ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދުނިޔޭގެ ފުޓުބޯޅަ ފެޑެރޭޝަން (ފީފާ) އިން ފޮނުވާ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން އެފްއޭމްގެ ރައީސް ބައްސާމް އަލީ ޖަލީލާއި އެ ޖަމިއްޔާގެ އެހެން ވެރިންނަށް ވަރަށް އަވަހަށް ދައުވާކުރެވޭ ވަރަށް ހެކި ލިބޭނެ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި އެވެ.
ޕްރޮސެކިއުޓާ ޖެނެރަލްގެ މަގާމުގައި ހުންނެވި ހުސައިން ޝަމީމް، މިއަދުގެ ނޫސްވެރިންގެ ބައްދަލުވުމުގައި ވިދާޅުވީ އެފްއޭއެމްގެ މައްސަލައިގައި މިހާތަނަށް ވަރަށް ގިނަ މައުލޫމާތު ލިބިފައިވާ ކަމަށާާއި އޭގެ ތެރޭގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފަރާތުން ލިބޭ މައުލޫމާތު ވެސް ހިމެނޭ ކަމަށެވެ. އަދި މައްސަލަ ފުލުހުން ވެސް ތަހުގީގު ކުރަމުން އަންނަ ކަމަށާއި އޭގެ ވެސް ކުރިއެރުން ލިބިފައިވާ ކަމަށް ޝަމީމް ވިދާޅުވި އެވެ.
"އަޅުގަނޑުމެން މި އުންމީދު ކުރަނީ ކުރިއަށް އޮތް ހަފްތާއެއް ދެ ހަފްތާއެއް ތެރޭގައި އެ މައްސަަލައިގައި ވެސް ކޯޓަށް މައްސަލައެއް ވެއްދޭ ވަރަށް އަޅުގަނޑުމެންނަށް ހެކި ހޯދިދާނެ ކަމަށް، އެއީ އަޅުގަނޑުމެންގެ އުންމީދަކީ، މި މައްސަލަ ބާރަށް ކުރިއަށް އެބަދޭ،" ޝަމީމް ވިދާޅުވި އެވެ.
ޝަމީމް ވިދާޅުވީ މި މައްސަލައިގައި އެންމެ ބޮޑު ތުހުމަތުތަކެއް އަމާޒުވަނީ އެފްއޭއެމްގެ ރައީސް ބައްސާމް އަށް ކަމަށާއި ހެކި ހޯދުމަށް ފަހު ދައުވާ ކުރެވޭނެ ކަމަށެވެ.
އޭނާ ވިދާޅުވީ އެފްއޭއެމް އިން މާލީ ކަންކަމުގައި ލިޔުން ބަލަހައްޓާފައި ހުރީ އާންމު ގޮތެއްގައި އެކަން ކުރަން ޖެހޭނެ ގޮތަކަށް ނޫން ކަމަށެވެ. އެހެންވެ، ފައިނޭންޝިއަލް ކްރައިމާ ގުޅޭ މި ކަހަލަ މައްސަލަތަކުގައި ކަންކަން ހޯދަން، ވަގުތު ނަގާނެ ކަމަށެވެ.
ޕްރޮސިކިއުޓާ ޖެނެރަލްގެ އަމުރަށް ފުލުހުން ތަހުގީގު ފަށައި މިދިޔަ މަހުގެ 22 ވަނަ ދުވަހު އެފްއޭއެމަށްވަނީ ވަދެފަ އެވެ. އަދި އެތަނަށް ވަދެ އެ އިދާރާގެ ގިނަ އަދަދެއްގެ ލިޔެކިޔުމާއި، ސާވާ ބެކަޕް އަދި ހާޑް ޑިސްކުތަކެއްވަނީ ގެންގޮސްފަ އެވެ.
ފުލުހުން ކުރަމުން އަންނަ ތަހުގީގާ ގުޅޭގޮތުން އެފްއޭއެމުން ނެރުނު ބަޔާނުގައި ބުނެފައިވަނީ އެ އިދާރާއަށް ލިބިފައިވާ އެފްއޭއެމަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައި ނުވާނެ ކަމަށާއި، މިއީ އަމިއްލަ މަސްލަހަތާއި، ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއް ކަމަށެވެ.
ފުލުހުން ކުރަމުން އަންނަ ތަހުގީގުގެ ތަފްސީލްތަކެއް ދާދިފަހުން އެ އިދާރާއިން ހާމަކޮށްފައިވާއިރު، އެފްއޭއެމުން ފައިސާއަށް ހިޔާނަތްތެރިވެފައިވާ ކަމުގެ ހެކި ފެންނަން ހުރިކަމަށް ވަނީ ހާމަކޮށްފަ އެވެ.
އެ އެގޮތުން މި މައްސަލައިގައި، އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ރިޔާޒް ވިދާޅުވީ ތަހުގީގުގައި މިހާތަނަށް ކުރި މަސައްކަތުން، އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އޭގެ ސާފު ކިތާބީ ހެކި ބޭންކް ސްޓޭޓްމަންޓްތަކުން ފެންނަން އެބަހުރި ކަމަށެވެ. އަދި މި މުއާމަލާތްތައް ތަފްސީލްގޮތެއްގައި ބަލަންޖެހޭތީ ޕްރޮސެކިއުޓާ ޖެނެރަލްގެ ލަފަޔާ އެކު ހާއްސަ އޮޑިޓެއް ހަދަން އެދިފައިވާނެ ކަމަށެވެ.
