ހުއްދަ ނެތި ކޭޝް ކާޑުން ވިޔަފާރިކޮށްގެން މީހަކު ތިން މަސް ދުވަހުގެ މުއްދަތަކަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފި އެވެ.
ހުއްދަ ނެތި ކޭޝް ކާޑު ބޭނުން ކުރި މީހާގެ މައްޗަށް ދައުލަތުން ވަނީ، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާ އުފުލައިފަ އެވެ.
މި ކަމެއް ހިނގީ މިދިޔަ ޖުލައި 19، ގަ އެވެ. އެ ދުވަހުގެ ދަންވަރުގެ އެކި ވަގުތުތަކުގައި އެ ކޭޝް ކާޑު ބޭނުންކޮށްގެން އެމްއެޗްއޭ މާޓު ފިހާރައިން ޖުމުލަ 1،285 ރުފިޔާގެ ވިޔަފާރިކޮށްފައިވާ ކަމަށް ދައުވާގައި ބުނެ އެވެ.
ދައުވާ ރައްދުވާ މީހާ ވަނީ ޝަރީއަތުގައި ކުށަށް އިއުތިރާފުވެފަ އެވެ.
ގާނޫނުލް އުގޫބާތުގައި ކުށުުގެ އަސާސީ އަދަބަކީ ހަތަރު މަހާއި 24 ދުވަހުގެ މުއްދަތަކަށް ޖަލަށް ލުމެވެ. ކުށަށް އިއުތިރާފުވުމުން އެއް ދަރަޖަ ދަށް ކުރުމަށް ވެސް ގާނޫނުގައި އޮވެ އެވެ.
އަދި ދައުވާ ރައްދުވާ ފަރާތުން ވީހާ ވެސް ލުއި އަދަބެއް ދިނުމަށް ޝަރީއަތުގައި އެދިފަ އެވެ.
އެ ހުރިހާ ކަމަށް ރިއާޔަތް ކުރުމަށް ފަހު ޝަރީއަތުން ކަނޑައަޅާފައިވަނީ އެއް ދަރަޖަ ދަށްކޮށް، ތިން މަހާއި 18 ދުވަހަށް ޖަލަށް ލުމަށެވެ. އަދި 21 ދުވަހަށް މުޖުތަމައަށް ހިދުމަތް ކުރުމަށެވެ.
