ރައްޔިތުންގެ މަޖިލީހުގައި މި ވަގުތު ކުރިއަށްދާ ޖަލްސާއަށް އެޖެންޑާކޮށްފައިވާ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ ގަރާރު އިއްވައި އެ މައްސަލަ ކުރިއަށް ގެންދަން ފުރުސަތު ދެއްވުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ގޮވާލައްވައިފި އެވެ.
މަޖިލީހުގެ ރިޔާސަތު މިއަދު ބަލަހައްޓަވަނީ ނައިބު ރައީސް އީވާ އަބްދުﷲ އެވެ. ފުރަތަމަ ޖަލްސާ ފެއްޓެވިއިރު އެމްޑީޕީއާއި ޑިމޮކްރެޓްސްގެ ގިނަ މަޖިލިސް މެންބަރުން ރިޔާސަތު ކުރިމަތީ އަޑުގަދަ ކުރައްވަމުން ގެންދެވި އެވެ.
އެމްޑީޕީގެ ގިނަ މެންބަރުން ބޭނުން ވަނީ އީވާ ރިޔާސަތު ދޫކުރައްވައި، ދެން ރިޔާސަތު ބަލަހައްޓަވަން ހުންނެވި މެންބަރަކަށް ފުރުސަތު ދެއްވުމަށެވެ. ނަމަވެސް އީވާ ރިޔާސަތުގައި އިންނެވުމުން އެމްޑީޕީގެ މެންބަރުން ގެންދަވަނީ އިހުތިޖާޖު ކުރައްވަމުންނެވެ.
ފަހުން ޖަލްސާ ފެއްޓެވީ، މާހައުލު އަޑުގަދަވުމާއެކު މެންބަރުން ހެޑްސެޓް ބޭނުންކޮށްގެންނެވެ. ނަމަވެސް ގަރާރު އިއްވަން ފުރުސަތު ނުދެއްވައި އީވާ ފުރުސަތު ދެއްވަމުން ގެންދެވީ މެންބަރުންގެ ނިޒާމީ ނުކުތާއަށެވެ. ފުރަތަމަ ނިޒާމީ ނުކުތާ ނަންގަމުން ވެސް ގެންދެވީ އީވާއަށް ނިސްބަތްވާ ޑިމޮކްރެޓްސްގެ މެންބަރުންނެވެ.
ނިޒާމި ނުކުތާގެ ފުރުސަތެއްގައި، މަޖިލީހުގައި މާމިގިލި ދާއިރާ ތަމްސީލްކުރައްވާ މެންބަރު ގާސިމް ވިދާޅުވީ ޖަލްސާގެ އެޖެންޑާގައި އޮތް އައިޓަމަކީ މަޖިލީހުގެ ރައީސްގެ އިތުބާރު ނެތް ކަމުގެ ގަރާރު ކަމަށެވެ. އެ ގަރާރަށް ފުރުސަތު ނުދެއްވައި ޖަލްސާ ކުރިއަށް ގެންދަނީ ކީއްވެގެންތޯ ވެސް ސުވާލު ކުރެއްވި އެވެ.
"ގާނޫނު އަސާސީގައި އޮންނަ ގޮތުން މަޖިލީހުގެ ނައިބު ރައީސަށް ނުވެސް އިށީނދެވޭނެ، އެއީ މިއީ ކަމަނާއަށް މަސްލަހަތު ފުށުއަރާ ކަމެއް މިއީ، ކަމަނާ ތި ތަނުން ފައިބައިވަޑަންނަވާ،" ގާނޫނު އަސާސީ އެކުލަވާލި ހާއްސަ މަޖިލީހާއި، އަށާރަވަނަ ރައްޔިތުންގެ މަޖިލީހުގެ ރައީސްކަން ވެސް ކުރައްވާފައި ގާސިމް ވިދާޅުވި އެވެ.
މަޖިލީހުގެ ގަވައިދުގައިވާ ގޮތުނން މަޖިލީހުގެ ރައީސް ވަޑައިނުގަންނަވާ ހާލަތުގައި ޖަލްސާތަކުގެ ރިޔާސަތު ބަލަހައްޓަވާނީ ނައިބު ރައީސެވެ. އެހެން މެމްބަރަކާ ރިޔާސަތު ހަވާލުކުރާނީ ނައިބު ރައީސް ވެސް ވަޑައިނުގަންނަވާ ހާލަތުގަ އެވެ.
ނަމަވެސް މަޖިލީހުގައި މިހާރު އުފެދިގެން އުޅޭ ހިޔާލު ތަފާތު ވުމަކީ ނަޝީދު ވަކިކުރަން އެމްޑީޕީން ހުށަހެޅި ގަރާރު، މަޖިލީހުގެ ގަވައިދާ ހިލާފު ކަމަށް އިއްޔެގެ ފުރަތަމަ ޖަލްސާގެ ރިޔާސަތު ބެލެހެއްޓެވި، ވިލުފުށި ދާއިރާގެ މެމްބަރު ހަސަން އަފީފު ނިންމެވުމުންނެވެ. އީވާ ވެސް ވަނީ އެ ނިންމެވުން ދަމަހައްޓަވައިފަ އެވެ.
މި ހައިޖާނުގަނޑުގެ ތެރެއިން އެމްޑީޕީން ދެން ދިޔައީ ސުލޫކު ކޮމިޓީއަށެވެ. އީވާއާއި އަފީފު ވެސް މަޖިލީހުގެ މެންބަރުންގެ އިމްތިޔާޒުތަކަށް އަރައިގަތް ކަމަށް ތުހުމަތު ކުރައްވަ އެވެ. އެ ކޮމިޓީން ލަފައެއްގެ ސިފައިގައި ފާސްކުރީ ނަޝީދުގެ ގަރާރު ގެންދަވަން އީވާއާއި އަފީފުގެ މަސްލަހަތު ފުށު އަރާތީ، އެހެން މެންބަރަކަށް ރިޔާސަތު ހަވާލު ކުރެއްވުމަށެވެ.
އެ މައްސަލަ އާންމު ކޮމިޓީއަށް ފޮނުވުމުން، އެ ކޮމިޓީން ނިންމީ އެޓާނީ ޖެނެރަލް އިބްރާހިމް ރިފްއަތުގެ ލަފައެއް ހޯއްދެވުމަށެވެ. ރިފްއަތު ދެއްވި ގާނޫނީ ލަފައަކީ މަސްލަހަތު ފުށު އަރާ ކަމަށް ވަންޏާ، އީވާއާއި އަފީފު ރިޔާސަތު ބެލެހެއްޓެވުން އެންމެ ރަނގަޅު ނޫން ކަމަށެވެ.
