ލަންޑަން (ނޮވެމްބަރު 28) - ޗެލްސީ އަށް ކުޅެމުން އަންނަ ބްރެޒިލްގެ ޑިފެންޑަރު، ތިއާގޯ ސިލްވާ އަށް މެޗުތަކުގައި ފުރުސަތު ދިނުމުގައި ކަންކަން ކުރާނެ ގޮތެއް ޗެލްސީގެ ކޯޗިން ޓީމުން މަޝްވަރާކުރަން ފަށައިފި އެެވެ.
ޕްރިމިއާ ލީގުގައި އެންމެ ފަހުން ޗެލްސީން ކުޅުނު މެޗުގައި 4-1 އިން ނިއުކާސަލް ޔުނައިޓެޑް އަތުން ބަލިވިއިރު، އެ މެޗުގައި އުމުރުން 39 އަހަރުގެ ތިއާގޯ ސިލްވާ ކުޅެފައިވެ އެވެ. އެ މެޗާ އެކު، ތިއާގޯ ސިލްވާ ވެފައިވަނީ ޗެލްސީގެ ތާރީހުގައި މެޗަކަށް ނުކުތް އެންމެ ދުވަސްވީ ކުޅުންތެރިޔާ އަށެވެ.
ނިއުކާސަލް މެޗުގައި ޗެލްސީގެ ފަަހަތުން މައްސަލަަތަކެއް ފެނިގެންދިޔައިރު، އޭގެ ތެރެއިން، ގިނަ ބަޔެއްގެ ލޮލުގައި އަޅައިގަތީ ތިއާގޯ ސިލްވާ އަށް ހެދުނު ގޯސްތަކެވެ. އެހެންވެ، އޭނާ އަށް ޗެލްސީގެ މެޗުތަކުން ފުރުސަތު ލިބުން މަދުކުރަން ޖެހޭ ކަމަށް ގިނަ ބަޔަކު ބުނަން ފެށި އެވެ.
އަންނަ އަހަރުގެ ޖޫން މަހުގެ ނިޔަލަށް ޗެލްސީގެ ކޮންޓްރެކްޓްގައި ހުރި ތިއާގޯ ސިލްވާ، މި ސީޒަނުގެ ބާކީ ބައިގައި ބޭނުންކުރާނެ ގޮތްތަކެއް މަޝްވަރާ ކުރަން ޗެލްސީގެ ކޯޗު މައުރީސިއޯ ޕޮޗެޓީނޯ ވަނީ އޭނާގެ އެސިސްޓަންޓުންގެ ކިބައިން އެދިފަ އެވެ.
އޭސީ މިލާނާއި ޕީއެސްޖީ އަށް ވެސް ކުޅެފައިވާ ތިއާގޯ ސިލްވާ އަށް ޗެލްސީން ދެން އިތުރު ކޮންޓްރެކްޓެއް ދޭނެތޯ ސުވާލު އުފެދިފައިވާއިރު، ރިޓަޔާކުރުމުގެ ކުރިން އޭނާ އަމިއްލަ ގައުމު، ބްރެޒިލްގެ ލީގުގައި ކުޅެން ބޭނުންވާ ކަމަށް ރިޕޯޓްތައް ބުނެ އެވެ.
