މުޅި ދުނިޔޭގައި ކުރިއަށް ގެންދާ ބޮއިކޮޓު ކެމްޕޭނުގެ ސަބަބުން ސްޓާބަކްސްއަށް ފާއިތުވި ދެ ހަފުތާގެ ތެރޭގައި 11 ބިލިއަން ޑޮލަރުގެ ގެއްލުން ލިބިފައިވާ ކަމަށް އެ ކުންފުނިން ބުނެފި އެވެ.
ސްޓާބަކްސްއާ ހަވާލާދީ ވޯލް ސްޓްރީޓު ޖާނަލްއިން ރިޕޯޓުކޮށްފައި ވާގޮތުގައި އެ ކުންފުނީގެ މާކެޓު އަގު ވަނީ ވިދިވިދިގެން 12 ދުވަހު ދަށަށް ގޮސްފަ އެވެ.
ސްޓާބަކްސްއާ ދެކޮޅަށް ބޮއިކޮޓު ކުރުމުގެ ކެމްޕޭނެއް ފެށީ، ފަލަސްތީނުގެ ކުށެއް ނެތް އާންމުންނަށް އަމާޒުކޮށް އިޒްރޭލުން ހިނގަމުންދާ ގަތުލުއާއްމުތަކާ ދެކޮޅަށް އެ ކުންފުނީގެ މުވައްޒަފުންތަކެއް މީސްމީޑިއާގައި ކުރި ޕޯސްޓަކާ ގުޅިގެން، ސްޓާބަކްސްއިން އެ މުވައްޒަފުންނަށް ފިޔަވަޅު އެޅުމުންނެވެ.
އެކަމާ ގުޅިގެން ސްޓާބަކްސްގެ މުވައްޒަފުން ވަނީ މިދިޔަ މަހުގެ 16 ވަނަ ދުވަހު ހަޅުތާލު ވެސް ކޮށްފަ އެވެ. އެ ކަންތައްތަކާ ގުޅިގެން ސްޓާބަކްސްއިން ބުނެފައި ވަނީ އެ ކުންފުނިން އިޒްރޭލަށް ވާގިވެރި ނުވާ ކަމަށެވެ. ނަމަވެސް، އެވާހަކަތަކާ ގުޅިގެން ބޮއިކޮޓު ކެމްޕޭނަށް ބަދަލެއް އައިސްފައެއް ނުވެ އެވެ.
ބައިނަލްއަގުވާމީ ފެންވަރުގައި ކުރިއަށްދާ ބޮއިކޮޓު ކެމްޕޭނުގެ މައްސަލައަށް ހައްލެއް ހޯދުމަށް އެ ކުންފުނިން ވަނީ މުވައްޒަފުންނާ މަޝްވަރާ ކުރުމަށް ވެސް އެދިފަ އެވެ. ނަމަވެސް މަޝްވަރާތަކާ ގުޅޭ އެއްވެސް ތަފުސީލެއް މިހައިތަނަށް ހާމަކޮށްފައެއް ނުވެ އެވެ.
ބޮއިކޮޓު ކެމްޕޭނާ ގުޅިގެން ސްޓާބަކްސްއަށް ބޮޑު ގެއްލުމެއް ވެފައިވާއިރު، ހުޅަނގަށް ނިސްބަތްވާ މަޝްހޫރު އެހެން ބައެއް ބޮޑެތި ކުންފުނިތަކަށް ވެސް ދަނީ އެކަމާ ގުޅިގެން ބޮޑެތި ގެއްލުންތަކާ ކުރިމަތި ވާން ފަށައިފަ އެވެ. އޭގެތެރޭގައި ކޭއެފްސީއާއި މެކްޑޮނާލްޑްސްގެ އިތުރުން ކޮކާކޯލާ ހިމެނެ އެވެ.
