ޖުޑީޝަލް ސާވިސް ކޮމިޝަން (ޖޭއެސްސީ)ގެ ނައިބަކަށް ސުޕްރީމް ކޯޓުގެ ފަނޑިޔާރު އާއިޝަތު ޝުޖޫން އައްޔަންކޮށްފި އެވެ.
ޖޭއެސްސީގެ ވައިސް ޗެއާޕާސަންގެ މަގާމަށް ޝުޖޫން އިންތިހާބުކޮށްފައި ވަނީ ކުރިން އެ މަގާމުގައި ހުންނެވި މަސްތޫރު ހުސްނީ އިސްތިއުފާ ދެއްވުމާ ގުޅިގެންނެވެ. އޭނާ ޖޭއެސްސީގެ މެންބަރު ކަމަށް އައްޔަންކޮށްފައި ވަނީ 2019 ގަ އެވެ.
ޝުޖޫން ވަނީ ގާނޫނީ ދާއިރާގެ މަތީ މަގާމުތަކެއް މީގެ ކުރިން ވެސް ފުރުއްވާފަ އެވެ. އެގޮތުން ސިވިލް ކޯޓުގެ ގާޒީކަން އަދި، ޖަސްޓިސް މިނިސްޓްރީގެ އެކި މަގާމުތައް އަދި ބާ ކައުންސިލުގެ އެގްޒެކްޓިވް ކޮމެޓީގެ މެންބަރުކަން ވެސް ކުރެއްވި އެވެ.
ސުޕްރީމް ކޯޓުގެ ފަނޑިޔާރު ޝުޖޫންއަކީ ރާއްޖޭގެ ފުރަތަމަ އަންހެން ގާޒީ އެވެ. އަދި އެންމެ ފުރަތަމަ ސުޕްރީމް ކޯޓަށް އައްޔަންކުރެވުނު ދެ އަންހެން ފަނޑިޔާރުންގެ ތެރޭގައި ވެސް ޝުޖޫން ހިމެނެ އެވެ.
