މިފްކޯގެ ފްލީޓަށް އިތުރުކުރާ ތިން ބޯޓުގެ ތެރެއިން ފުރަތަމަ ބޯޓު ކަމަށްވާ "ޖަޒީރާ 106" ތައިލޭންޑުން ރާއްޖެ އައުމަށް ދަތުރު ފަށައިފި އެވެ.
އެ ބޯޓު ތައިލެންޑުން ފުރީ މިމަހު ހަތަރު ވަނަ ދުވަހު އެވެ. އަދި ރާއްޖެ އާދެވެނީ މިމަހު 19 ގަ އެވެ.
މިފްކޯއިން ބުނީ ޖަޒީރާ ސީރީޒްގެ މަސްކިރާ ބޯޓުތަކަކީ ދުވާލަކަށް 60 ޓަނު ބްރައިން ފްރީޒް ކުރެވޭ އަދި 200 ޓަނު މަސް ރައްކާކުރުމުގެ ގާބިލުކަން ލިބިފައިވާ ބޯޓުތައް ކަމަށެވެ. މި ތިން ބޯޓު އެ ކުންފުނީގެ އޮޕަރޭޝަނާއި ގުޅުމުން ދުވާލަކަށް 180 ޓަނުގެ މަސް ގަތުމުގެ ގާބިލުކަން ލިބިގެންދާނެ ކަމަށް މިފްކޯއިން ބުނެ އެވެ.
މިފްކޯ ފްލީޓަސް އިތުރުކުރާ ތިން ބޯޓުގެ ތެރެއިން އެއް ބޯޓު "ޖަޒީރާ 106" -- ފޮޓޯ: މިފްކޯ
މަސްވެރިކަމުގެ މޫސުމުގައި މަސް ކިރުމަށް ދިމާވާ ދަތިތައް ހައްލު ކުރުމަށް މިފްކޯއިން ވަނީ މިއަހަރު ހަތަރު ބޯޓު ގަނެފަ އެވެ. އޭގެ ތެރެއިން "ޖަޒީރާ 103" މާޗް މަހު ރާއްޖެ ގެނެސް, މިހާރު ދަނީ ދެކުނުގައި މަސްކިރުމުގެ މަސައްކަތް ކުރަމުންނެވެ. އެއީ ދުވާލަކަށް 120 މެޓްރިކް ޓަނުގެ މަސްގަނެ ފިނި ކުރުމާ އެކު ޖުމްލަ 420 ޓަނުގެ މަސް ރައްކާ ކުރެވޭ ގޮތަށް ފަރުމާ ކޮށްފައިވާ ބޯޓެކެވެ.
ފްލީޓަށް އިތުރުކުރުމަށް މިއަހަރު ގަތް "ޖަޒީރާ 105" އަދި "ޖަޒީރާ 104" މި އަހަރު ނިމުމުގެ ކުރިން ގެންނާނެ ކަމަށް މިފްކޯއިން ބުނެ އެވެ. އެ ބޯޓުތައް ރާއްޖެއައިސް އޮޕަރޭޝަނާ ގުޅުމން ދެކުނާއި މެދުރާއްޖެތެރޭގެ މަސްވެރިކަން ރަނގަޅު ދުވަސްތަކުގައި ދިމާވާ ދަތިތަކަށް ހައްލު ލިބިގެންދާނެ ކަމަށް ވެސް އެ ކުންފުނިން ބުނެ އެވެ.
މިފްކޯއިން ބުނީ މި ފަސް އަހަރު ތެރޭގައި ކެރިއާ ބޯޓާއެކު އެ ކުންފުނީގެ ފްލީޓަށް ހަ ބޯޓު އިތުރު ކުރެވިފައިވާ ކަމަށެވެ.
މިފްކޯ އިން އިތުރަށް ބުނީ ކޫއްޑޫގެ މަސްގަތުމުގެ ކެޕޭސިޓީ އިތުރު ކުރުމަށް ޝިފްޓަކަށް 120 ޓަނުގެ ފްރީޒިން ކެޕޭސިޓީ އިތުރު ކުރުމާއި, ތިނަދޫ ފިޝަރީޒް ކޮމްޕްލެކްސްގެ މަސައްކަތް މިހާރު ކުރަމުންދާ ކަމަށެވެ. ތިނަދޫ ފިޝަރީޒް ކޮމްޕްލެކްސްއަކީ ޝިފްޓަކަށް 120 ޓަނުގެ ފްރީޒް ކުރެވޭ އަދި 1000 ޓަނުގެ ކޯލްޑް ސްޓޯރެއް ގާއިމު ކުރާ ސެންޓަރެވެެ.
މިފްކޯއިން ބުނީ މިހާރު އެ ދެ ސައިޓަށް ވެސް ބޭނުންވާ ބިލްޑިން ސްޓްރަކްޗާގެ އިތުރުން މައިގަނޑު ހުރިހާ މެޝިނަރީއެއް ސައިޓަށް ގެންގޮސް އަމަލީ މަސައްކަތް ފަށާފައިވާ ކަމަށެވެ.
