ވަރިވާން ކޯޓަށް ދިޔަ އަންހެނަކަށް ގުޅައި ކޯޓުން ބޭރުން މުއާމަލާތްތަކެއް ހިންގި ކަމުގެ ތުހުމަތުގައި މަގާމުން ވަކިކުރަން ނިންމި، ހދ. ކުޅުދުއްފުށި ސިޓީ މެޖިސްޓްރޭޓް ކޯޓުގެ މެޖިސްޓްރޭޓް އަލީ އާދަމްގެ މައްސަލާގައި ޖުޑިޝަރީ ކޮމިޓީން, ޖޭއެސްސީގެ ރިޕޯޓަށް ތާއިދުކޮށް, މައްސަލަ ތަޅުމަށް ފޮނުވައިފި އެވެ.
އަލީ އާދަމް މަގާމުން ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމީ ކުޅުދުއްފުށީ މެޖިސްޓްރޭޓު ކޯޓަށް ވަރިވާން ދިޔަ އަންހެނަކަށް ގުޅައި އޭނާއަށް ޒާތީ އެތައް މެސެޖުތަކެއް ކޮށްފައިވާ ކަމަށް ތަހުގީގުގައި މެޖިސްޓްރޭޓު އަމިއްލައަށް އިއުތުރާފުވެފައިވާތީ އެވެ.
މި މައްސަލަ ދިރާސާ ކުރުމުގެ މަރުހަލާގައި ޖުޑިޝަރީ ކޮމިޓީން ވަނީ މެޖިސްޓްރޭޓް ހާޒިރުކޮށް, ޖަވާބުދާރީވުމުގެ ފުރުސަތު ދީފަ އެވެ. މިއީ ޖޭއެސްސީން ފަނޑިޔާރަކު ވަކިކުރަން ފޮނުވުމުން، ކޮމިޓީއަށް ހާޒިރުވެ ޖަވާބުދާރީވާން ފުރުސަތެއް ދިން ފުރަތަމަ ފަހަރެވެ.
މަޖިލީހަށް ހާޒިރުވެ މެޖިސްޓްރޭޓް ވިދާޅުވީ, ވަރިވާން ދިޔަ އަންހެނަކަށް ކުރި މެސެޖުތަކަކީ, ހުށަހަޅާފައި އޮތް މައްސަލައިގެ ހުކުމާ ގުޅިގެން ޖޭއެސްސީއަށް މައްސަލަ ހުށަހަޅާފާނެ ކަމުގެ ބިރު އޮތުމުން ރަނގަޅު ގުޅުމެއް ބޭއްވުމަށް ކުރި މެސެޖުތަކެއް ކަމަށެވެ. އަދި އެއީ އެންމެ ރަނގަޅު ގޮތް ނޫންކަމުގައި ވިޔަސް 'ގްރޮސް މިސްކޮންޑަކްޓް' އެއް ނޫން ކަމަށް ވެސް އަލީ އާދަމް ވިދާޅުވި އެވެ.
އޭނާ ވިދާޅުވި ގޮތުގައި މެސެޖުތައް ޑިލީޓް ކުރަން އެދުނީވެސް ނުބައި ނިޔަތެއްގައި ނޫން ކަމަށާއި, އެއީ މީހަކަށް ފެނިގެން މައްސަލައެއް އުފެދިދާނެތީ އެދުނު ގޮތެއް ކަމަށެވެ.
މި މައްސަލާގައި ޖުޑިޝަރީ ކޮމިޓީން ބުނީ, މެޖިސްޓްރޭޓުގެ މައްސަލަ ޖޭއެސްސީން ބެލީ އިޖުރާއަތްތަކާ އެއްގޮތަށް ކަމަށެވެ. އެހެންކަމުން, ޖޭއެސްސީ އަދި ޖުޑިޝަރީ ކޮމިޓީގެ ނިންމުމަށް ރިއާޔަތްކޮށް, މެޖިސްޓްރޭޓު މަގާމުން ވަކިކޮށްދޭން އެދި ޖޭއެސްސީން ހުށަހަޅާފައިވާ މައްސަލައާމެދު ގޮތް ނިންމުމަށް މަޖިލީހުގެ ތަޅުމަށް ވަނީ ހުށަހަޅާފަ އެވެ.
އަންހެނަކަށް މެސެޖު ކުރި މައްސަލައަކާ ގުޅިގެން މިދިޔަ މެއި 23، ވަނަ ދުވަހުން ފެށިގެން އަލީ އާދަމް ހުންނެވީ ސަސްޕެންޝަނުގަ އެވެ.
ކުރިން އޭނާ ހުންނެވީ ހދ. ޖުޑީޝަލް ދާއިރާގެ އިސް މެޖިސްޓްރޭޓްގެ މަގާމުގަ އެވެ. އޭނާގެ ދަރަޖަ ދަށްކޮށް، ކުޅުދުއްފުށީ ކޯޓުގެ މެޖިސްޓްރޭޓަކަށް ބަދަލުކުރީ، ޖޭއެސްސީއަށް ހުށަހެޅިފައިވާ އިތުރު މައްސަލައެއް ބެލުމަށްފަހެވެ. ކޮމިޝަނުން ބުނާ ގޮތުގައި، އެއީ ފަނޑިޔާރު ފަރުވާ ކުޑަކުރި ކަމަށް ބުނެ، ކޮމިޝަނުން ބެލި މައްސަލައެއްގައި އެޅި ފިޔަވަޅެކެވެ.
