ރައްޔިތުންގެ މަޖިލީހުގެ ރައީސް މައްޗަންގޮޅީ މެދު ދާއިރާގެ މެމްބަރު އަދި ކުރީގެ ރައީސް މުހައްމަދު ނަޝީދު ވަކިކުރުމަށް ހުށަހެޅި މައްސަލަ ނުނިމި އޮތްއިރު، އަންނަ އަހަރަށް ލަފާ ކުރާ ދައުލަތުގެ ބަޖެޓު ހުށަހެޅުން ދެން އެންމެ އަވަހަށް އޮންނަ ޖަލްސާއަކަށް އެޖެންޑާ ކޮށްދިނުމަށް އެ މަނިކުފާނު އެދިވަޑައިގަނެފި އެވެ.
ނަޝީދުގެ އިތުބާރު ނެތްކަމުގެ މައްސަލަ މިއަދު އޮތް ދެ ޖަލްސާއަށް ވެސް އެޖެންޑާ ކުރި އެވެ. ފުރަތަމަ ބޭއްވި ޖަލްސާގެ ރިޔާސަތުގައި، ވިލުފުށީ ދާއިރާގެ މެމްބަރު ހަސަން އަފީފު އިންނެވިއިރު، ނަޝީދު ވަކިކުރުމުގެ މައްސަލަ ކުރިޔަށް ގެންދިޔަ ނުދިނުމަށްޓަކައި އެ ބޭފުޅުން ނިސްބަތްވާ ދަ ޑިމޮކްރެޓްސް ޕާޓީގެ ޕާލިމެންޓަރީ ގްރޫޕުގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް ނިޒާމީ މައްސަލައެއްގެ ގޮތުގައި ނެގީ ހުށަހަޅާފައި ވަނީ މަޖިލީހުގެ ގަވާއިދާ އެއްގޮތްވާ ގަރާރެއް ނޫން ކަމަށެވެ.
ނިޒާމީ އޮއިވަރެއްގެ ތެރެއަށް މަޖިލީހުގެ ތަޅުން ދޫކޮށްލުމަށް ފަހު އަފީފު ނިންމެވީ، ޑެމޮކްރެޓުން ބޭނުންވި ގޮތަށް އެ ގަރާރު މަޖިލީހުގެ ގަވާއިދާ ހިލާފު ކަމަށެވެ. އެހެންވެ، ނަޝީދު ވަކިކުރުން އަލުން ހުށަހަޅަން އެންގި އެވެ.
އަފީފުގެ އެ ނިންމުން މަޖިލީހުގެ އަމީން އާންމު ގަބޫލު ނުކުރައްވައި، 11:30 އަށް ވެސް ޖަލްސާ އެޖެންޑާކުރި އެވެ. އެ ޖަލްސާގެ ރިޔާސަތު ބެލެހެއްޓެވީ ސަލާމު ފޮނުއްވި މަޖިލީހުގެ ނައިބު ރައީސް އީވާ އަބްދުﷲ އެވެ. އީވާ ނިންމެވީ ގަރާރު ބޭރުކޮށްލަން އަފީފު ނިންމެވި ނިންމެވުން ރަނގަޅު ކަމަށެވެ.
ނަމަވެސް އަމީންއާންމު ފާތިމަތު ނިއުޝާ ގަބޫލު ކުރައްވަނީ އީވާ އާއި އަފީފުގެ ނިންމެވުން ގޯސް ކަމަށެވެ.
އިތުބާރު ނެތްކަމުގެ މައްސަލަ ނިމިފައިވާ ކަމަށް އަމީންއާންމު ގަބޫލު ނުކުރައްވާއިރު، އަމީންއާންމަށް ނަޝީދު ފޮނުއްވި ސިޓީއެއްގައި ވަނީ މާލީ އަހަރު ފެށުމުގެ ދެ ދެ މަސް ކުރިން ފެށޭ އަހަރަށް ލަފާކުރާ ދައުލަތުގެ ބަޖެޓު ހުށަހަޅަން ޖެހޭކަން ފާހަގަކުރައްވައިފަ އެވެ.
އެގޮތަށް, ބަޖެޓު ހުށަހެޅުމަށް އެޖެންޑާ ކުރި ނަމަވެސް ފިނޭންސް މިނިސްޓަރު އިބްރާހިމް އަމީރު އެ ދުވަހުގެ ޖަލްސާއަށް ހާޒިރުވެވަޑައިގަނެފައި ނުވާ ކަމަށް ނަޝީދުގެ ސިޓީގައި ވިދާޅުވެފައިވެ އެވެ.
titledesc
"ގާނޫނުއަސާސީ އާއި ގާނޫނުގައި ލާޒިމުކޮށްފައިވާ ތާރީހަށް ފިނޭންސް މިނިސްޓަރު މަޖިލީހަށް ހުށަހެޅުން މިހާރު ލަސްކުރައްވާފައިވުމާއި, ސުޕްރީމް ކޯޓުގެ ހުކުމުގައިވާ ފަދައިން އެކަން އިތުރަށް ލަސްކުރެވެން ނޯންނާނެތީ, ދައުލަތުގެ ބަޖެޓު ހުށަހެޅުން ދެން އެންމެ އަވަހަށް ބާއްވާ ޖަލްސާގެ ފުރަތަމަ ކަމެއްގެ ގޮތުގައި އެޖެންޑާ ކޮށްދެއްވުމަށް ދެންނެވީމެވެ," ނަޝީދުގެ ސިޓީގައި ލިޔުއްވާފައިވެ އެވެ.
ނަޝީދު މިގޮތަށް އެދިވަޑައިގަނެފައި ވާއިރު އެމަނިކުފާނާ ދެކޮޅަށް ހުށަހަޅާފައިވާ އިތުބާރު ނެތްކަމުގެ މައްސަލަ އީވާ އާއި އަފީފު ވަނީ ހުއްޓުވައިފަ އެވެ. މަޖިލީހުގެ ރައީސާއި ނައިބު ރައީސް ނިސްބަތްވެވަޑައިގަންނަވަނީ ނަޝީދު އެމްޑީޕީން ވަކިވެ އުފެއްދެވި ދަ ޑިމޮކްރެޓްސްއަށެވެ.
އެ ދެ ބޭފުޅުންނަށް ރިޔާސަތު ނުބެލެހެއްޓެވޭ ހާލަތުގައި އެ ދައުރު އަދާކުރައްވަން ފަސް މެމްބަރުން ހަމަޖައްސާފައިވެ އެވެ. އޭގެ ތެރެއިން އެންމެ ފުރަތަމަ ބޭފުޅަކީ ހަސަން އަފީފެވެ. އެއީ ވެސް ދަ ޑިމޮކްރެޓްސްގެ މެމްބަރެކެވެ.
އަންނަ އަހަރަށް ލަފާކޮށް 49.5 ބިލިއަން ރުފިޔާގެ ބަޖެޓެއް ފިނޭންސް މިނިސްޓްރީން ވަނީ ލިޔުމުން މަޖިލީހަށް ހުށަހަޅާފަ އެވެ. އެއްވެސް މަސައްކަތެއް ކުރިއަށް ގެންދިޔުމުގެ ފުރުސަތު ނުދީ ހުއްޓުވާފައި އޮތް މަޖިލީހުގެ ތަޅުމަށް އަދި އަމީރު ބަޖެޓު ހުށަހަޅުއްވާފައި ނުވެ އެވެ.
