ދެކުނު އިންޑިއާގެ އަންދުރަ ޕްރަދޭޝްއަށް, މިޝޯންގް ގެ ނަމުން ނަން ދީފައިވާ ތޫފާނު އެރުމުގެ ސަބަބުން ލިބުނު ގެއްލުންތަކުގައި މިހައިތަނަށް ނުވަ މީހަކު މަރުވެއްޖެ އެވެ.
އަންދުރަ ޕްރަދޭޝްގެ ބަޕަޓްލާ އައްސޭރިއަށް ތޫފާނު އަރާފައި ވަނީ އިއްޔެ މެންދުރު އެވެ. ތޫފާތު އެރުމުގެ ކުރިން އިންޑިއާގެ ސަލާމަތީ އިދާރާތަކުން ވަނީ އެ ސަރަހައްދުތަކުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލު ކުރުމުގެ މަސައްކަތްތައް ކުރިއަށް ގެންގޮސްފަ އެވެ.
ތޫފާނު އެރުމުގެ ކުރިން ވެސް ވެހުނު ވާރެއާ ގުޅިގެން ޓެމިލް ނާޑޫގެ ވެރިރަށް، ޗެންނާއީގައި ވަނީ ވަރަށް ބޮޑަށް ފެންބޮޑުވެފަ އެވެ. ތޫފާނުގެ ސަބަބުން އެ ސްޓޭޓުގެ ހާލަތު އިތުރަށް ގޯސްވެފައި ވާއިރު، ގިނަ މަގުތަކުގައި ފެންގަނޑު ހުރީ އާންމު އިސްކޮޅުގެ މީހެއްގެ އުނަގަނޑަށް ވުރެ ވެސް މައްޗަށެވެ. ބައެއް މަގުތަކުގައި ޕާކުކޮށްފައި ހުރި އުޅަނދުތައް ވެސް ފެންގަނޑާއެކު ގެންދާތަން ފެންނަ ވީޑިއޯތައް މީސްމީޑިއާގައި އާންމުވެފައިވެ އެވެ.
އޭގެއިތުރުން ޗެންނާއީގެ އެއާޕޯޓުގައި ވެސް ފެންބޮޑުވެ ވަނީ އޮޕަރޭޝަން ހުއްޓުމަކަށް އައިސްފަ އެވެ. އާންމުވެފައިވާ ވީޑިއޯތަކުން ފެންނަ ގޮތުގައި އޭޕްރަންގައި ޕާކުކޮށްފައި ހުރި ބޯޓުތަކުގެ ލޭންޑިން ގިޔަރު ފޮރުވޭ ވަރަށް އެއާޕޯޓުގައި ފެން ބޮޑުވެފައި ހުއްޓެވެ.
ގާތްގަނޑަކަށް 62 މޭލު ބާރުމިނުގައި ވައި ޖެހޭނެ ކަމަށް ލަފާ ކުރާ އެ ތޫފާނުގެ ސަބަބުން މި ހިނގާ 24 ގަޑިއިރު ވެސް އެ ސްޓޭޓަށް 200 މިލިމީޓަރުގެ ވާރޭ ވެހޭނެ ކަމަށް އިންޑިއާގެ މޫސުމާ ބެހޭ ގައުމީ އިދާރާއިން ވަނީ ލަފާ ކޮށްފަ އެވެ.
ނަމަވެސް އެ އިދާރާއިން ލަފާ ކޮށްފައި ވަނީ މިއަދުން ފެށިގެން ތޫފާނުގެ ބާރު މަޑުމަޑުން ކެނޑެމުން ގޮސް މާދަމާގެ ނިޔަލަށް މޫސުން އާންމު ހާލަތަކަށް ރުޖޫއަވުމުގެ ފުރުސަތު އޮންނާނެ ކަމަށެވެ.
