ވެރިކަން ކުރާ ޕީޕީއެމް/ޕީއެންސީ ކޯލިޝަނާ ދުރަށް ޖެހިވަޑައިގެން ކުރީގެ ރައީސް އަބްދުﷲ ޔާމީން އުފައްދަވާ އާ ޕާޓީ އުފެއްދުމުގެ ހުއްދައަށް އާދީއްތަ ދުވަހު ހުށަހަޅަން ނިންމައިފި އެވެ.
ޔާމީނުގެ ޕާޓީ އުފެއްދުމުގައި އިސްކޮށް ހަރަކާތްތެރިވާ ކުރީގެ ކޮމިއުނިކޭޝަންސް މިނިސްޓަރ މުހައްމަދު މަލީހް ޖަމާލު މިއަދު "އަދަދު"އަށް ވިދާޅުވީ އަސާސީ ގަވާއިދު އެކުލަވައިލުމުގެ މަސައްކަތާއި އެހެނިހެން އިދާރީ މަސައްކަތްތައް ބާރަށް ކުރިއަށް ދާކަމަށެވެ.
އަންނަ އާދީއްތަ ދުވަހު ޕާޓީ އުފެއްދުމުގެ ހުއްދައަށް އެދެވޭނެ ކަމަށް މަލީހް ވިދާޅުވި އެވެ.
"ރޭގަ ނަން ފާސްވެފައި މިއޮތީ، ރައީސް ޔާމީނު ހެނދުނު ލޯގޯ ފާސްކުރައްވައިފި. އަސާދީ ގަވާއިދު ނިމުމުގެ މަގުމަތީގައި، އިދާރީ ގޮތުން ދެން ހުރި ކަންކަން ހުކުރުން ފައިބައިގެންނާއި އެއްކޮށް އަޅުގަނޑުމެން ފަށާނަން" މަލީހް ވިދާޅުވި އެވެ.
ރައީސް ޔާމީން އިސްކޮށް ހުންނަވައި އާ ސިޔާސީ ޕާޓީއެއް އުފެއްދެވުމުގެ މަސައްކަތް ފަށްޓާވައިފައި މިވަނީ ޕީޕީއެމްއިން ކުއްލި ގޮތަކަށް ވަކިވެވަޑައިގަތުމަށްފަހު އެވެ. ޔާމީން ޕީޕީއެމް ދޫކޮށްލެއްވީ އާ ރައީސް މުއިއްޒު ހުވާކުރެއްވިތާ ބަރާބަރު ހަފުތާއެއް ފަހުންނެވެ.
އެމަނިކުފާނު ޕީޕީއެމްއިން ވަކިވެވަޑައިގެން ސަބަބު ބަޔާން ކޮށްދެއްވަމުން ރައީސް ޔާމީންގެ ލޯޔަރު، ޑރ. މުހައްމަދު ޖަމީލް އަހުމަދު ޗެނެލް 13 އަށް ދެއްވި އިންޓަވިއުއެއްގައި ވިދާޅުވީ އެ ނިންމުން ޔާމީން ނިންމެވީ އެމަނިކުފާނުގެ މަޝްވަރާ ޕީޕީއެމްގެ ލީޑާޝިޕްގެ ބޭފުޅުން ނުނަންގަވާތީ ކަމަށާއީ އެއީ އެމަނިކުފާނަށް ފަސޭހަ ނިންމުމެއް ނޫން ކަމަށެވެ.
ވެރިކަމާ ހަވާލުވެވަޑައިގަތުމަށްފަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު, ޔާމީން ގުޅުއްވުމުން ފޯނު ނުނަންގަވާ ކަމަށް ވެސް ޑރ. ޖަމީލު ރޭ ހާމަކުރެއްވި އެވެ.
ނިމިދިޔަ ރިޔާސީ އިންތިހާބުގައި ރައީސް ޔާމީނަށް ވާދަ ނުކުރެއްވޭ ހާލަތުގައި ޕްރޮގުރެސިވް ކޯލިޝަން ތަމްސީލު ކުރައްވާނެ ބޭފުޅަކު ހޮވުމަށް ބޭއްވި ޖޮއިންޓު ސެނެޓު ބައްދަލުވުމާ ހަމައިން ރައީސް މުއިއްޒުއަށް ތާއީދު ކުރާ ފަރާތްތަކާއި ރައީސް ޔާމީންގެ ސަޕޯޓަރުންގެ މެދުގައި ވަނީ ނުތަނަވަސްކަން އުފެދެން ފަށައިފަ އެވެ.
ނުތަނަވަސްކަމުގެ ހުޅު ފަޅައިގެންދިޔައީ ރައީސް ޔާމީނަށް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް ސުޕްރީމް ކޯޓުން ކުރި ހުކުމާއެކު އިންތިހާބު ބޮއިކޮޓު ކުރަން ރައީސް ޔާމީން އެދިލެއްވި ހިސާބުންނެެވެ.
