އަންނަ އަހަރު ބާއްވާ މަޖިލިސް އިންތިހާބުގައި ޕީޕީއެމް/ޕީއެސްނީގެ ޕްރައިމަރީގައި ގ. ބޮޑުފެންވަޅުގެ، އަހުމަދު އަޖުވަދު ވާދަކުރަން ނިންމައިފި އެވެ.
ދާއިރާގެ ރައްޔިތުންނާއި ގިނަ ޒުވާނުންގެ އެދުމާއެކު މަޖިލިސް ޕްރައިމަރީގައި ވާދަކުރަން ނިންމައި އަޖުވަދު ވަނީ ޕީއެންސީ އޮފީހަށް ފޯމު ވެސް ހުށަހަޅާފަ އެވެ.
އަޖުވަދު އަކީ ސިޔާސީ ދާއިރާގައި ދުވަސްވީ ތަޖުރިބާކާރެކެވެ. ޕްރޮގްރެސިވް ކޯލިޝަނާއެކު ސިޔާސީގޮތުން އަޖުވަދު ހަރަކާތްތެރިވަމުން އަންނަތާ 10 އަހަރު ވަނީ ވެފަ އެވެ. ކުރިން، 2013 ވަނަ އަހަރުން ފެށިގެން ޕާޓީގެ ހަރަކާތްތަކުގައި ބަރާބަރަށް ބައިވެރިވަމުން އަންނަ އަޖުވަދު ފާހަގަވެފައިވަނީ ޕާޓީގެ ލީޑާޝިޕަށް ފުރިހަމައަށް އެއްބާރުލުން ދޭ ބޭފުޅެއް ގޮތުގަ އެވެ.
އަޖުވަދު ވަނީ 2014 ވަނަ އަހަރު ބޭއްވި މަޖިލިސް އިންތިހާބުގައި ވެސް މާފަންނު އުތުރު ދާއިރާއަށް ވާދަކުރައްވާފަ އެވެ. އަދި ޕާޓީ އެންމެ ނިކަމެތިވެގެން ދިޔައިރުވެސް ޕާޓީއާ ދުރުގައި ނުހުރެ އަޖުވަދު ވަނީ ޕާޓީގެ ހައްގުގައި ކުރީގެ ސަރުކާރާ ދެކޮޅަށް ތެދުވެ އަޑު އުފުލާފަ އެވެ. އިންޑިއާ ސިފައިން ރާއްޖެއިން ފޭބުމަށް ގޮވާލާ އިދިކޮޅުން ކުރިއަށްގެންދިޔަ އިންޑިއާ އައުޓް ހަރަކާތުގައި ވެސް އޭނާ ބައިވެރިވި އެވެ.
ޕްރައިމަރީގައި ވާދަކުރަން ނިންމައި، ދާއިރާގެ ޒުވާނުންނާއެކު ޕާޓީ އޮފީހަށް އަޖުވަދުގެ ފޯމު ހުށަހެޅުން---
މީގެ އިތުރުން 2022 ވަނަ އަހަރުން ފެށިގެން އޭނާ ހަރަކާތްތެރިވަމުން އަންނަނީ ޕްރޮގްރެސިވް ކޯލިޝަނުގެ މާފަންނު އުތުރު ދާއިރާގެ ނައިބު ރައީސްގެ ގޮތުގަ އެވެ.
ޒުވާނުންނާއި ދާއިރާގެ ރައްޔިތުންނާއި އަބަދުވެސް ގާތް ގުޅުމެއް ބާއްވަމުން އަންނަ އަޖުވަދު އަކީ ތައުލީމީ ބޭފުޅެކެވެ. އޭނާ ވަނީ ކޮމްޕިއުޓާ ސްޓަޑީސްގެ ދާއިރާއިންނާޢި ހިއުމަން ރިސޯސަސްގެ ދާއިރާގެ އިތުރުން ބިޒްނަސް މެނޭޖްމަންޓުގެ ދާއިރާއިން ޑިޕްލޮމާ ހާސިލުކޮށްފަ އެވެ. އަދި 2013 އިން ފެށިގެން 2018 ވަނަ އަހަރާ ހަމަޔަށް ފިނޭންސް މިނިސްޓްރީގެ ޓެކްނިކަލް ކޯޑިނޭޓަރެއްގެ މަގާމެވެސް އަޖުވަދު އަދާކުރި އެވެ.
އަޖުވަދު ވިދާޅުވި ގޮތުގައި އޭނާ އަބަދުވެސް ހުންނާނީ ތެދުވެރިކަމާއެކު ރައްޔިތުންނަށްޓަކައި މަސައްކަތްކޮށްދޭނެ މީހެއްގެ ގޮތުގަ އެވެ. އަދި އަޒުމަކީ، ދާއިރާއަށް ހެޔޮ ބަދަލު ގެނެސްދީ ދާއިރާގެ ކޮންމެ ފަރުދެއްގެ ދިރިއުޅުމުގެ ފެންވަރު ރަނގަޅުވާނެ ތައުލީމާއި ސިއްހީ ފަރުވާ އާއި އިގުތިސާދީ ފުރުސަތުތައް އަދުލުވެރި ގޮތުގައި ފޯރުވައިދިނުން ކަމަށް އޭނާ ވިދާޅުވި އެވެ.
އޭގެ އިތުން އެންމެންގެ ބައިވެރިވުން ކަށަވަރުކޮށް އިސްރައްވެހިންނާއި ދެޖިންސުގެ ޒުވާނުންނަށްވެސް ހަމަހަމަކޮށް ފުރުސަތު ހޯދައިދިނުމަށް މަސައްކަތް ކުރުމުގައި އަބަދުވެސް ދެމިހުންނާނެ ކަމަށް އޭނާ ބުންޏެވެ.
"އެ އެއަޒުމުގައި ހުރެގެން ކެރިގެން ކަންކަމާއި ކުރިމަތިލާނަން ހަމަ ގައިމުވެސް ވިކިގެންނެއް ނުދާނަން،" އޭނާ ވިދާޅުވި އެވެ.
