މި ސަރުކާރަށް މަސް ދުވަސް ވީއިރު ވެސް، ރާއްޖޭގައި ތިބި އިންޑިއާ ސިފައިންގެ އަދަދު ނޭނގޭ ކަމަށް ބުނާތީ ކުރީގެ ރައީސް އަބްދުﷲ ޔާމީނުގެ އާ ޕާޓީން ފާޑުކިޔައިފި އެވެ.
ކުރީގެ ރައީސް އަބްދުﷲ ޔާމީނުގެ ތާއީދާ އެކު ޕީއެންސީގެ ޓިކެޓްގައި ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުން، ޔާމީނު ޕީޕީއެމް/ޕީއެންސީއާ ދުރަށް ޖެހިވަޑައިގެން، އާ ޕާޓީއެއް ހެދުމުގެ މަސައްކަތް އަންނަނީ ކުރަމުންނެވެ. އެކަމުގައި އެންމެ އިސްކޮށް އުޅުއްވާ އެއް ބޭފުޅަކީ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލެވެ.
ޕީއެންއެފްގެ އޮފީހުގައި މިރޭ ބޭއްވި ޖަލްސާއެއްގައި މަލީހު ވިދާޅުވީ ސަރުކާރަށް 30 ދުވަސްވީ އިރު އިންޑިއާ ސިފައިންގެ އަދަދު ނޭނގިގެން އުޅެނީ "ހިސާބު"ގެ މައްސަލަ އަކުން ކަމަށެވެ. ނުސީދާ ގޮތެއްގައި އޭނާގެ ބަހުގެ ހަމަލާ އަމާޒުކުރެއްވީ ރައީސްގެ އެޑްވައިޒަރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ އަށެވެ.
"އެހެންވީމާ ހިސާބުގެ މައްސަލަ އުޅޭ ކަމަށް ވަންޏާ، އަޅުގަނޑުމެންގެ އެބަތިބި ހިސާބު އިލްމުވެރިން، އިންޑިއާ ސިފައިން ގުނަން ޖެހިއްޖެއްޔާ އަޅުގަނޑުމެން އެކަން ކޮށްދޭނަން، ހިލޭ ސާބަހަށް ކޮށްދޭނަން،" މަލީހު ވިދާޅުވި އެވެ.
އޭނާ ވިދާޅުވީ އިންޑިއާ ސިފައިންގެ އަދަދު ގުނުމަށްޓަކައި ރައީސް އޮފީހަށާއި ޑިފެންސް މިނިސްޓްރީއަށް ދާން ޕީއެންއެފްގެ މެންބަރުން ތިބީ ތައްޔާރަށް ކަަމަށެވެ.
ރާއްޖޭގައި ތިބި އިންޑިއާ ސިފައިން އަނބުރާ ފޮނުވައިލުމަކީ މުއިއްޒުގެ ރިޔާސީ ވައުދެކެވެ. އެހެން ނަމަވެސް އޭގެ މާކުރިން ފަށައިގެން، އޭރުގެ އިދިކޮޅު ޕާޓީގެ ހައިސިއްޔަތުން، ޕީޕީއެމް/ޕީއެންސީން ތަކުރާރުކޮށް ބުނަމުން ދިޔައީ ރާއްޖޭގައި ތިބި އިންޑިއާ ސިފައިން ބޭރުކުރާނެ ކަމަށެވެ.
ސަރުކާރުން އެންމެ ފުރަތަމަ އިއުލާނުކުރީ ރާއްޖޭގައި ތިބީ 77 ސިފައިން ކަމަށެވެ. އޭގެ ފަހުން އިންޑިއާގެ އިސް އޮފިޝަލަކު ވަނީ އެ އަދަދުގެ ތެރޭގައި ސެނަހިޔާގައި ތިއްބަވާ މިލިޓަރީ ޑޮކްޓަރުން ނުހިމެނޭ ކަމަށް ވިދާޅުވެފަ އެވެ. އަދި, އެ ނުވަ ޑޮކްޓަރުން ހިމެނުމުން އަދަދު އަރަނީ 86 އަށެވެ.
ރާއްޖޭގައި ތިބި އިންޑިއާ ސިފައިން ބޭރު ކުރުމަކީ ރައީސް ޑރ. މުހައްމަދު މުއިއްޒުގެ މުޅި ރިޔާސީ ކެމްޕޭން ބިނާވި އެމަނިކުފާނުގެ އެންމެ މުހިންމު ވައުދެވެ.
ކޮޕް-28 ގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ބޭއްވި ބައްދަލުވުމުގައި، އިންޑިއާ އިން އެ ގައުމުގެ ސިފައިން އަނބުރާ ގެންދިއުމަށް އެއްބަަސްވި ކަމަށް ރައީސް މުއިއްޒު ވިދާޅުވި އެވެ. ނަމަވެސް, އެކަމާ ގުޅިގެން ނޫސްވެރިން ސުވާލުތައް ކުރިމަތިވުމުން ރައީސް އިތުރު ތަފުސީލެއް ނުދެއްވަ އެވެ.
އިންޑިއާގެ ނޫސްތަކުން، އެ ގައުމުގެ އޮފިޝަލުންނާ ހަވާލާދީ ބުނެފައިވާ ގޮތުން މިހާތަނަށް ދެ ގައުމުން މިފަދަ އެއްބަސްވުމަކަށް އާދެވިފައެއް ނުވެ އެވެ.
