ނޮވެމްބަރު 3، 1988ގައި ތަމަޅައިގެން ހަނގުރާމަވެރި ޖަމާއަތަކާ ގުޅިގެން ރާއްޖޭގެ ވެރިކަން ވައްޓާލަން ދިން އުދުވާނީ ހަމަލާގެ އެންމެ އިސް މޭސްތިރިޔާ، އަބްދުﷲ ލުތުފީ ހުކުމް ތަންފީޒުކޮށް ނިމުމުން, މިނިވަން ވެއްޖެ އެވެ.
ޕީޕަލްސް ލިބަރޭޝަން އޮގަނައިޒޭޝަން އޮފް ޓެމިލް އީލާމް (ޕްލޯޓް) ޖަމާއަތުގެ ހަނގުރާމަވެރިންތަކަކާ ގުޅިގެން ތިނެއް ނޮވެމްބަރުގައި ލުތުފީ އިސްވެހުރެ ދިން އުދުވާނީ ހަމަލާއާ ގުޅިގެން އެންމެ ފުރަތަމަ ހައި ކޯޓުން ހުކުމް ކުރީ އޭނާ މެރުމަށެވެ. އެކަމަކު، ފަހުން އޭރުގެ ރައީސް މައުމޫން އަބްދުލްގައްޔޫމް ވަނީ އޭނާގެ އަދަބު އުމުރު ދުވަހުގެ (25 އަހަރުގެ) ޖަލު ހުކުމަކަށް ބަދަލުކޮށްދެއްވައިފަ އެވެ.
އެ މައްސަލާގައި އޭނާއަށް ކޮށްފައިވާ ހުކުމް ތަންފީޒުކޮށް ނިމުނީ މިއަހަރުގެ އޭޕްރީލް 25 ގަ އެވެ. އެއަށްފަހު އޭނާ ގެންދިޔައީ ރާއްޖެއިން ފިލައިގެން ދިޔަ މައްސަލާގައި އޭނާއަށް ކުރި ހުކުމް ތަންފީޒު ކުރަމުންނެވެ. އެ ހުކުމް ވެސް މިއަދު ތަންފީޒުކޮށް ނިމުމާއެކު ލުތުފީ ވަނީ މިއަދު މިނިވަން ވެފަ އެވެ.
ބޭސްފަރުވާއަށް ރާއްޖެއިން ބޭރަށް ދިޔުމަށް ހޯމް މިނިސްޓްރީން ލުތުފީއަށް ދޫކުރި އެއް އަހަރު ދުވަހުގެ ޓްރެވަލް ޑޮކިއުމެންޓެއްގެ ދަށުން އޭނާ އަމިއްލަ ހަރަދުގައި ބޭސްފަރުވާ ކުރަން ލަންކާއަށް ދާން ޖެނުއަރީ 16، 2010ގައި ފުރި ގޮތަށް އުޅުނީ ރާއްޖެއިން ބޭރުގައި ފިލައިގެންނެވެ.
ލުތުފީ ހޯދައި ހައްޔަރުކޮށް އޭނާގެ ހުކުމް ތަންފީޒުކުރުމަށް ފުލުހުންނާއި ކަރެކްޝަންސްގެ މައްޗަށް މާޗު 2012 ވަނަ އަހަރުގެ ކްރިމިނަލް ކޯޓުން އަމުރެއް ވެސް ނެރުނެވެ. އޭގެ ފަހުން ލުތުފީ ހޯދަން ފުލުހުން އިންޓަޕޮލް މެދުވެރިކޮށް ރެޑްނޯޓިސް ވެސް ނެރުނެވެ.
ނޮވެމްބަރު 3، 1988 ގައި ކުރި ބަޣާވާތަށް ފަހު ލުތުފީ ހައްޔަރުކޮށްގެން ގެންދަނީ.
ނުވަ އަހަރާއި ހަ މަހާއި ތިން ދުވަސް ވަންދެން ފިލައިގެން އުޅުނު ލުތުފީ ރާއްޖެ ގެނައީ، ލަންކާގައި ދިން އީސްޓާ ބޮމުގެ ހަލަމާތަކާ ގުޅިގެން އެ ގައުމުގެ ސިފައިން ފެށި އޮޕަރޭޝަނާއެކު، މެއި 1، 2019ގައި އޭނާ އަމިއްލައަށް ލަންކާގައި ހުންނަ ދިވެހި އެމްބަސީއާ ހަވާލުވެ އެތަނުގައި ދިރިއުޅެމުންދިޔަކަން ބަޔަކު ފަޅާއަރުވާލުމުންނެވެ.
ލަންކާގެ އިދާރާތަކާ ގުޅިގެން، ޖުލައި 9، 2019ގައި ލުތުފީ ރާއްޖެ ގެނެސް، ފިލައިގެން އުޅުނު މައްސަލައިގައި އޭނާގެ މައްޗަށް އުފުލީ މީހުން ބަންދު ކުރާ މަރުކަޒަކުން ފިލުމުގެ ދައުވާ އެވެ. އެ ދައުވާއާ ގުޅިގެން، މާޗް 10، 2021ގައި އޭނާގެ މައްޗަށް ހަތް މަހާއި ހަ ދުވަހުގެ ހުކުމެއް ކުރީ އޭނާ ދައުވާއަށް އިއުތިރާފުވުމުންނެވެ.
ލުތުފީ ފިލައިގެން ދިޔަ މައްސަލައިގެ ހުކުމް އޭނާ ތަންފީޒުކުރަން ފެށީ ނޮވެމްބަރު ތިނެއްގެ ހުކުމް ނިމުމުން މިއަހަރު އޭޕްރީލް މަސް ތެރޭގަ އެވެ.
ތަމަޅަ ޓައިގަރުންނާއެކު ލުތުފީ ވެސް ބަޑި ހިފައިގެން މާލެ ތެރޭގައި އުޅުނެވެ. އެގޮތުން، ބައެއް ކެބިނެޓް މިނިސްޓަރުން ހޯދަން އެ ބޭފުޅުން އުޅުއްވި ގެތަކަށް ވެސް ބަޑި ހިފައިގެން ވަނެވެ. އޭނާ އަތުލައިގަތީ ހަމަލާ ނާކާމިޔާބުކޮށްލުމުން، "އެމްވީ ޕްރޮގްސްރެސް ލައިޓް" ނަމަކަށް ކިޔާ ބޯޓެއް ހައިޖެކްކޮށް، ދިވެހީންތަކެއް ރަހީނުކޮށްގެން ފިލަން ދަނިކޮށް އިންޑިއާ ސިފައިންގެ އެހީތެރިކަމާއެކު ކަނޑުމަތިންނެވެ.
ލުތުފީ އިސްވެ ހުރެ ވެރިކަން ވައްޓާލަން ދިން އެ ހަމަލާގައި ސިފައިންގެ އަށް މީހަކާއި އާންމުންގެ 11 މީހަކު ޝަހީދުވި އެވެ.
ލުތުފީއާއެކު އެ ހަމަލާގައި ބައިވެރިވި، ސަގަރު އަހުމަދު ނާސިރުގެ މައްޗަށް ވެސް 25 އަހަރުގެ ހުކުމެއް ކުރި އެވެ. އެ ހުކުމް ތަންފީޒުކޮށް ނިމުމުން އޭނާ މިނިވަންވެފައި ހުންނަތާ އަހަރުތަކެއް ވެއްޖެ އެވެ. ލުތުފީގެ ހުކުމް ތަންފީޒުކޮށް ނިމުމާއެކު، 19 ދިވެއްސަކު ޝަހީދުކޮށްލި އެ ހަމަލާއާ ގުޅިގެން ކުރި ހުރިހާ ހުކުމެއް ވެސް މިހާރު ވަނީ ތަންފީޒުކޮށް ނިމިފަ އެވެ.
