އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓަަށް ބަހުސްކުރަން ރައްޔިތުންގެ މަޖިލީހުގެ މިއަދުގެ ޖަލްސާ މިރޭ 10:00 އާ ހަމައަށް ކުރިއަށް ގެންދަން ނިންމި ނަމަވެސް ބަހުސްގައި ބައިވެރިވެވަޑައިގަންނަވާނެ މެމްބަރުން ތަަޅުމުގައި ނެތުމުން ޖަލްސާ ކުރުކޮށްލައިފި އެވެ.
ބަޖެޓް ބަހުސް އަވަހަށް ނިންމުމަށް ޓަކައި މިއަދުގެ ޖަލްސާ މިރޭ 10:00 ހަމައަށް މަޖިލިސް ކުރިއަށް ގެންދަން ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 34 މެމްބަރުންގެ އިއްތިފާގުންނެވެ.
މަޖިލީހުގެ މިއަދުގެ ޖަލްސާއަށް އެޖެންޑާކޮށްފައި އޮތީ ވެސް ބަޖެޓް ބަހުސް އެކަންޏެވެ.
މިރޭ 10:00 އާ ހަމައަށް ޖަލްސާ ކުރިއަށް ގެންދަން ފާސްކޮށްފައި އޮތް ނަމަވެސް މެންދުރު ފަހު 2:40 އެހާކަށް ހާއިރު އޭރު ޖަލްސާގެ ރިޔާސަތުގައި އިންނެވި ހަނިމާދޫ ދާއިރާގެ އެމްޑީޕީ މެމްބަރު އަބްދުލް ޣަފޫރު މޫސާ އިއުލާނުކުރެއްވީ ތަޅުމުގައި ތިއްބެވި ހުރިހާ މެމްބަރުންނަށް ވާހަކަ ދެއްކެވުމުގެ ފުރުސަތު ނިމިފައިވާ ކަމަށެވެ. ޖަލްސާ ނިންމަވައިލެއްވިކަން އެއާ އެކު އޭނާ އިއުލާނު ކުރެއްވި އެވެ.
މަޖިލީހުގެ ޖަލްސާ މިއަދު ފެށި އިރު ޖަލްސާއަށް ވަޑައިގެން ތިއްބެވީ 32 މެމްބަރުންނެވެ. މަޖިލީހުގެ ޖުމްލީހުގައި 87 ދާއިރާ އޮންނަ އިރު، 81 މެމްބަރަކު މިހާރު ވެސް ތިއްބަވަ އެވެ. މެމްބަރުންގެ އަދަދު 81 އަށް މަދުވީ ވަޒީރުކަމަށް ވަޑައިގަންނަވަން ބައެއް މެމްބަރުން އިސްތިއުފާ ދެއްވުމުންނެވެ.
