ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީ ކޯލިޝަނުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ އެ ޕާޓީގެ އެތެރޭގެ ޕްރައިމަރީ ޖެނުއަރީ 20 އަށް ފަސްކޮށްފި އެވެ.
އެ ކޯލިޝަނުގެ ޕްރައިމަރީ ބާއްވަން ތާވަލުކޮށްފައި އޮތީ މިހިނގާ ޑިސެމްބަރު މަހުގެ 23ގަ އެވެ.
ޕްރައިމަރީ ބާއްވާ ތާރީހު ޖެނުއަރީ މަހުގެ 20 އަށް ބަދަލުކުރީ ކުރިން ތާވަލުކޮށްފައިވާ ތާރީހަކީ ސްކޫލު ބަންދު ދުވަސްވަރަކަށް ވެފައި, ގިނަ ރައްޔިތުން އެކި ބޭނުންތަކަށް އަދި އުމްރާ ކުރުމަށް ގައުމުން ބޭރަށް ދަތުރު ކުރުމަށް ހަމަޖެހިފައިވާ ދުވަސްވަރަކަށް ވާތީ ކަމަށް އެ ޕާޓީން ބުނެ އެވެ.
އެހެންކަމުން, ޕްރައިމަރީ ބާއްވާ ތާރީހު ބަދަލުކޮށްދިނުމަށް ކޯލިޝަނުގައި ވާދަ ކުރާ ކެންޑިޑޭޓުންނާއި އާންމު މެންބަރުން ވެސް އެދިފައިވާ ކަމަށް އެ ކޯލިޝަނުން ބުނެ އެވެ.
ޕީޕީއެމް/ޕީއެންސީން ނެރުނު ނޫސް ބަޔާނުގައި ބުނީ ޕްރައިމަރީ ބާއްވާ ތާރީހު ފަސްކުރި ނަމަވެސް, ވާދަކުރާ ކެންޑިޑޭޓުންގެ ޝަރުތު ހަމަވޭތޯ ބެލުމަށްފަހު ނަންތައް ތަރުތީބުކޮށް އަންނަ ހަފްތާގައި އާންމު ކުރާނެ ކަމަށެވެ.
ޕީޕީއެމް/ޕީއެންސީން އެކުގައި މަޖިލިސް އިންތިހާބަށް ވާދަކޮށް, މަޖިލީހުގެ ހުރިހާ ގޮނޑިއަކަށް ވާދަކުރުމަށް ވަނީ ނިންމާފަ އެވެ. މިވަގުތު ސަރުކާރުގައި އޮތީ ޕީއެންސީ ކަމުން, އެކޯލިޝަނުން ވަނީ މަޖިލީހުގެ ސުޕާ މެޖޯރިޓީ ހޯދުމުގެ އަމާޒު ހިފާފަ އެވެ.
