ތޫފާނު މިޝޯންގް އިންޑިއާގެ އެންމެ ދެކުނުގައި އޮންނަ އަންދުރަ ޕްރަދޭޝްއަށް މިއަދު އަރާނެ ކަމަށް އެ ގައުމުގެ މޫސުމާ ބެހޭ ގައުމީ އިދާރާއިން ލަފާ ކޮށްފި އެވެ.
އިންޑިއާގެ މޫސުމާ ބެހޭ ގައުމީ އިދާރާއިން ބުނެފައި ވަނީ އެ ތޫފާތު އިންޑިއާއަށް އަރާނެ ކަމަށް ލަފާ ކުރަނީ މާދަމާގެ ހެނދުނާއި މެންދުރާ ދެމެދުގެ ވަގުތެއްގައި ކަމަށެވެ. ތޫފާނުގައި 56 މޭލާއި 62 މޭލަށް ވައިގަދަ ވާނެ ކަމަށާއި ކުރިއަށް އޮތް 24 ގަޑިއިރުގެ ތެރޭގައި 200 މިލިލީޓަރުގެ ވާރޭ އަންދުރަ ޕްރަދޭޝްއަށް ވެހޭނެ ކަމަށް އެ އިދާރާއިން ވަނީ އިންޒާރު ދީފަ އެވެ.
އެ އިންޒާރާ ގުޅިގެން ޓެމިލްނާޑޫގެ ހަތަރު އަވަށުގެ ސްކޫލުތަކާއި އޮފީސްތަކުގެ އިތުރުން ބޭންކުތައް ވެސް ވަނީ ބަންދުކޮށް ތައްޔާރީ ހާލަތަށް ގެނެސްފަ އެވެ. އެގޮތުން ޓެމިލްނާޑޫގެ ދެކުނު އައްސޭރީގައި ދިރިއުޅޭ މީހުން އެހެން ސަރަހައްދުތަކަށް ބަދަލު ކުރުމުގެ މަސައްކަތް ކުރަމުން ދާކަމަށް އިންޑިއާގެ ސަރުކާރު އިދާރާތަކާ ހަވާލާދީ ރޮއިޓާސްގައި ރިޕޯޓުކޮށްފައިވެ އެވެ.
މިހާތަނަށް ދެކުނު އައްސޭރީގައި ދިރިއުޅެމުންދިޔަ ގާތްގަނޑަކަށް 7000 މީހުން ރައްކާތެރި ސަރަހައްދުތަކަށް ބަދަލު ކުރެވިފައި ވާކަމަށާއި ތޫފާނުގެ މިސްރާބު ހުންނަ ގޮތަކުން ކުރިއަށް އޮތް ވަގުތުތަކުގައި ޖުމުލަ 28،000 އަށްވުރެ ގިނަ މީހުން އެހެން ހިސާބުތަކަށް ބަދަލު ކުރުމަށް ތައްޔާރަށް ތިބި ކަމަށް އަންދުރަ ޕްރަދޭޝްގެ އިދާރާތަކާ ހަވާލާދީ ރޮއިޓާސްގައި ރިޕޯޓުކޮށްފައިވެ އެވެ.
ފާއިތުވި 24 ގަޑިއިރު ތެރޭގައި ޓެމިލްނާޑޫގެ ވެރިރަށް، ޗެންނާއީއަށް ވަނީ ތޫފާނުގެ އަސަރުކޮށް ބޮޑު ސަރަހައްދެއްގައި ފެން ބޮޑުވެ، ހަތަރު މީހުން މަރުވެފަ އެވެ.
އިންޑިއާއަށް ކުރިއަށް އޮތް ދުވަސްތަކުގައި މޫސުން ލަފާ ކުރާ ގޮތް ގޯސްވުމުގެ ސަބަބުން ތައިވާނުގެ ފޮކްސްކޮން އާއި ޕެގަޓްރަންއިން ވަނީ އިންޑިއާގައި އެޕަލް އައިފޯން އުފެއްދުން ވެސް ވަގުތީ ގޮތުން މެދުކަނޑާލައިފަ އެވެ.
