ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބޯހިޔާވަހިކަމުގެ ބިޔަ ވައުދުގެ ތެރޭގައި ހިމެނޭ އެންމެ ބޮޑު މަޝްރޫއުކަމަށްވާ ފުށިދިއްގަރު ފަޅުހިއްކުމުގެ މަޝްރޫއަށް ދައުލަތުން ހޭދަވާނެ ފައިސާގެ އަދަދެއް ނޭނގޭ ކަމަށާއި އެ މަޝްރޫއަށް ފައިނޭންސް ހޯދާނެ ފައިނަލް ޕްލޭނެއް ވެސް މިހާތަނަށް ނެތް ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.
ކުރީ ސަރުކާރުގެ ބޯހިޔާވަހިކަމުގެ މަޝްރޫއުތަކާއި ގުޅޭ ގޮތުން ހައިދަރު މިދިޔަ ހަފްތާގައި ދެއްކެވި ވާހަކަތަކާ ގުޅިގެން ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީއަށް އޭނާ މިއަދު ހާޒިރުކޮށް މެމްބަރުން ވަނީ އޭނާއާ ސުވާލުކޮށްފަ އެވެ.
މެމްބަރުންގެ ސުވާލުތަކަށް ހައިދަރު ދެއްވި ޖަވާބުތަކުން އެ މަޝްރޫއުގެ އެއްވެސް ކަމެއް އަދި ފައިނަލް ނުވާކަން ހާމަވެ އެވެ.
އެގޮތުން މި ސަރުކާރުން އެންމެ ބާރަށް ދައްކާ ފުށިދިއްގަރު މަޝްރޫއަށް މި ފަސްއަހަރުތެރޭ ދައުލަތުން ހޭދަވާނެ ހަރަދުގެ އަންދާޒާއެއް އެނގޭތޯ މެމްބަރަކު ކުރެއްވި ސުވާލަށް ހައިދަރު ވިދާޅުވީ ފުށިދިއްގަރު ހިއްކަން ބަޖެޓުގައި ހިމަނަން އެދިފައިވާ 400 މިލިއަން ރުފިޔާ ފާސްވެއްޖެ ނަމަ އެ މަޝްރޫއު ފަށައިގަންނަން އެ ބޭނުންކުރެވޭނެ ކަމަށެވެ. ނަމަވެސް ފަސް އަހަރު ތެރޭ އެ މަޝްރޫއަށް ހިނގާނެ ހަރަދުގެ ހިސާބު ސަރުކާރުން އަދި ނުޖަހާ ކަމަށް ވިދާޅުވި އެވެ.
"ފަސް އަހަރުތެރޭ ދާނެ ވަރެއް އަޅުގަނޑުމެން ކަލްކިއުލޭޓުކޮށްފަ އެއް ނެތް އިނގޭތޯ،" ހައިދަރު ވިދާޅުވި އެވެ.
ފުށިދިއްގަރު ހިއްކަން ސަރުކާރުން އެދިގެން އަންނަ އަހަރަށް ލަފާކުރާ ބަޖެޓުގައި 400 މިލިއަން ރުފިޔާ ހިމަނާފައިވީ ނަމަވެސް ބަޖެޓު ފާސްނުވާތީ އެއީ އަދި ލިބޭނެ ފައިސާއެއް ކަމެއް ޔަގީނެއް ނުކުރެވެ އެވެ.
ދައުލަތުގެ ދަރަނި ރެކޯޑު އަދަދަކަށް އުފުލިފައިވާއިރު އެ މަޝްރޫއަށް ފައިނޭންސް ހޯދުމާއި ގުޅޭގޮތުން މެމްބަރުން ކުރި ސުވާލުތަކަށް މިނިސްޓަރު ވިދާޅުވީ ބަޖެޓުން ލިބޭ ފައިސާ އާއި އެހެނިހެން ގޮތްގޮތުން ވެސް ފައިސާ ހޯދިދާނެ ކަމަށެވެ. އޭގެ ތެރޭގައި ބޭރުގެ އެހީތަކާއި އެހެން މަޝްރޫއުތަކަށް ކަނޑައަޅާ ބަޖެޓުން ފައިސާ ނަަގައި ބޭނުންކުރެވިދާނެ ކަމަށް ވިދާޅުވި އެވެ.
"އަޅުގަނޑުމެންނަށް ބޭރުގެ ފަރާތަކުންވެސް ފައިސާ ހޯދޭނެ. ސަރުކާރުގެ އެހެން މަޝްރޫއުތަކުން ވެސް ފައިސާ ހޯދޭނެ ގޮތްތައް ހަމަޖެއްސޭނެ. ދެން އެ ފައިސާ ހޯދާނެ ގޮތަކާ ހުރިހާ އެއްޗެއް ހަމަޖެހިގެން އެކަން ކުރިއަށްދާނީ،" ހައިދަރު ވިދާޅުވި އެވެ.
ކޮމިޓީގައި ހައިދަރު ތަކުރާރުކޮށް ވިދާޅުވަމުން ދިޔައީ ފުށިދިއްގަރުގެ ލޭންޑް ޔޫސް ޕްލޭން ވެސް ހެދިފައިވާ ކަމަށެވެ. ނަމަވެސް އެތަނުގެ އީއައިއޭ ހަދައި ނިމިއްޖެތޯ މެމްބަރުން ސުވާލުކުރުމުން ވިދާޅުވީ އެ މަސައްކަތް ކުރިއަށްދާ ކަމަށެވެ. އެހެންވެ އަދި އޮތީ ފާސް ވެސް ނުކޮށް އޮތް ލޭންޑް ޔޫސް ޕްލޭނެއް ކަމަށް ހައިދަރު ވަނީ ވިދާޅުވެފަ އެވެ. ގާނޫނު ބުނާގޮތުން ލޭންޑްޔޫސް ޕްލޭނެއް ފާސްކުރެވޭނީ އީއައިއޭ ހެދުމަށް ފަހެވެ.
މިނިސްޓަރު މިފަދައިން ވިދާޅުވިއިރު ރައީސް މުއިއްޒު ހުވާކުރައްވައި ދެއްވި ތަގުރީރުގައި ވިދާޅުވެފައިވާ ގޮތުގައި ފުށިދިއްގަރު ހިއްކުމަށް ބޭނުންވާ ލިޔެކިޔުންތަކުގެ ގިނަ މަސައްކަތްތަށް މިހާރުވެސް ހުރީ ނިމިފަ އެވެ. އަދި ވަރަށް އަވަހަށް ޒަމާނީ އާ ސަހަރުތަކުގެ ޒީނަތްތެރި މަލަތައް ދިވެހި ފަޅުފަޅުން އުފުލިގެން އަންނާނެ ކަމަށް އެމަނިކުފާނު ވިދާޅުވި އެވެ.
