ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ބައެއް މެންބަރުން ކުރެއްވި ސުވާލުތަކަށް ޖަވާބު ދެއްވަން ރިޔާސަތުން ވަޒީރަށް ފުރުސަތު ނުދެއްވުމުން މަޖިލީހުގެ ރައީސް މުހައްމަދު އަސްލަމަށް ބައެއް މެންބަރުން ވަރަށް ބޮޑަށް ފާޑުވިދާޅުވެ، ނުރުހުން ފާޅުކުރައްވައިފި އެވެ.
މިއަދުގެ ޖަލްސާގައި މެންބަރުންނަށް ޖަވާބުދާރީ ވެވަޑައިގަންނަވަން ވަޑައިގެންނެވީ އިކޮނޮމިކް މިނިސްޓަރު މުހައްމަދު ސައީދެވެ. އޭނާ ވަޑައިގެންނެވީ ހޯރަފުށި ދާއިރާގެ މެންބަރު އަހުމަދު ސަލީމު ކުރެއްވި ސުވާލަކަށް ޖަވާބު ދެއްވުމަށެވެ. ސަލީމް ސުވާލު ކުރެއްވީ އިހަވަންދިއްޕޮޅުގައި ބަންކަރިން ހިދުމަތް ފަށަން ކުރީގެ ސަަރުކާރުން ބަޔަކާ ހަވާލުކޮށްފައި އޮތް ގޮތަށް އެ މަސައްކަތް ކުރިއަށް ގެންދާނެތޯ އެވެ.
އެ ސުވާލަށް ވަޒީރު ޖަވާބު ދެއްވުމުން މަޖިލީހުގައި އަމަލުކުރާ އުސޫލުން، ގުޅުން ހުރި ސުވާލު ކުރުމަށް ހުޅުވައިލި ފުރުސަތުގައި ބައެއް މެންބަރުން ކުރެއްވި ސުވާލުތަކަށް ޖަވާބު ދެއްވަން، ރިޔާސަތުން މަޖިލީހުގެ ރައީސް މުހައްމަދު އަަސްލަމް ފުރުސަތެއް ނުދެއްވަ އެވެ.
އެގޮތަށް ފުރަތަމަ ނިންމެވީ ކެލާ ދާއިރާގެ އެމްޑީޕީ މެންބަރު އިބްރާހީމް ޝަރީފު ކުރެއްވި ސުވާލަކާ މެދުގަ އެވެ. މެންބަރު އަލީ ރިޒާ ކުރެއްވީ ވެސް މެންބަރު ސަލީމް ކުރެއްވި ސުވާލަށް ވަޒީރު ދެއްވި ޖަވާބާ ގުޅޭ ސުވާލެއް ނޫނެވެ. ސުވާލު ކުރެއްވީ ވެސް އެހެން ވިދާޅުވެފަ އެވެ.
އެ ސުވާލަށް ޖަވާބު ދެއްވަން ވަޒީރަށް ފުރުސަތު ނުދެއްވައި އަސްލަމް ދެއްވީ ހޮޅުދޫ ދާއިރާގެ މެންބަރު ޔޫނުސު އަލީ ސުވާލު ކުރެއްވުމުގެ ފުރުސަތެެވެ. އޭނާ ވެސް ކުރެއްވީ ވަޒީރަށް ކުރިން ފޮނުވާފައި އޮތް ސުވާލާ ނުގުޅޭ ސުވާލެކެވެ. އެ ހިސާބުން އަސްލަމް ވިދާޅުވީ ސުވާލު ކުރެއްވުމުގެ ކަންތައް ގާނޫނާ ގަވައިދާ އެއްގޮތަށް ކުރިއަށް ގެންދަވަން މެންބަރުންނަށް އިލްތިމާސް ކުރައްވާ ކަމަށެވެ.
"އެހެންކަމުން މި ހަމަތަކުގެ ބޭރުން ވަޒީރުންނާ ސުވާލުކުރުމުގެ ޖާގަ އަޅުގަނޑަށް މި ގޮނޑީގައި އިނދެގެން ފުރުސަތު އަރުވަން ވަރަށް އުނދަގޫ،" އަސްލަމް ވިދާޅުވި އެވެ.
އަސްލަމް އެހެން ވިދާޅުވުމުން، "ނިޒާމާ ބެހޭ ނުކުތާއެއް" ކަމަށް ވިދާޅުވެ ފުރުސަތެއް ހޯއްދަވައިގެން މެންބަރު ޔޫނުުސު ނުރުހުން ފާޅުކުރެއްވި އެވެ. އޭގެ ފަހުން މިލަންދޫ ދާއިރާގެ މެންބަރު އަލީ ރިޒާ ކުރެއްވި ސުވާލެއް ވެސް މައުލޫއާ ނުގުޅޭ ކަމަށް އަސްލަމް ނިންމެވި އެވެ.
ސުވާލަށް ޖަވާބުދެއްވަން ވަޒީރަށް ފުރުސަތު ދެއްވުމުގައި އަސްލަމް އަމަލުކުރެއްވި ގޮތާ މެދު އެންމެ ބޮޑަށް ނުރުހުން ފާޅުކުރެއްވި އެއް މެންބަރަކީ ވެލިދޫ ދާއިރާގެ އެމްޑީޕީ މުހައްމަދު އަބްދުﷲ ޝަފީގެވެ.
"އަޅުގަނޑު ދެެކޭ ގޮތުގައި އިއްޒަތްތެރި ރައީސް އަމަލުކުރައްވަމުން ތިޔަ ގެންދަވަނީ ރައްޔިތުންގެ މަޖިލީހުގެ މެންބަރުންނަށް ގާނޫނުއަސާސީން ލިބިދީފައިވާ ހައްގު ވަރަށް ބޮޑަށް ހަނިކުރައްވައިގެން،" މެންބަރު މުހައްމަދު ވިދާޅުވި އެވެ.
އެއާ އެކު އޭނާ ވިދާޅުވީ އިހަވަންދިއްޕޮޅު ޓްރާންޝިޕްމެންޓް ބަނދަރާ ގުޅޭ ގޮތުން ކުރައްވާނެ ސުވާލެއް ނެތް ކަމަށާއި އެހެން ނަމަވެސް ވަޒީރުގެ ދާއިރާއާ ގުޅޭ ގޮތުން ކުރައްވާނެ ސުވާލު އެބަހުރި ކަމަށެވެ. އެހެން ވިދާޅުވެ އޭނާ ސުވާލުކުރެއްވީ ގަވައިދާ ހިލާފަށް ބިދޭސީން ހިންގާ ވިޔަފާރިތައް ހުއްޓުވަން އޮތް ސިޔާސަތަކީ ކޮބައިތޯ އެވެ.
"އަނެއްކާ ވެސް ތަކުރާރުކޮށް ދަންނަވަން އޮތީ މިއަދު ކުރެއްވި ސުވާލާއި އެ ސުވާލާ ގުޅިގެން ވަޒީރު ދެއްވި ޖަވާބާ ގުޅުން ހުރި ސުވާލެއް ނޫނޭ،" އަސްލަމް ވިދާޅުވި އެވެ.
titledesc
ގުޅުން ހުރި ސުވާލެއް ނޫނީ ނުކުރެއްވުމަށް ކުރައްވާ އިލްތިމާސް ވެސް އަސްލަމް ތަކުރާރުކުރެއްވި އެވެ. އޭނާ ވިދާޅުވީ ގާނޫނާއި މަޖިލީހުގެ ގަވައިދުގައި ވަކި ގޮތެއް ކަނޑައަޅާފައި އޮތުމުން އަމަލުކުރެވޭނީ އެގޮތަށް ކަމަށެެވެ. މަޖިލީހުގެ ރިޔާސަތުން ކުރިން (އަސްލަމް ރިޔާސަތަށް ވަޑައިނުގަންނަވާ އިރު) އަމަލުކުރަމުން އައި ގޮތެއް އެނގިވަޑައިނުގަންނަވާ ކަމަށް ވެސް ވިދާޅުވި އެެވެ.
"އެއަކަށް އަޅުގަނޑު އެއްޗެއް ދަންނަވާކަށް ނެތިން، އަޅުގަނޑަށް މިތާ އިނދެގެން އަމަލުކުރެވޭނީ މަޖިލީހުގެ ގަވައިދުގަައި [އޮތް ގޮތަށް]،" އަސްލަމް ވިދާޅުވި އެވެ.
އެހެން ވިދާޅުވެ އޭނާ ކުރިއަށް ގެންދެވީ ގުޅުން ނެތް ކަމަށް ދެކެވަޑައިގެންނެވި ސުވާލުތަކަށް ޖަވާބު ދެއްވަން ވަޒީރަށް ފުރުސަތު ނުދެއްވަ އެވެ.
މެންބަރުން ނުރުހުން ފާޅުކުރައްވައި ވިދާޅުވަމުން ގެންދެވީ އެއީ މަޖިލީހުގައި ކުރިން އަމަލުކުރި ގޮތެއް ނޫން ކަމަށެވެ. އެހެން އެ ވިދާޅުވީ މަޖިލީހުގެ ރައީސަކަށް ކުރީގެ ރައީސް މުހައްމަދު ނަޝީދު ހުންނެވި އިރު އެގޮތަށް އަމަލުކުރައްވާފައި ނުވާތީ އެވެ. އޭރު ރިޔާސަތުން އެކަން ދޫކޮށްލަނީ ވަޒީރަށެވެ. ގުޅޭ ސުވާލެއް ކަމަށް ވަޒީރަށް ފެނިވަޑައިނުގެންފި ނަމަ ޖަވާބު ނުދެއްވާ ގޮތަށެވެ.
ނަވާރަ ވަނަ މަޖިލީހުގައި މީގެ ކުރިން މެންބަރުން ސުވާލު ކުރުމުގެ ދާއިރާ އޮންނަނީ ވަޒީރަކު ޖަވާބު ދޭ މިންވަރެއްގެ މައްޗަށެވެ. ނަމަވެސް ގާނޫނާއި މަޖިލީހުގެ ގަވާއިދުގައި ސުވާލު ކުރެވޭނެ ހަމަތައް ސާފުކޮށް ބަޔާންކޮށްފައިވެ އެވެ.
ބައެއް މެންބަރުން މިހާތަނަށް އެ ހަމަ ހިފަހައްޓާފައި ނެތްއިރު، މިފަހަރު ރިޔާސަތުން ފެނިގެން ދިޔައީ ގާނޫނާ ގަވާއިދުގައި، ސުވާލުކުރަން ކަނޑައަޅާފައިވާ ހަމަ ހިފެހެއްޓި ތަނެވެ.
