އިންޑިއާ އިން ރާއްޖެއަށް ކަނޑައަޅާފައި ހުންނަވާ ސަފީރު، މުނޫ މަހާވަރް ރައްޔިތުންގެ މަޖިލީހުގެ ރައީސް މުހައްމަދު އަސްލަމް އާ މިއަދު ބައްދަލުކުރައްވައިފިއެވެ.
މަޖިލީހުގެ އިދާރާއިން ބުނިގޮތުގައި މި ބައްދަލުވުމުގައި އަސްލަމް ވަނީ އިންޑިއާއަކީ ޒަމާނުއްސުރެ ރާއްޖެއާ ވަރަށް ގާތް ގުޅުމެއް އޮންނަ ގައުމެއްކަމާއި އިންޑިއާ އަކީ ރާއްޖޭގެ ތަރައްގީގެ މުހިންމު ބައިވެރިއެއްކަން ފާހަގަކުރައްވާފަ އެވެ. އަދި އިންޑިއާއިން ރާއްޖެއަށް ވަމުންދާ އެހީތަކަށް އިންޑިއާ ސަރުކާރަށާއި ރައްޔިތުންނަށް އަސްލަމް ޝުކުރު އަދާކުރެއްވި އެވެ.
އަދި އިންޑިއާގެ ގާނޫނު ހަދާ މަޖިލީހުން ރައްޔިތުންގެ މަޖިލީހަށް ފޯރުކޮށްދޭ އެހީ އާއި ތަމްރީނުގެ ފުރުސަތުތައް ފާހަގަކުރައްވައި ރައްޔިތުންގެ މަޖިލީހާއި އިންޑިއާގެ ގާނޫނު ހަދާ މަޖިލީސް، ލޮކް ސަބާއާ ދެމެދު އޮންނަ ގުޅުން ވަރުގަދަ ކުރެއްވުމަށް މަސައްކަތް ކުރައްވާނެ ކަމަށް ވެސް އަސްލަމް ވިދާޅުވި އެވެ.
އެ ބައްދަލުވުމުގައި އިންޑިއާ ސަފީރު ވިދާޅުވީ ރާއްޖެ އާއި އިންޑިއާ ދެމެދު އޮންނަ ޒަމާންވީ ރަހުމަތްތެރި ގުޅުން އިތުރަށް ވަރުގަދަ ވެގެންދާނެ ކަމަށް އުއްމީދުކުރައްވާ ކަމަށެވެ. އަދި އެގައުމުން އަބަދުވެސް ރާއްޖޭގެ ތަރައްގީގެ މުހިންމު މަސައްކަތްތަކުގައި ބައިވެރިވެ ރާއްޖެއަށް އެހީތެރިވެދޭނެ ކަމަށް ވެސް ސަފީރު ވިދާޅުވި އެވެ.
