ކުރީގެ ރައީސް އަބްދުالله ޔާމީން ޕީޕީއެމުން ވަކިވެވަޑައިގެން އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) އުފައްދަނީ އެމަނިކުފާނުގެ ދަރިކަލުން ޒޭން އަބްދުالله ޔާމީންގެ ނަމުގައިކަން ހާމަކޮށްފި އެވެ.
ޔާމީންގެ އާ ޕާޓީ އުފެއްދުމަށް މިއަދު ހެނދުނު ވަނީ އީސީގެ ހުއްދަށް އެދިފަ އެވެ. އާ ސިޔާސީ ޕާޓީގެ ނަމާއި ލޯގޯ އާންމުކުރީ ރޭގެ ވަގުތެއްގައި ސޯޝަލް މީޑިއާ މެދުވެރިކޮށެވެ.
މިކަމުގައި އިސްކޮށް އުޅުއްވާ އެމަނިކުފާނުގެ ސަރުކާރުގެ ޔޫތު މިނިސްޓަރު, މުހައްމަދު މަލީހު ޖަމާލު ވިދާޅުވި ގޮތުގައި އާ ޕާޓީ އުފެއްދުމަށް ޔާމީން ބޭނުންފުޅުވީ އެމަނިކުފާނުގެ ހިމެނޭހެން އަށް މީހުންގެ ނަން މަތީގަ އެވެ. އީސީގެ ގަވާއިދު ބުނާ ގޮތުން ސިޔާސީ ޕާޓީއެއް ރެޖިސްޓްރީ ކުރުމުގެ ހުއްދައަށް އެދެވޭނީ އެންމެ މީހެއްގެ ނަން މަތީގަ އެވެ.
"މިހާރު ވާހަކަ ދެކެވިފައި ވަނީ ޔާމީންގެ ފަރާތްޕުޅުން ޒޭން އަބްދުالله ޔާމީނަށް މި ހުއްދަ ދޫކޮށްދިނުމަށް," މަލީހު ހާމަކުރެއްވި އެވެ.
އޭގެ އިތުރުން, ދެން މުއައްސިސުންގެ ގޮތުގައި ތިއްބަވާނީ ޔާމީނާއި, އެމަނިކުފާނުގެ ވެރިކަމުގައި ނައިބު ރައީސަކަށް ހުންނެވި ޑރ. މުހައްމަދު ޖަމީލު އަހުމަދާއި, ކުރީގެ ސީޕީ ހުސައިން ވަހީދާއި, މުލިއާގޭގެ ޗީފް އޮފް ސްޓާފް އަހުމަދު މުސްތަފާ, އަދްލީ އިސްމާއީލް އާއި ޑރ. ޖިހާދު ހަސަނާއި ކަކާގޭ އަލީ އާދަމް ކަމަށް ވެސް މަލީހު ހާމަކުރެއްވި އެވެ.
"ރާއްޖޭގައި ސިޔާސީ ޕާޓީއެއް އުފެއްދުމުގެ ރެކޯޑު އަޅުގަނޑުމެން މުގުރާލާނަން. އެކަން ކުރާނަން. ޕާޓީން މާލެ ސިޓީގެ މޭޔަރު ކަމަށް ވާދަކުރާނަން. މަޖިލިސް އިންތިހާބުގައި ވެސް ބޮޑުކޮށް ވާދަކުރާނަން," މަލީހު ވިދާޅުވި އެވެ.
ޕީޕީއެމާއި ޕީއެންސީގެ ލީޑާޝިޕްގެ ގިނަ ބޭފުޅުން ވަނީ ޔާމީނާ އެކު ސިޔާސީ މަސައްކަތް ކުރުމުން ދުރަށް ޖެހިވަޑައިގަނެފަ އެވެ. އެގޮތުން, ސަރުކާރުގެ ދިފާއުގައި ލީޑާޝިޕްގެ ގިނަ ބޭފުޅުން ވަނީ ވާހަކަ ދައްކަވާފަ އެވެ.
ޕީޕީއެމުން ވަކިވެ، އާ ޕާޓީއެއް ހެއްދެވުމަށް ރައީސް ޔާމީން ނިންމެވީ ޕާޓީގެ ލީޑާޝިޕުން އެމަނިކުފާނު އެއްފަރާތް ކޮށްފައިވާ ކަމަށް ބުނެ އެވެ. ޔާމީންގެ ފަރާތުން ރައީސް މުއިއްޒަށް ގިނަ ތުހުމަތުތަކެއް ކޮށްފައިވާއިރު އޭގެ ތެރޭގައި، އެމަނިކުފާނުގެ ފޯނު ކޯލަށް ރައީސް ޖަވާބު ނުދެއްވުމާއި ޖަލު ހުކުމުން މިނިވަން ނުކުރުން ހިމެނެ އެވެ.
