ޔުނިވާސިޓީއެއްގެ ދަރަޖަ ނުލިބޭތީ އުނދަގޫތަކާ ކުރިމަތިލާންޖެހޭ ކަމަށާއި އެއީ ކަންބޮޑުވާ ކަމެއް ކަމުގައި ވިލާ ކޮލެޖުން ބުނެފި އެވެ.
ބައިނައްލަގުވާމީ ފެންވަރުގެ ޔުނިވާސިޓީ އަދި ކޮލެޖު ރޭންކިން ސިސްޓަމް، ކިއުއެސް ސްޓާއިން ވިލާ ކޮލެޖަށް ހަތަރު ތަރި ލިބުން އިއުލާނު ކުރުމުގެ ގޮތުން މިއަދު ބޭއްވި ނޫސްވެރިންގެ ބައްދަލުވުމުގައި މި ކަންބޮޑުވުން ފާޅުކުރެއްވީ، އެ ކޮލެޖުގެ ވައިސް ރެކްޓާ ޑރ. އަލީ ނަޖީބެވެ.
ނޫސްވެރިއެއްގެ ސުވާލަށް ޖަވާބުދެއްވަމުން ޑރ. އަލީ ވިދާޅުވީ، ޔުނިވާސިޓީއެއްގެ ދަރަޖަ ނުލިބުމުގެ ސަބަބުން އެކި ރޭންކިން ސިސްޓަމްތަކަށް ކުރިމަތިލުމުގައި އެ ކޮލެޖަށް ގިނަ ގޮންޖެހުންތަކެއް ކުރިމަތިވާ ކަމަށެވެ.
ރާއްޖޭގައި ޔުނިވާސިޓީގެ ދަރަޖަ ދިނުމަށް އޮންނަ ސިސްޓަމުން މިސާލު ނަންގަވަމުން ޑރ. އަލީ ވިދާޅުވީ، ކޮލެޖު ދަރަޖައިގެ އެއްވެސް ތަނަކަށް ރާއްޖޭގައި ޕީއެޗްޑީ ފެންވަރުވެ ޕްރޮގްރާމްތައް ނުހިންގޭ ކަމަށެވެ. އޭގެ ސަބަބުން ދުނިޔޭގެ އެހެން ކޮލެޖުތަކުގެ ޖޮއިންޓް އަދި ޑުއަލް ޕްރޮގްރާމުތައް ވެސް ނުހިންގޭކަމަށް އޭނާ ވިދާޅުވި އެވެ.
ވިލާ ކޮލެޖްގެ ވައިސް ރެކްޓާ ޑރ. އަލީ ނަޖީބް -- ފޮޓޯ: އަދަދު/މިރާޝް
މީގެ އިތުރުން ވިލާ ކޮލެޖަށް ޔުނިވާސިޓީ ދަރަޖަ ނުލިބުމުގެ ސަބަބުން ރަނގަޅު ފެންވަރުގެ ޕްރޮފެސަރުން ގެނައުމާއި އެހެން ކޮލެޖުތަކާއެކު މަސައްކަތް ކުރުމުގައި ގޮންޖެހުންތަކަކައި ކުރިމަތިވާކަން ވައިސް ރެކްޓާ ފާހަގަކުރެއްވި އެވެ. އަދި ޓޮޕް ޔުނިވާސިޓީ ރޭންކިން އެއްގައި ވިލާ ކޮލެޖު ހިމެނޭއިރު، ޔުނިވާސިޓިއެއްގެ ދަރަޖަ ނުލިބުމަކީ ކަންބޮޑުވާންޖެހޭ ކަމެއްކަމުގައި ވިދާޅުވި އެވެ.
"ދުނިޔޭގެ ފެންވަރުގަ ވިލާ ކޮލެޖު ހިފަހައްޓާލާ، ދެމެހެއްޓެނެވި ގޮތެއްގެ ހިދުމަތް ދިނުމަށް އޮތް ހުރަހެއް އެއީ[ޔުނިވާސިޓީއެއްގެ ދަރަޖަ ނުލިބުން]. ގައުމަށް ބަލާއިރު، ހަޔާ އެޑިއުކޭޝަން ސެކްޓާގެ ޑިވެލޮޕް ކުރުމަށްޓަކާ ވިލާ ކޮލެޖަށް ޔުނިވާސިޓިއެއްގެ ސްޓޭޓަސް ދިނުން މުހިއްމު،" ވައިސް ރެކްޓާ ވިދާޅުވި އެވެ.
ރާއްޖޭގެ ގާނޫނު އޮންނަ ގޮތުން ޔުނިވާސިޓީއަކަށް ބަދަލު ކުރެވެނީ ކޮލެޖެއްގެ ގޮތުގައި މެދުކެނޑުމެއް ނެތި ހިނގަމުން އަންނަތާ 20 އަހަރުވެފައިވާ ނަމަ އެވެ. ސަރުކާރުގެ ފަރާތުން ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު ޝިފާއު ވަނީ އެ މުއްދަތު 10 އަހަރަށް ބަދަލުކުރަން މިދިޔަ އޮކްޓޫބަރު 16، ގައި ރައްޔިތުންގެ މަޖިލީހަށް ބިލެއް ހުށަހަޅާފަ އެވެ.
ވިލާ ކޮލެޖު ހިންގަން ފެށީ 2008 ވަނަ އަހަރު އެވެ. މިއީ އެ ކޮލެޖު ހިންގާތާ 16 ވަނަ އަހަރެވެ.
