އެމްޑީޕީގެ ސިޔާސަތުތަކުން ގައުމީ ސަލާމަތަށް ނުރައްކާވާ ކަމަށް ބުނެ އަމާޒު ކުރި ތުހުމަތުތައް ތަހުގީގު ކުރުމަށް ޕަބްލިކް އިންކުއަރީއެއް ހަދަން ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.
ތިނަދޫ އުތުރު ދާއިރާގެ އެމްޑީޕީގެ މެމްބަރު އަބްދުލްމުޣްނީ ހުށަހެޅުއްވި އެ ގަރާރުގެ ފުރަތަމަ ކިޔުން މަޖިލީހުގެ މިއަދުގެ ޖަލްސާގައި އިއްވި އެވެ.
އެމްޑީޕީ ސަރުކާރަށް އޭރުގެ އިދިކޮޅު ފަރާތްތަކުން ކުރި ތުހުމަތުތަކުގެ އިންކުއަރީއެއް ހަދަން ގޮވާލައި ހުށަހެޅި ގަރާރަކީ މިދިޔަ ބުރާސްފަތި ދުވަހުގެ ރޭ އއ. އުކުޅަހުގައި އެ ޕާޓީން ބޭއްވި ގައުމީ މަޖިލީހުގެ ޖަލްސާގައި އެގޮތަށް ނިންމައިގެން ހުށަހެޅި ގަރާރެކެވެ.
ގައުމީ މަޖިލީހުގެ ޖަލްސާއިން ފާސްކުރި ގަރާރުގައި ބުނީ ނިމިދިޔަ ރިޔާސީ އިންތިހާބުގައި އެމްޑީޕީ އާއި އެ ޕާޓީގެ ވެރިކަމާމެދު ރައްޔިތުންގެ މެދުގައި ނަފްރަތު އުފެއްދުމަށް ރާވައިގެން އެކި ދޮގުތައް ފަތުރަމުން ގޮސްފައިވާ ކަމަށެވެ.
ޕަބްލިކް އިންކުއަރީއެއް ހަދަން އެމްޑީޕީން ބޭނުންވާ ވަކިވަކި ތުހުމަތުތައް އެ ގަރާރުގައި ހިމަނާފައިވެ އެވެ. ރާއްޖޭގައި އެތައްހާސް އިންޑިޔާ ސިފައިން ތިބެ ދިވެހިރާއްޖޭގެ މިނިވަންކަމާއި އިސްތިގުލާލް ނަގާލުމަށް ރާވަމުން ދިޔަކަމަށް ކުރި ތުހުމަތު އޭގެ ތެރޭގައި ހިމެނެ އެވެ. ރާއްޖޭގެ ކަނޑުގެ ސަރަހައްދުން ބައެއް ވިއްކާލި ކަމަށް ކުރި ތުހުމަތުތައް ބަލަން ވެސް އެ ގަރާރުގައި ގޮވާލައިފައިވެ އެވެ. އަނެއް ތުހުމަތަކީ ދައުލަތް ޝާމިލްވެގެން ކޮރަޕްޝަން ހިންގިކަމަށް ބުނެ ކުރަމުން ދިޔަ ތުހުމަތުތަކެވެ.
"...އެމްޑީޕީގެ އަބަދުވެސް އުންމީދަކީ އަދި އަމާޒަކީ މި މަގުން ދިވެހިރާއްޖޭގެ ކަންކަން ކުރިއަށް ގެންދިއުން ކަމުގައިވީހިނދު؛ މި ފެށޭ ރިޔާސީ ދައުރުގައި އެމްޑީޕީގެ ދައުރު ނުހަނު މުހިއްމު ކަމުގައި ދެކޭ ހިނދު، ޑިމޮކްރަޓިކް އުސޫލުން ދިވެހިވެރިކަމުގެ އެންމެހައި ކަމެއް ހިންގުމަށް ބާރު އެޅުމަކީ މި ގައުމުގެ ހަމަޖެހުމަށް ނުހަނު މުހިންމު ކަމެއް ކަމުގައިވާތީވެ، އަނިޔާވެރިކަން އަނބުރާ އިއާދަވުން އެއީ ދިވެހި އެއްވެސް ރައްޔިތަކު ދެކެން ބޭނުންނުވާ ދުވަހެއް ކަމުގައިވާތީވެ، ނިމިދިޔަ ރިޔާސީ އިންތިހާބުގައި މި ޕާޓީ އާއި ޕާޓީގެ ވެރިކަމާ މެދު ރައްޔިތުންގެ މެދުގައި ނަފްރަތު އުފެއްދުމަށް ރާވައިގެން ބަޔަކު ބުހުތާނު ދޮގުތައް ފަތުރަމުން ދިޔުން އެއީ ފެންނަން އޮތް ހަގީގަތެއް،" އެމްޑީޕީގެ ގައުމީ މަޖިލީހުން ފާސްކުރި ގަރާރުގައި ވެ އެވެ.
އެމްޑީޕީ އަކީ 2005 ވަނަ އަހަރުން ފެށިގެން ދިވެހިރާއްޖޭގައި ހިންގަމުން އަންނަ އެންމެ ދުވަސްވީ އަދި އެންމެ ތަޖުރިބާކާރު ސިޔާސީ ޕާޓީ ކަމަށާއި ރޭވިގެން ހިންގަމުން އައި އަނިޔާވެރިކަން ނިމުމަކަށް ގެނެސް، އާ ގާނޫނު އަސާސީ އެކުލަވާލައި އަސާސީ ހައްގުތައް ދިވެހިރައްޔިތުންނަށް ހޯދައި ދީ ޒަމާނީ ޑިމޮކްރަސީއެއް ދިވެހިރާއްޖެއަށް ގެނައުމަށް ފެށި މަސައްކަތުގެ އާރުކާޓީއަކީ އެ ޕާޓީ ކަމަށް ވެސް އެ ގަރާރުގައި ބުނެފައިވެ އެވެ.
