އެންމެ މަގުބޫލު އާޓިފިޝަލް އިންޓެލިޖެންސް (އޭއައި) ޗެޓްބޮޓް، އޯޕެންއޭއައިގެ ޗެޓްޖީޕީޓީގެ އައު މޮޑެލެއް އިއުލާންކޮށްފި އެވެ.
އޯޕެންއޭއައި އިން ޑިވެލޮޕާ ކޮންފަރެންސްގައި އިއުލާންކޮށްފައިވާ އައު މޮޑެލަށް ދީފައިވާ ނަމަކީ "ޖީޕީޓީ-ފޯ ޓާބޯ" އެވެ. ޓާބޯ ނެރޭނެ ވަކި ތާރީހެއް އަދި ނެތް ނަމަވެސް، މި އަހަރު ނިމުމުގެ ކުރިން ނެރޭނެ ކަމަށް އޯޕެންއޭއައި އިން ބުނެ އެވެ.
ޓާބޯގައި ހިމެނޭ ބައެއް ކަންކަމަށް ބަލައިލާއިރު، ކޮންޓެކްސް ވިންޑޯ އިތުރުކުރުން ހިމެނެ އެވެ. މި ވަގުތު ބޭނުންކުރާ ޖީޕީޓީ-ފޯ ގައި އިންޕުޓް ކުރެވެނީ 8،000 ޓޯކަން ނުވަތަ ގާތްގަނޑަކަށް 24 ސަފުހާގެ ކޮންޓެކްސްޓެވެ. ނަމަވެސް ޓާބޯގައި 128،000 ޓޯކެން ނުވަތަ ގާތްގަނޑަކަށް 300 ސަފުހާގެ ކޮންޓެކްސްޓް ޕްރޮސެސް ކުރާނެ އެވެ.
އަނެއް ބޮޑު ކުރިއެރުމަކީ ޓާބޯގެ އަދާހަމަކަމެވެ. އަދުގެ ތްރީ ޕޮއިންޓް ފައިވް އަދި ފޯގައި ހިމެނޭ މައުލޫމާތައް ވަނީ ސެޕްޓެމްބަރު 2021 އާއި ހަމައަށެވެ. ނަމަވެސް ޓާބޯ ވަނީ އޭޕްރީލް 2023 އާއި ހަމައަށް އަދާހަމަވެފަ އެވެ.
މީގެ އިތުރުން ޑިވެލޮޕަރުންނަށް ޖީޕީޓީ-ފޯ އަށް ވުރެ ޓާބޯގެ އަގު ހެޔޮވާނެ ކަމަށް އޯޕެންއޭއައި އިން ބުނެ އެވެ. ޖީޕީޓީ-ފޯ ގެ އިންޕުޓްގެ ކޮންމެ 1،000 ޓޯކެން އަކަށް 0.03 ޑޮލަރު ނަގާ އިރު، ޓާބޯގަ ނަގާނީ 0.01 ޑޮލަރެވެ.
ޗެޓްޖީޕީޓީގެ ދެ މޮޑެލެއް މިވަގުތު އާންމުންނަށް ބޭނުންކުރެވެ އެވެ. އެއީ ހިލޭ ބޭނުންކުރެވޭ ޖީޕީޓީ ތްރީ ޕޮއިންޓް ފައިވް އަދި މަހު ފީ ދައްކާ އުސޫލުން ބޭނުންކުރެވޭ ޖީޕީޓީ ފޯ އެވެ. ގަބޫލުކުރެވޭ ގޮތުގައި ޓާބޯ މޮޑެލްވެސް ބޭނުންކުރެވޭނީ ފައިސާ ދައްކައިގެންނެވެ.
ޓާބޯގެ އިތުރުން ވެސް އައި އޭއައި އާލާތްތައް އޯޕެންއޭއައި އިން ވަނީ ޑިވަލަޕާ ކޮންފަރެންސްގައި އިއުލާންކޮށްފަ އެވެ. އޭގެތެރޭގައި ޖީޕީޓީ ތްރީ ޕޮއިންޓް ފައިވް ޓާބޯ އަދި އަމިއްލަ ބޭނުމައް އުނިއިތުރު ގެނެވޭ "ޖީޕީޓީސް" ނަން ދީފައިވާ ފީޗާއެއް ހިމެނެ އެވެ.
