އާބަންކޯގެ މެނޭޖިން ޑިރެކްޓަރަކަށް ފެލިދޫ ދާއިރާގެ މަޖިލިސް މެންބަރު، އިބްރާހިމް ފަޒުލް ރަޝީދު އަދި އެސްޓީއޯގެ މެނޭޖިން ޑިރެކްޓަރަކަށް ޝިމާދު އިބްރާހިމް ހަމަޖައްސަވައިފި އެވެ.
އެ ދެ ބޭފުޅުން އެ މަގާމުތަކަށް ހަމަޖައްސަވާފައިވާކަން އިއުލާނު ކޮށްފައި ވަނީ އާބަންކޯ އާއި އެސްޓީއޯގެ ރަސްމީ އެކްސް އެކައުންޓުން ކުރި ޕޯސްޓުތަކެއްގަ އެވެ. އެ ދެ ކުންފުނިން ވަނީ އެ ބޭފުޅުންނަށް މަރުހަބާ ކިޔައިފަ އެވެ.
ސަރުކާރު ހިއްސާވާ ކުންފުނިތަކަށް ވެރިން އައްޔަން ނުކުރެވި ލަސްވެފައި ވަނީ އެ ކުންފުނިތައް ބަލަހައްޓާ، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ބޯޑު މެމްބަރުން ހަމަނުވެ އޮތުމާ ގުޅިގެންނެވެ. ނަމަވެސް, ރައީސް ޑރ. މުހައްމަދު މުއިއްޒު މިހާރު ވަނީ އެ ބޯޑަށް މެމްބަރުން އައްޔަނުކޮށް ކުންފުނިތަކުގެ މެނޭޖިން ޑިރެކްޓަރުންގެ މަގާމަށް އައްޔަނުކުރައްވަން ބޭނުންފުޅުވާ 22 ބޭފުޅެއްގެ ނަން ޕީސީބީ އަށް ފޮނުވައިފަ އެވެ.
އާބަންކޯގެ މެނޭޖިން ޑިރެކްޓަރަކަށް ހަމަޖެއްސެވި ފަޒުލްއަކީ މަޖިލީހުގެ ޕީއެންސީ ޑެޕިއުޓީ ޕީޖީ ލީޑަރު ވެސް މެ އެވެ. ރައްޔިތުންގެ މަޖިލީހަށް ފަޒުލް އިންތިހާބުވެވަޑައިގަތީ ޕީއެންސީގެ ޓިކެޓުގައި 2019 ގަ އެވެ. އޭގެ ކުރިން، ރައީސް ޔާމީނުގެ ސަރުކާރުގައި ފަޒުލް ހުންނެވީ އެމްޑަބްލިއުއެސްސީގެ އެމްޑީގެ މަގާމުގަ އެވެ.
އެސްޓީއޯގެ މެނޭޖިން ޑިރެކްޓަރަކަށް އައްޔަން ކުރެއްވި ޝިމާދު އަކީ އެސްޓީއޯގައި ގިނަ ދުވަސްތަކެއް ވަންދެން ހިދުމަތް ކުރައްވާފައިވާ ބޭފުޅެކެވެ. އޭނާ ވަނީ މީގެ ކުރިން އެސްޓީއޯ އޮޑިޓު އޮފީހުގެ ޗެއާމަންކަމާއި ބޯޑު މެންބަރުކަން ވެސް ކުރައްވައިފަ އެވެ.
