ރައްޔިތުންގެ މަޖިލީހުގެ ރައީސް ކަމުން މައްޗަންގޯޅި މެދު ދާއިރާގެ މެންބަރު މުހައްމަދު ނަޝީދު ވަކިކުރުމުގެ ގަރާރު ގަވާއިދަށް ފެތޭ ކަމަށާއި ގަރާރު ތަޅުމުން ބޭރުކޮށްލީ ގޯސްކޮށް ކަމަށް މަޖިލީހުގެ މެޖޯރިޓީ ލީޑަރު މުހައްމަދު އަސްލަމް ވިދާޅުވެއްޖެ އެވެ.
މަޖިލީހުގެ މެޖޯރިޓީ ޕާޓީ އެމްޑީޕީން ހުށަހަޅާފައިވާ ގަރާރަކީ މަޖިލީހުގެ ގަވާއިދާ ހިލާފަށް ހުށަހަޅާފައިވާ ގަރާރެއް ކަމަށް ބުނެ ވިދާޅުވެ ނަޝީދު ނިސްބަތްވާ ޑިމޮކްރެޓްސްގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް ވަނީ ނިޒާމީ މައްސަލައެއް ފާހަގަ ކުރައްވައިފަ އެވެ.
މަޖިލީހުގެ މައިނޯރިޓީ ލީޑަރު އަދި މެދު ހެންވޭރު ދާއިރާގެ މެންބަރު އާޒިމް ވިދާޅުވަނީ ގަވާއިދުގެ 167 ވަނަ މާއްދާގެ ދަށުން ގަރާރެއް ހުށަހަޅާނެ ގޮތް ބަޔާންކޮށްފައިވާއިރު އޭގައިވާ ގޮތުގެ މަތިން ދީބާޖާއެއް ވެސް އިތުބާރު ނެތް ކަމުގެ ގަރާރުގައި ހުށަހަޅާފައެއް ނުވެ އެވެ.
މެޖޯރިޓީ ޕާޓީ އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަސްލަމް "އަދަދު" ނޫހަށް ވިދާޅުވީ ގަވާއިދަށް ގަރާރު ނުފެތޭ ކަމަށް ދެއްކި ވާހަކަތަކީ ހަމަޖެހޭ ވާހަކަތެއް ނޫން ކަމަށެވެ.
"މިއީ މާ ކުރިން ނޯޓިސް ދެވި، އިދާރީ ހުރިހާ މަރުހަލާއެއް ނިންމައި، ގަވާއިދަށް ފެތޭ ކަމަށް މަޖިލީހުގެ އިދާރާއަށް ފެނިގެން މަޖިލީހުގެ ޖަލްސާއަކަށް އެޖެންޑާ ކޮށްފައިވާ ގަރާރެއް، އެ ގަރާރު ބޭރުކުރެވިގެން ނުވާނެ،" އަސްލަމް ވިދާޅުވި އެވެ.
ރައްޔިތުންގެ މަޖިލީހުގައި ހިތަދޫ އުތުރު ދާއިރާ ތަމްސީލް ކުރައްވާ މެންބަރު އަސްލަމް ވިދާޅުވީ އެ މައްސަލަ ހައްލު ކުރުމަށް މަޖިލީހުގެ އިދާރާއެކު މަޝްވަރާ ކުރައްވަމުން އެބަ ގެންދަވާ ކަމަށެވެ.
އާޒިމް ނެންގެވި ނިޒާމީ ނުކުތާއަށް ފަހު، ކޮންމެ މެންބަރަކު ވެސް ގެންދެވީ ނިޒާމީ ނުކުތާގެ ފުރުސަތު ހޯއްދަވައި އެ ކަމުގައި ދެކެވަޑައިގަންނަވާ ގޮތެއް ވިދާޅުވަމުންނެވެ. އެ ބަހުސް އެތައް އިރެއް ވަން ދެން ގެންދަން ފެށުމުން އެމްޑީޕީގެ މެންބަރުން އެދުނީ އާޒިމްގެ ނުކުތާއާ މެދު ރިޔާސަތުން ގޮތެއް ނިންމުމަށެވެ.
ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފް ދެން އިއުލާން ކުރެއްވީ ގަރާރު އޮތީ މަޖިލީހުގެ ގަވާއިދާ އެއް ގޮތަށް ނޫން ކަމަށެވެ. ޑިމޮކްރެޓްސްއަށް ނިސްބަތްވާ އެ މެންބަރު، ޑިމޮކްރެޓްސްގެ ސްޓޭންޑާ އެއް ގޮތަށް ކަނޑައެޅުއްވުމަށް ފަހު ޖަލްސާ ނިންމަވާލެއްވި އެވެ.
"މެދު ހެންވޭރު ދާއިރާގެ އިއްޒަތްތެރި މެމްބަރު އަލީ އާޒިމް ހުށަހެޅުއްވި ނިޒާމީ މައްސަަލަ އަޅުގަނޑު ބަލައިގެންފިން. މި ގަރާރު މިއޮތީ މަޖިލީހުގެ ގަވައިދާ އެއްގޮތަކަށް ނޫން ހުށަހެޅިފައި. އެހެންވީމާ އަލުން މި މައްސަލަ ހުށަހަޅުއްވަން، މި މައްސަލަ މިހާރު ނިމުނީ،" އަފީފު ވިދާޅުވި އެވެ.
މީގެ ކުރިން ވެސް ނަޝީދު ވަކިކުރުމުގެ ގަރާރު އެކި ފަހަރު މަތިން ގެންދަން މަސައްކަތްކޮށްގެން ވެސް އެ ކަން ކުރެވޭ ގޮތެއް ވަނީ ނުވެފަ އެވެ.
މަޖިލީހުގެ އިދާރާއިން ވެސް ގަވާއިދު އެކި ގޮތަށް މާނަކޮށްގެން އެ ކަން ހުއްޓުވާފައި އޮތުމަށް ފަހު މިއަދު ގަރާރު އެޖެންޑާކުރީ، ކުރިމަތިވެފައިވާ ދުސްތޫރީ ހިންގުމުގެ ސުވާލުތަކަށް ސުޕްރީމް ކޯޓުން ގޮތްތަކެއް ކަނޑައަޅައި އިއްވި ހުކުމަށް ފަހު އެވެ.
އެންމެ ފުރަތަމަ ހަމަ ޑިމޮކްރެޓްސްއަށް ނިސްބަތްވާ ނައިބު ރައީސް އީވާ އަބްދުﷲ ނެތިސް އެ ގަރާރު ނުގެންދެވޭނެ ކަމަށް އިދާރާއިން ނިންމާފައިވެ އެވެ. އެއިރު ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާތީ، ހުންނެވީ މަޖިލީހަށް ސަލާމުގަ އެވެ. އޭނާ މިއަދު ވެސް ހުންނެވީ ސަލާމުގަ އެވެ.
ގަވާއިދުގެ 205 ވަނަ މާއްދާގައި އޮންނަނީ މަޖިލީހުގެ ރައީސް މަގާމުން ވަކިކުރުމަށް ހުށަހަޅައިފައިވާ މައްސަލައަށް ގޮތެއް ނިންމުމުގެ ޖަލްސާގެ ރިޔާސަތު ބަލަހައްޓަން ޖެހޭނީ ނައިބު ރައީސް ކަމަށެވެ. ނައިބު ރައީސަށް ރިޔާސަތު ނުބެލެހެއްޓޭ ހާލަތެއްގައި ވާނެ ގޮތެއް ގަވައިދުގެ 205 ވަނަ މާއްދާގައި ނޯވެ އެވެ. ކުރިން މަޖިލީހުން މައްސަލަ ހުއްޓުވާފައި އޮންނަނީ ގަވާއިދުގެ އެ މާއްދާއަށް އެކަނި ރިއާޔަތްކޮށްގެންނެވެ.
ސުޕްރީމް ކޯޓުން ވަނީ ގަވާއިދުގެ 44 ވަނަ މާއްދާގައި ބުނާ މަޖިލީހުގެ ރައީސްއާއި ނައިބު ރައީސް ފިޔަވައި ރިޔާސަތު ބަލަހައްޓަން ކަނޑައަޅާ އެހެން މެންބަރުންނަށް މަޖިލީހުގެ ރިޔާސަތު ބެލެހެއްޓޭނެ ކަމަށް ކަނޑައަޅައިފަ އެވެ. މިއަދަށް އަލުން ގަރާރު އެޖެންޑާކުރީ ސުޕްރީމް ކޯޓުގެ ހުކުމް އެ ގޮތަށް އައުމުންނެވެ.
