކަށް ލިބިދޭ ބާރުތައް ދޭންޖެހޭ ކަމަށް ފާސްކޮށްފައިވެ އެވެ.
އެހެންނަމަވެސް ކޮމެޓީގެ ނިންމުމަށްފަހު، ލާމަރުކަޒީ ގާނޫނު މިހާރު އޮތް ގޮތުން ގާނޫނު މާނަ ކުރުމުގައި ތަފާތު މާނައެއް ނެގި ދާނެ ކަމަށް މަޖިލީހުގެ ކައުންސިލް ޖެނެރަލް ލަފާ ދެއްވާފައިވާ ކަމަށް ކޮމެޓީގެ މުގައްރިރު އަދި ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވި އެވެ.
އެހެންކަމުން، އިތުރު އޮޅުމެއް ނާރާނެ ގޮތަށް ގާނޫނު މާނަކޮށް، މިހާރު ހުރި މައްސަލަތަކަށް ދާއިމީ ހައްލެއް ގެނައުމަށް، ކޮމެޓީއިން ފާސް ކުރި ރިޕޯޓު މަޖިލީހުގެ ތަޅުމަށް ފޮނުވުމުގެ ކުރިން، އިތުރު އިސްލާހެއް ގެނައުން މުހިންމު ކަމަށް ނިޔާޒް ވިދާޅުވި އެވެ.
ލާމަރުކަޒީ ގާނޫނުގެ 51 ވަނަ މާއްދާގެ ކ. ގައި ބުނެފައި ވަނީ "ސިޓީއެއް އުފައްދަނީ އިދާރީ ދާއިރާއެއްގައި ހިމެނޭ ހުރިހާ ރަށެއް އެކުވެގެން ކަމުގައިވާ ނަމަ، އެ އިދާރީ ދާއިރާއެއްގެ އަތޮޅު ކައުންސިލް އެހިނދުން ފެށިގެން އުވުނީ" ކަމަށެވެ.
މި މާއްދާއަށް އިސްލާހު ހުށަހެޅުއްވީ ތުޅާދޫ ދާއިރާގެ މެމްބަރު ހިސާން ހުސެއިން އެވެ. ހިސާން އިސްލާހު ހުށަހެޅުއްވީ:
- ސިޓީއެއް އުފައްދާނީ އިދާރީ ދާއިރާގެ ހުރިހާ ރަށެއް އެކުވެގެން ކަމަށްވާ ނަމަ، އަތޮޅު ކައުންސިލް އުވިގެން ދާނެ ކަމަށް
- އަތޮޅު ކައުންސިލް އުވިއްޖެ ނަމަ، އަތޮޅު ކައުންސިލްގެ ޒިންމާތައް ސިޓީ ކައުންސިލަށް ބަދަލުކުރަން
- ވަކި ރަށެއް ސިޓީއަކަށް ބަދަލުވާ ނަމަ، އަތޮޅު ކައުންސިލް ދެމި އޮތުމާއެކު ޒިންމާތައް ވެސް އަތޮޅު ކައުންސިލުން ކުރިއަށް ގެންދެވޭނެ ކަމަށެވެ.
ތިނަދޫއަށް ސިޓީއެއްގެ ދަރަޖަ ދިނީ މި އަހަރުގެ އޮގަސްޓް 31، ގަ އެވެ. އެ ކަން ކުރީގެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވީ އެމަނިކުފާނުގެ ރިޔާސީ ކެމްޕެއިންގެ ތެރެއިން ތިނަދޫއަށް ވަޑައިގެން ބޭއްވި ޖަލްސާއެއްގަ އެވެ.
ރައީސް ސޯލިހު ނެރުއްވި ގަރާރަކުން ތިނަދޫ އަކީ ސިޓީއެއް ކަމަށް ކަނޑައެޅުމާއެކު، މިހާރު އޮތް ރަށު ކައުންސިލަށް ލިބިދޭ ބާރުތައް ދިނުމުގައި ހުރި އިދާރީ ގޮންޖެހުންތައް ހައްލު ކޮށްދިނުމަށް އެދި އެ ރަށުގެ ކައުންސިލުން މަޖިލީހަށް ސިޓީއެއް ފޮނުވާފައިވެ އެވެ.
ތިނަދޫއަކީ ރާއްޖޭގައި ކަނޑައެޅުނު ފަސް ވަނަ ސިޓީ އެވެ. ތިނަދޫގެ އިތުރުން، ސިޓީއެއްގެ ދަރަޖަ ދީފައިވަނީ ވެރިކަންކުރާ މާލެ ސަރަހައްދާއި އެންމެ ދެކުނުގައިވާ އައްޑު އަތޮޅާއި ފުވައްމުލަކު އަދި ހދ. ކުޅުދުއްފުއްޓަށެވެ.
