މޫސުމީ ބަދަލާއެކު އިނގިރޭސި ވިލާތުގެ ބައެއް ސަރަހައްދުތަކަކީ 2040 އާއި 2050ގެ އަހަރުތަކުގެ ތެރޭގައި ޑެންގީ ހުން، ޗިކުންގުންޔާ އަދި ޒިކާ ވައިރަސް ފަތުރާ މަދިރީގެ ހާލިތަކަކަށް ވެދާނެ ކަމުގެ އިންޒާރު ދީފި އެވެ.
އެހެން ބުނެފައި ވަނީ އިނގިރޭސިވިލާތުގެ ހެލްތު ސެކިއުރިޓީ އެޖެންސީން ތައްޔާރުކުރި ރިޕޯޓެއްގަ އެވެ. އެއީ، ޖައްވަށް ބޭރުކުރާ ވިހަ ގޭހުގެ ސަބަބުން 2100 ވަނަ އަހަރާ ހަމަޔަށް ހޫނުމިން މަތިވެ، ކުރިމަތިވެދާނެ އެންމެ ނުރައްކާތެރި ހާލަތުގެ މައްޗަށް ކުރާ ލަފައެކެވެ.
ނުވަ ދިހަ ތަޖުރިބާކާރުން ބައިވެރިވެގެން އެކުލަވާލި އެ ރިޕޯޓު، މޫސުމީ ބަދަލުގެ ސަބަބުން ސިއްހަތަށް ކުރަމުންދާ ނޭދެވޭ އަސަރުތަކާއި ކުރިމަތިވެދާނެ ކަންކަމުގެ ހެކިތަކުގެ މައްޗަށް ބިނާކޮށްފައިވެ އެވެ.
މޫސުމަށް އަންނަ ބަދަލުން އަރައިގަތުމަށް ގައުމުތަކުން ވެފައިވާ ވައުދު އެކަށީގެންވާ ގޮތެއްގައި ތަންފީޒު ނުކުރެވިއްޖެ ހާލަތެއްގައި ވިހަ ގޭސް އިތުރުވެ، ޖައްވު ހޫނުވެ، މޫސުމީ ބަދަލާއެކު ކުރިމަތިވެދާނެ "އެންމެ ގޯސް ހާލަތު" ތަސައްވުރުކޮށްފައި ވާއިރު، އެފަދަ ހާލަތެއްގައި ހޫނުމިން މަތިވެ މަރުވާ މީހުން އިތުރުވާނެ ކަމާއި ވާރޭވެހުމުގެ ތޮބީއަތް އޮޅި، ފެންބޮޑުވުން އިތުރުވެގެންދާނެ ކަމަށް ލަފާކުރެ އެވެ.
މިހާރުގެ އަންދާޒާތަކުން ދައްކާ ގޮތުގައި 2100 ވަނަ އަހަރާ ހަމައަށް ދުނިޔެ 2-4 ޑިގްރީ ސެލްސިއަސްގެ މިންވަރަކަށް ހޫނުމިން މަތިވާނެ އެވެ. އެ ހާލަތު ކުރިމަތި ނުވެދާނެ ކަމަށް ބެލި ނަމަވެސް ތައްޔާރުވެ ތިބުމަކީ ބުއްދިވެރި ކަމެއް ކަމަށް ތަޖުރިބާކާރުން ލަފާދެ އެވެ.
ފަހަކަށް އައިސް ފަރަންސޭސިވިލާތުގައި ޑެންގީ ހުން ޖެހުމާއި އިޓަލީގައި ޗިކުންގުންޔާ ކޭސްތައް ވަނީ އިތުރުވެފަ އެވެ.
