ވެރިކަންކުރާ ޕާޓީގެ ގޮތުގައި ރައްޔިތުންގެ މަޖިލީހުގެ އިންތިހާބަށް ނުކުންނަށް ޕީޕަލަސް ނެޝަނަލް ކޮންގްރެސް (ޕީއެންސީ) އަށް މަޖިލީހުގެ ސުޕަމެޖޯރިޓީ ހޯދޭނެ ކަމަށް އެޕާޓީގެ އަދި ރާއްޖޭގެ ރައީސް ޑރ.މުހައްމަދު މުއިއްޒު މިރޭ ވިދާޅުވެއްޖެ އެވެ.
ޕީއެންސީގެ އޮފީސް ރަސްމީކޮށް ހުޅުވަން މިރޭ ބޭއްވި ރަސްމިއްޔާތުގައި ރައީސް ވިދާޅުވީ ރައްޔިތުންގެ މަޖިލީހުގެ އިންތިހާބަށް ޕީއެންސީ/އާއި ޕީޕީއެމުން މަސަކަތް ކުރާނީ ގުޅިގެން އެކު އެކީގައި ކަމަށެވެ. އެ މަސައްކަތް ފުޅާ ދާއިިރާއެއްގައި މުޅި ރާއްޖޭގައި ކުރިއަށް ގެންދާނެ ކަމަށް ވެސް އެމަނިކުފާނު ވިދާޅުވި އެވެ.
"އޭގެ ނަތީޖާއަކަށް ވާނީ އިރާދަކުރެއްވިއްޔާ އަޅުގަނޑުމެން އެންމެން، ޕީޕީއެމްއާ ޕީއެންސީ ގުޅިގެން ރާއްޖޭގައި ކުރިއަށް އިންތިހާބުގައި ބޮޑު ނަތީޖާއަކުން މަޖިލީހުގެ ސުޕަ މެޖޯރިޓީއާ ހަމައަށް އިރާދަކުރެއްވިއްޔާ ކާމިޔާބުކުރުން،" ރައީސް ވިދާޅުވި އެވެ.
އެ މަސައްކަތުގައި ގޮންޖެހުންތައް ކުރިމަތިވާނެ ކަމަށާއި ގޮންޖެހުންތައް މިހާރު ވެސް އެބަހުރި ކަމަށް އެމަނިކުފާނު ވިދާޅުވި އެވެ.
"ގޮންޖެހުންތައް ހުންނާނެ، ގޮންޖެހުންތައް މިހާރު ވެސް އެބަހުރި. ގޮންޖެހުންތަކަކީ އަަޅުގަނޑުމެން ކުރިއެރުމަށް ލިބޭ ހިތްވަރަކަށް ވާން ވާނީ،" ރައީސް ވިދާޅުވި އެވެ.
ނިޔަތަކީ ރައްޔިތުންގެ ކުރިއެރުމާ ލާބަޔަށް މަސައްކަތް ކުރުން ކަމަށް ވިދާޅުވެ، އެ މަސައްކަތުގައި ހުރިހާ އެންމެނާ ވެސް ވާހަކަ ދައްކަން ދެޕާޓީގެ ހަރަކާތްތެރިންނަށް އެމަނިކުފާނު އިލްތިމާސް ކުުރެއްވި އެވެ.
ޕީއެންސީގެ އާ އޮފީސް ހުޅުވީ ސީޓްރެކް ބިލްޑިންގް ގެ ހަތް ވަނަ ފަންގިފިލާގަ އެވެ.
ޕީއެންސީގެ އޮފީސް މީގެ ކުރިން ހިންގަމުން ދިޔައީ ކޯލިޝަނުގައި ދެން އޮތް ޕީޕީއެމްގެ މައި އޮފީހާއި އެއް ފުރާޅެއްގެ ދަށުން ހ. ހުރަފާގަ އެވެ.
އޭގެ ފަހުން ކުރިން އެ ކޯލިޝަނުގެ ލީޑަރުކަމުގައި ހުންނެވި އަބްދުﷲ ޔާމީން އާއި ރައީސް ޑރ. މުހައްމަދު މުއިއްޒާއި ދެމެދު ހަމަނުޖެހުން އުފެދެން ފެށި ހިސާބުން ޕީއެންސީގެ އޮފީސް ކާނިވަލުގައި ހުރި ޖަގަހައެއްގައި ހިންގި އެވެ.
